- नोभेम्बर २७ देखि सीप परीक्षण
- प्लेन्टी ट्रेनिङ प्रालिको समन्वयमा परीक्षा सञ्चालन हुने
- भाषा तथा सीप परीक्षा उत्तीर्ण गरेकालाई रोजगारी अवसर
- जापानी नागरिकसरह तलबभत्ता र सेवा सुविधा
काठमाडौं– वैदेशिक रोजगारीका लागि आकर्षक गन्तव्य मानिएको जापानमा अब ‘बिल्डिङ मेन्टिनेन्स’ अन्तर्गत सरसफाइका क्षेत्रमा पनि नेपाली श्रमिकले रोजगारीको अवसर पाउने भएका छन् । नेपाल र जापान सरकारबीच भएको जिटुजी सम्झौताअनुसार ‘स्पेसिफाइड स्किल वर्कर’ (एसएसडब्ल्यू) अन्तर्गत अन्य क्षेत्रमाझैं अब सरसफाइ क्षेत्रमा पनि नेपाली श्रमिक जान पाउने भएको हो ।
नेपालबाट श्रमिक लैजाने तयारीका साथ जापानको भवन मर्मत संघ (जेबिएमए)ले परीक्षा सञ्चालन गर्ने भएको छ । जेबिएमएले आगामी नोभेम्बर २७ देखि २९ तारिखसम्म सीप परीक्षण (स्किल टेस्ट) सञ्चालन गर्ने जनाएको छ । नेपालमा रहेको प्लेन्टी ट्रेनिङ प्रालिको समन्वयमा परीक्षा सञ्चालन हुने बताइएको छ । यसअघि जेबिएमए र जापानको प्लेन्टी कम्पनीका प्रतिनिधिहरु नेपाल आएर श्रमिक लैजाने सन्दर्भमा परीक्षा सञ्चालनका लागि आवश्यक अध्ययन गरेर फर्किएका थिए ।
भाषा तथा सीप परीक्षा उत्तीर्ण गरेकाहरुलाई जापानको सरसफाइ क्षेत्रमा रोजगारी अवसर हुने र यसको सहजीकरण प्लेन्टी नेपालले गर्ने कम्पनीका प्रमुख कार्यकारी अधिकृत (सिइओ) ज्ञानेन्द्र भट्टले बताए । नेपालीहरुलाई एसएसडब्ल्यूको मापदण्डमा नै रहेर जापानमा रोजगारीको अवसर सिर्जना गराउन आवश्यक तयारीका साथ परीक्षा सञ्चालन गर्न लागिएको उनले जानकारी दिए । ‘सरसफाइ क्षेत्र भन्नाले बाह्य क्षेत्र नभई होटल, रेस्टुरेन्ट, सुपरमार्केट, हस्पिटल अपार्टमेन्टलगायतका विल्डिङभित्रै गरिने सरसफाइसम्बन्धी सजिलो काम हो,’ भट्टले भने ।
परीक्षामा सहभागी हुन चाहनेका लागि आगामी अक्टोबरबाट आवेदन खुला हुने जनाइएको छ । जेबिएमएले सञ्चालन गर्ने परीक्षाको व्यवस्थापन प्लेन्टी नेपालले गर्ने छ । नोभेम्बरको अन्त्यमा हुने सीप परीक्षाका लागि परीक्षा केन्द्रसमेत तय भइसकेको सिइओ भट्टले बताए । परीक्षामा सहभागी हुनु पहिले आवश्यक तालिम कक्षा प्लेन्टी नेपालले सञ्चालन गर्ने छ । तालिम कक्षा अक्टोबरदेखि नै सञ्चालन हुने भट्टले बताए । यो तालिममा सहभागी हुनेले मात्रै परीक्षामा सहभागी हुन पाउने सर्त राखिएको छ । परीक्षा ६० अंकको प्रयोगात्मक र ४० अंकको लिखित गरी १०० पूर्णांकको हुने छ । उत्तीर्ण हुनका लागि ६० भन्दा माथि अंक ल्याउनुपर्ने छ । परीक्षा सरसफाइसम्बन्धी भएकाले तालिम अवधि करिब डेढ महिनाको हुने उल्लेख गरिएको छ ।
सीप परीक्षामा सहभागी हुन चाहनेको उमेर १७ वर्ष पूरा हुनुपर्ने छ । सीप परीक्षण उत्तीर्ण भई जापानी भाषाको जेएफटी (ए२) अथवा जेएलपिटी (एन४) लेभल पास गरेको हुनुपर्ने जनाइएको छ । अन्य विषयमा जापान सरकारले एसएसडब्ल्यू भिसाको व्यवस्था गरेअनुसारकै हुने छ ।यस्तै भाषा तथा सीप परीक्षा पास गरेका व्यक्तिले जापान सरकारले तोकेअनुसारकै सेवासुविधा प्राप्त गर्ने भट्टले बताए । ‘जापानमा विदेशी र स्थानीय नागरिकबीच श्रममा कुनै भेदभाव छैन,’ उनले भने, ‘जुनसुकै क्षेत्रमा काम गरे पनि जापानी नागरिकसरह विदेशी श्रमिकले पनि तलबभत्ता र सेवासुविधा पाउँछन्, सबै कुरा समान छ ।’ त्यसैले श्रमिकले बिमा, सामाजिक सुरक्षा, तलबभत्ता, महँगी भत्तालगायत श्रमसँग सम्बन्धित सबै सुविधाको ग्यारेन्टी हुने उनको भनाइ छ ।
एसएसडब्ल्यूअन्तर्गत अन्य क्षेत्रमा जान तयारी गरिरहेकाहरुलाई सरसफाइको क्षेत्रमा जान निकै सहज हुने प्लेन्टी नेपालले जनाएको छ । नेपालबाट पहिलोपटक ३०० को हाराहारीमा श्रमिक लैजाने जेबिएमएको तयारी छ । जेबिएमएसँग जापानका छ हजारभन्दा बढी यस क्षेत्रका कम्पनी संलग्न रहेको र करिब ३७ हजार रोजगारीको माग रहेको बताइएको छ । भाषा तथा सीप परीक्षा उत्तीर्ण गरेका श्रमिक आफैंले व्यक्तिगत श्रम स्वीकृति प्रक्रिया बढाउनुपर्ने बताइएको छ । यसका लागि रोजगारदातासँग जापानस्थित प्लेन्टी कम्पनीले सहजीकरण गर्ने छ ।
