भ्रष्टाचारको विश्वव्यापी सूचकांकमा नेपालको स्थान पहिलोपटक सुध्रिएको भनेकै गत वर्ष हो । ठूलठूला भ्रष्टाचारकाण्डको फाइल सरकारले खोलेको र न्यायालयबाट पनि भ्रष्टाचारसम्बन्धी केही महŒवपूर्ण मुद्दाको निरुपण भएपछि नेपाल भ्रष्टाचार हुने देशको सूचीमा १०८औं स्थानमा थियो । तर, यस वर्ष भ्रष्टाचार सूचकांकमा नेपालको स्थिति झन् नाजुक हुने देखिएको छ । अर्थात्, बढी भ्रष्ट मुलुकको सूचीमा नेपाल पर्ने सम्भावना छ । कारण, निजामती सेवाकै सबैभन्दा उच्चपदस्थ मुख्यसचिव वैकुण्ठ अर्यालविरुद्ध भ्रष्टाचार मुद्दा दायर भयो । उनी निलम्बित छन् ।
भ्रष्टाचारजस्तो राष्ट्रघातसँग जोडिएको आपराधिक कसुरमा मुख्यसचिव जोडिनु पक्कै पनि गम्भीर विषय हो । यसले निजामती सेवाकै बद्नाम भएको छ । नेपालको अन्तर्राष्ट्रिय छविमा कालो धब्बा लागेको छ । यसबाट निजामती प्रशासनका सबैभन्दा उच्चपदस्थ अधिकारीले कसरी भ्रष्टाचारजन्य गतिविधिको नेतृत्व गर्छन् ? त्यो पनि छर्लंग भएको छ ।
सार्वजनिक सेवा सुधारसम्बन्धी आयोगले यसअघि नेपालको सार्वजनिक सेवा भ्रष्टाचारजन्य गतिविधिले गाँझेको प्रतिवेदन सार्वजनिक गरेको थियो । त्यसमा कर्मचारीतन्त्र पूरै भ्रष्ट देखिएको पनि उल्लेख थियो । घूस, रिसवत नदिइकन कुनै सार्वजनिक सेवा पाउन सेवाग्राहीलाई कठिन पर्ने गरेको तथ्य पनि सार्वजनिक गरेको थियो । यसमा जिम्मेवार कर्मचारीतन्त्रलाई ठह¥याइएको थियो । यहीबीच कर्मचारीतन्त्रमा आमूल सुधार ल्याउनुपर्ने माग पटक–पटक उठ्यो । तर, भ्रष्ट कर्मचारीतन्त्र सुध्रिने छाँट देखिएन ।
जबकि, गत २१ फागुन २०८० मा बनेको वर्तमान सत्ता गठबन्धनले पहिलो बुँदामै देशमा भ्रष्टाचार न्यूनीकरण गर्दै सुशासनको मार्गमा अघि बढ्ने प्रण गरेको थियो । भ्रष्टाचारविरुद्ध निर्मम बन्ने प्रधानमन्त्री पुष्पकमल दाहाल अहिले पनि बताउँछन् । तर, मुख्यसचिव अर्याल नै अन्तःशुल्क स्टिकर छपाइमा भ्रष्टाचार गरेको भन्दै प्रतिवादी बने । उनी टेरामक्सदेखि आधा दर्जन बढी काण्डमा पनि मुछिएका छन् । अख्तियार अनुसन्धानमै व्यस्त छ । विडम्बनाचाहिँ के छ भने यसरी कर्मचारीतन्त्र भ्रष्टाचारमा लीप्त हुँदा राजनीतिक नेतृत्व पनि जोडिने गरेका छन् । यसबाट भ्रष्टाचारमा मिलिजुली हुने गरेको संश्लेषण गर्न सकिन्छ ।
जबकि, जनता देशमा हुने भ्रष्टाचारले वाक्कदिक्क छन् । जनतासामु भ्रष्टाचार न्यूनीकरण गर्ने भन्दै चुनावमा दलहरू वाचा गर्छन् । तर, चुनावपछि सत्तामा पुगेर कर्मचारीसँगै राजनीतिक नेतृत्व भ्रष्टाचारमा चुर्लुम्म डुब्ने गरेका छन् । जसले गर्दा नेपाल विश्वमा धेरै भ्रष्टाचार हुनेमध्येको एक मुलुकमा पर्छ । जुन कलंक हो । यसविरुद्ध सरकार निर्मम हुनुको विकल्प छैन ।
