काठमाडौं– वैदेशिक रोजगारको प्रमुख गन्तव्यमध्येको एक कुवेतले नेपालबाट थप दुई लाख कामदार लैजाने भएको छ । कुवेतमा रोजगारीको दायरा बढ्दै गएका कारण नेपालबाट थप दुई लाख कामदार लैजाने सम्बन्धमा छलफल भएको उपप्रधान तथा परराष्ट्रमन्त्री नारायणकाजी श्रेष्ठले जानकारी दिएका हुन् ।
इरानको तेहरानमा भएको एसिया कोअपरेसन डायलग (एसिडी)को १९औं विदेशमन्त्रीस्तरीय बैठकमा सहभागी हुने क्रममा मन्त्री श्रेष्ठलाई कुवेतका विदेशमन्त्री अब्दुल्ला अली अल–याह्याले दुई लाख नेपाली कामदार लैजाने तयारी भइरहेको जानकारी दिएको जानकारी दिइएको छ । एसिडी बैठकमा सहभागी भएर स्वदेश फर्किनेक्रममा मंगलबार त्रिभुवन अन्तर्राष्ट्रिय विमानस्थलमा पत्रकारहरुसँग कुरा गर्दै कुवेतले परराष्ट्रमन्त्री श्रेष्ठले आगामी दिनमा दुई लाख नेपाली कामदार लाने जानकारी दिएको पुष्टि गरेका हुन् ।
अहिले एक लाख नेपाली कामदार रहेको कुवेतमा दुई लाख थपेर तीन लाख पुर्याउने लक्ष्य रहेको जानकारी पाएको मन्त्री श्रेष्ठले बताए । उनका अनुसार कुवेतले यसै वर्षभित्र काठमाडौंमा राजदूतावास खोल्ने तयारीसमेत गरेको मन्त्री अब्दुल्लाबाट जानकारी पाएको उल्लेख गरे । नेपालबाट ठूलो संख्यामा कामदार लैजाने गरेको कुवेतले नेपालमा दूतावास नहुँदा सास्ती खेप्नु परेको भन्दै यसको सहजीकरण र कूटनीतिक सम्बन्ध विस्तार गर्ने माध्यमको रुपमा दूतावास खोल्न लागिएको बताइएको छ ।
कुवेतले नेपालबाट वार्षिक सरदर ४० हजारको हराहारीमा कामदार लैजाने गरेको वैदेशिक रोजगार विभागको तथ्यांकले देखाएको छ । चालु आर्थिक वर्षको ११ महिनामा मात्रै ३५ हजारभन्दा बढीले कुवेत जान श्रम स्वीकृति लिएका छन् । कुवेतमा बढीजसो हाउसकिपिङ र सफाइ कार्यमा महिला कामदार जाने गरेको विभिन्न तथ्यांकले देखाएको छ ।
पछिल्लो समय कुवेतले नेपालबाट घरेलु कामदारको पनि माग गर्दै आइरहेको छ । तर सरकारले सुरक्षाको कारण देखाउँदै तत्काल घरेलु कामदार पठाउन नसकिने बताउँदै आएको छ । कुवेतमात्र नभई नेपालबाट घरेलु कामदारको माग गर्नेमा साउदी अरब, युएई र कतार पनि छन् । विभिन्न अधिकारवादी संघसंस्थाले भने खाडी मुलुकमा घरेलु कामदार पठाउन खुला गर्नुपर्ने माग गर्दै आएका छन् । सरकारले घरेलु कामदार खुला नगर्दा जोखिम बढेको र अवैध बाटो प्रयोग गरी जाने गरेका कारण मानव बेचबिखनमासमेत पर्ने गरेको उनीहरुको भनाइ छ ।
