दश वर्षपछि टी–२० विश्वकपमा सहभागी नेपालले बलियो उपस्थिति जनाएको छ । अमेरिका र वेस्ट इन्डिजमा जारी टी–२० विश्वकपअन्तर्गत शनिबार बिहान दक्षिण अफ्रिकाविरुद्धको खेलमा शानदार प्रदर्शन गर्दै नेपालले क्रिकेटहरुको मन जित्न सफल भएको हो । क्रिकेटको ‘पाउवर हाउस’ दक्षिण अफ्रिकाविरुद्ध नेपालले लज्जास्पद हार बोहोर्ने हो कि भन्ने आशंका नगरिएको होइन । किनभने दक्षिण अफ्रिका बलिङ÷ब्याटिङ दुवैमा उत्कृष्ट र अनुभवी खेलाडी भएको टोली हो । यता नेपाली टिममा सबै युवा खेलाडी । टेस्ट राष्ट्रसँग खेलेको अनुभव नै थिएन ।
तर, नेपाली टिमसँग बलियो आत्मबल थियो । विश्वकपमा उत्कृष्ट प्रदर्शन गर्ने भोक थियो । र, नेपाली क्रिकेटलाई स्थापित गर्ने अठोट प्रत्येक खेलाडीमा थियो । जुन दक्षिण अफ्रिकाविरुद्ध प्रस्ट देखियो । नेपालले पहिले फिल्डिङ गर्दै दक्षिण अफ्रिकालाई २० ओभरको खेलमा ११५ रनमात्र बनाउन दियो । नेपाली बलरहरुले उत्कृष्ट बलिङ गरेपछि दक्षिण अफ्रिका सात विकेट गुमाएर दबाबमा परेको थियो ।
हुन त भाग्यभन्दा कर्ममा विश्वास गर्नुपर्छ भनिन्छ । तर कहिलेकाहीँ भाग्यले साथ नदिँदा जति राम्रो गरे पनि नतिजा उल्टो आइदिन्छ । हो, नेपाललाई यस्तै भयो । राम्रो खेल्यो तर हा¥यो । मात्र एक रन जोड्न चुक्दा नेपालले दक्षिण अफ्रिकालाई खेलको नतिजा सुम्पिनुप¥यो । र, हारसँगै सुपर–८ मा पुग्ने बाटो पनि बन्द भयो । दक्षिण अफ्रिकासँग हार बेहोरे पनि नेपालले विश्वभरका क्रिकेटप्रेमीको मन जित्न सफल भएको छ । अन्तर्राष्ट्रिय क्रिकेट काउन्सिल (आइसिसी)ले खेलपछि आफ्नो पेजमा लेखेको छ, ‘दक्षिण अफ्रिकाले खेल जित्यो, नेपालले मन जित्यो ।’ उक्त खेलका होस्टहरुले नेपाल र दक्षिण अफ्रिकाबीचको खेल ‘जारी प्रतियोगिताकै उत्कृष्ट खेल’ भएकोसमेत विश्लेषण गरे । त्यसैले नेपालको हारले पीडा दिए पनि विश्वस्तरीय प्रदर्शनप्रति गर्व गर्नुपर्छ । यो प्रदर्शनले साँच्चै नेपाली क्रिकेटको उचाइ बढाएको छ ।
यो खेल जितेको भए नेपालले पहिलोपटक टेस्ट मान्यताप्राप्त राष्ट्रलाई हराउने इतिहास बन्ने थियो । साथै, नेपालको जारी प्रतियोगिताको सुपर–८ मा पुग्ने सम्भावना जीवित रहने थियो । पहिलो खेलमा नेदरल्याण्ड्ससँग पराजित भएको नेपालले श्रीलंकाविरुद्धको दोस्रो खेल वर्षाका कारण खेल्न पाएन । अब अन्तिम खेल नेपालले बंगलादेशविरुद्ध खेल्ने छ । बंगलादेशसँग पनि यही स्तरको खेलको अपेक्षा गरौं । खेलमा जित वा हार स्वाभाविक हो । तर, नतिजा जुन आए पनि सम्झनलायक प्रदर्शन गरेको छ, नेपाली टिमले । वाह ! नेपाली क्रिकेट ।
