नेपाली सेना गौरव बोकेको संस्था हो । मुलुकका अधिकांश निकाय विवादित र अस्थिर भइरहँदा सेना त्यस्तो एक मात्र संस्था हो जसले आफ्नो अस्तित्व बचाइराखेको छ । राज्यको रक्षा गर्ने दायित्व बोकेको सेनालाई केही वर्षयता जबरजस्त विवादमा तान्ने प्रयास भइरहेको छ । सेनालाई आफ्नो भूमिकामा सीमित नराखी विभिन्न कार्यमा प्रयोग गरिँदा विवादमा तानिँदै आएको छ ।
यस्तै विवाद अहिले उठिरहेको छ । जुन बुधबार संघीय संसद्मा बहसको विषय बन्यो । सांसदहरुले सेनाको भूमिकालाई लिएर गम्भीर प्रश्न उठाए ।
नेपाली सेनाको भूमिकामा प्रश्न उठ्नुको कारण हो, सरकारले ठेक्कापट्टाको काम सेनालाई दिनु । राष्ट्रिय गौरवका विभिन्न परियोजनाहरुको ठेक्का सेनालाई दिएको छ । सेनाले पनि ती आयोजनाका विभिन्न काममा फेरि ठेक्का लगाएको छ । सेनालाई दिएको काम फेरि घुमिफिरि ठेकेदारकै हातमा पु¥याइएकोप्रति सांसदहरुले प्रश्न उठाए । जुन प्रश्न जायज छ । ठेकेदारलाई नै लगाउने हो भने सेनालाई किन दिनु ?
विशेषगरी काठमाडौं–तराई÷मधेस द्रुतमार्ग निर्माणको जिम्मा पाएको नेपाली सेनाले यस मार्गका विभिन्न खण्डको काम ठेक्कामा लगाएपछि सांसदहरुले प्रश्न उठाएका हुन् । त्यसो त द्रुतमार्गको जिम्मेवारी दिने बेलादेखि नै यो विषयलाई लिएर सेना र सरकारको आलोचना हुँदै आएको छ । सेनालाई ठेक्कापट्टाको काममा लगाउन नहुने तर्कको पछाडि विभिन्न तथ्यहरु छन् । मुख्य त सेनाको काम नै होइन यो । यद्यपि, सरकारले विकास निर्माणको काममा सेनालाई लगाउन सक्ने व्यवस्था संविधानमै छ ।
तर, त्यसको अर्थ ठेक्कापट्टामा लगाउने भन्ने बुझाइ गलत हुनसक्छ । यसबारे थप प्रस्ट गर्नुपर्ने देखिन्छ । अर्को सेनाभित्र पछिल्लो समय भ्रष्टाचर मौलाउँदै गएका तथ्यहरु बाहिर आइरहेका छन् । यसको मुख्य कारण ठेक्कापट्टा नै हो भन्नेमा दुईमत नहोला । सेनाभित्रको भ्रष्टाचारबारे अनुसन्धान गर्ने अधिकार अख्तियार दुरुपयोग अनुसन्धान आयोगलाई समेत छैन । जसकारण सो विकृति नियन्त्रणबाहिर रहेको छ ।
सांसदहरुले सेनालाई ‘ठेकेदार’ बनाउनु गलत र जोखिमपूर्ण भनेका छन् । वर्तमान व्यवस्थामाथिकै खतराको रुपमासमेत उनीहरुले चित्रित गरेका छन् । यसरी ठेक्कापट्टाको विषयलाई लिएर सेना फेरि विवादमा तानिएको छ । यो राम्रो होइन । यो विवाद तत्काल टुंग्याउनतर्फ सरकार र सरोकारवाला सबैको ध्यान जानुपर्छ । सेनालाई व्यवसाय गर्ने संस्था नभई पूर्ण व्यावसायिक सेना बनाउन जरुरी छ । नेपाली सेना आफैंले पनि आफ्नो राष्ट्रिय दायित्व सम्हाल्दै ठेक्कापट्टाको कामबाट बाहिरिनुपर्छ ।
