नेपाल पत्रकार महासंघ नेपाली पत्रकारहरुको साझा संगठन हो । यही संगठन अहिले नेतृत्व फेरेर नयाँ जोश सञ्चारको तयारीमा छ । तर जेठ २६ का लागि तोकेको महाधिवेशन राजनीतिक दल सम्बद्ध संस्थाहरुको कारण अन्योलमा परेको छ । मुलत महासंघको महाधिवेशन नेपाली कांग्रेस समर्थित नेपाल प्रेस युनियन, नेकपा एमाले समर्थित प्रेस चौतरी र माओवादी केन्द्र समर्थित प्रेस सेन्टरको जुँगाको लडाइँ हो । चुनावी संघारमा महासंघमा तीनै संगठनले किचलो गर्दा महाधिवेशन अन्योलमा परेको छ ।
तीनै संगठनको चित्त दुखाइको विषय हो, सदस्यता शुद्धीकरण र नयाँ सदस्यता । महासंघ विगतबाटै पत्रकारिता गर्नेभन्दा पनि व्यवसाय, राजनीति गर्नेहरुबाट संक्रमणमा परेको संस्था हो । यहाँ युनियनबाट आएका, चौतारीबाट आएका र सेन्टरबाट आएकाहरुको हालीमुहाली छ नै । बिहान आफू समर्थित नेताहरुको स्तुति गाउने र साँझ परेपछि होटलहोटल पसेर विपक्षीको कटु आलोचना गर्ने उनीहरुको दैनिकी बनेको छ ।
राजनीतिमा होमिन पत्रकारितालाई नै भ¥याङ बनाउने, जनताले नरुचाएपछि फेरि पत्रकारितामै फर्केर आउनेहरु महासंघमा छन् । तिनले शुद्धीकरणका नाममा काम गर्ने पत्रकारको नाम काटेपछि अहिले महासंघमा वाकयुद्ध छ । पत्रकार महासंघ अरूलाई सिद्धान्तको पाठ घोकाउने संस्था हो । पत्रकारितामार्फत विधिको शासन सिकाउनेहरुको साझा संगठन हो यो । तर, आफैं भने सदस्यता विवादको विषय निकालेर एकले अर्कोलाई धारे हात लगाउँदै महाधिवेशन लम्ब्याउने बाहना खोजिरहेका छन् । एकले अर्कोलाई हिलो छ्याप्ने, सेटिङ गरेरै आफैंले महासंघलगायतमा ताला लगाउनेजस्ता कर्तुत महासंघकै नेतृत्वमा बसिरहेकाहरुले मञ्चन गरिरहेका छन् ।
महासंघका अध्यक्ष विपुल पोखरेलको नेतृत्वमाथि युनियनले प्रश्न उठाउँदै आएको छ । सर्वाधिक असफल भन्दै आलोचना खेपिरहँदा उनी युनियनकै निर्देशनमा नाचिरहेका छन् । यस्तो हत्कण्डले उनी अझै असफलताको बाटोतिर लागिरहेका छन् । क्षणक्षणमा सदस्य हेरफेर गरेर सूची सार्वजनिक गर्ने, समयमा निर्वाचन गर्न नसक्नेजस्ता विषयको दाग पनि अब उनको निधारमा लाग्ने सम्भावना छ । पत्रकार जहिल्यै प्रतिपक्ष हो । तर नेपालमा सरकार जसरी चल्छ, महासंघको निर्वाचनमा पनि यसैगरी गठबन्धन हुन्छ ।
यसपटक चौतारी र सेन्टर मिलेर चुनावमा जाने भएपछि युनियन चुनाव रोक्ने प्रयासमा लागेको हो । युनियनबाट नेतृत्वमा पुगेका महासंघका अध्यक्ष पोखरेल कांग्रेसकै निर्देशनमा चुनाव रोक्ने प्रयासमा लागेको देखिन्छ । प्रतिपक्ष बनेर दारो खबरदारी गर्नुपर्ने पत्रकारहरु सत्ता र शक्तिमा टाँसिरहन यस्तो हर्कत प्रदर्शन हदैसम्म लाजमर्दो छ । यस्ता हर्कत छाडेर तुरुन्तै समयमै महाधिवेशन गर्ने वातावरण बनाऊ ।
