दोहोरो नागरिकता र राहदानी अभियोग पुष्टि भएपछि रवि लामिछानेले सभापति, गृहमन्त्री र सांसद तीन पद एकैसाथ गुमाएका थिए । त्यसपछि मिडियासँग भड्किएका लामिछानेको आक्रोश पटक–पटक सुनिन्छ । केही दिनअघि प्रतिनिधिसभामा स्पष्टीकरण दिने क्रममा पनि लामिछानेले आफूले ‘मिडिया मिलाउन नसक्ने’ भन्दै लाचार अभिव्यक्ति दिएका थिए । सहकारीको रकम अपचलनसम्बन्धमा लामिछानेमाथि अरु कोहीले प्रश्न उठायो भने त्यो मिडिया नै हो । त्यसमा पनि गोर्खा मिडियाले सहकारीको करोडौं रकम अपचलन गरेको पुष्टि भइसकेको छ ।
सोही मिडियाका सञ्चालकमध्येका प्रमुख जिबी राई अहिले फरार छन् । अर्का सञ्चालक रवि लामिछाने सरकारका उपप्रधान तथा गृहमन्त्री छन् । आफूलाई निकै चोखो सावित गर्न खोजे पनि पटक–पटक विवादमा तानिएका लामिछानेले आफू सहकारी ठगी प्रकरणमा संलग्न हुँदै नभएको दाबी गर्दै आएका छन् । उनी गोर्खा मिडिया नेटवर्क प्रालिका तत्कालीन सञ्चालक हुन् । अर्को कुरा उनले कुनै प्रमाण नराखी सहकारीको पैसा लिएको देखिएको छ । यस्तो अवस्थामा लामिछानेले दोहोरो अपराधमा गरेको देखिन्छ । तर उनी आफू चोखो रहेको दाबी गर्दै आएका छन् ।
राजा दाउदले एक अपराध छोप्न अर्को अपराध गरेझैं लामिछानेले पनि एकपछि अर्को अपराध गर्दै आएका छन् । उनको दाबीविरुद्ध प्रमाणसहित समाचार प्रकाशन गर्न थालेपछि लामिछानेले कान्तिपुर मिडिया ग्रुपका अध्यक्ष कैलाश सिरोहियालाई पक्राउ गरेको देखिन्छ । प्रतिनिधिसभामा सम्बोधनका क्रममा गृहमन्त्री लामिछानेले खेलमा तीनपटक सिठी बज्ने बताएका थिए ।
जेठ ६ गतेको सम्बोधनमा लामिछानेले खेल सुरु भएको र पहिलो सिठी सोही दिन बजेको बताए । त्यतिबेला प्रधानमन्त्री पुष्पकमल दाहाल एक्लै बडबडाएका थिए । सायद लामिछानेले बोलीको हद बढाए भनेर हो कि ! कतिपयले सिरोहियालाई पक्राउ गर्नुलाई दोस्रो सिठी बजेको संकेतसमेत गरेका छन् । उनले भनेझैं फुटबलमा मंगलबार पनि सिठी बजेको हो भने अब तेस्रो सिठी बज्नमात्र बाँकी छ ।
सिरोहियाले नागरिकता दुरुपयोग गरे नगरेको खोजी गर्ने कानुनी पाटो छँदै छ । तर नागरिकताको विषय देखाएर प्रतिशोधपूर्ण कदम चाल्नु निन्दनीय विषय हो । सहकारी ठगी प्रकरणमा आफूमाथि आरोप लागेपछि नैतिकताका आधारमा राजीनामा दिएर छानबिनका लागि बाटो खुला गरिदिनुपर्नेमा उल्टै समाचार लेखेकै भरमा प्रतिशोध साँध्नु गृहमन्त्री स्वयंका लागि घातक हुने निश्चित छ । सरकारमा बसेका ठूला दल नेकपा एमाले, माओवादी केन्द्रजस्ता दलहरु यस विषयमा मौन छन् । प्रतिशोधपूर्वक स्वतन्त्र प्रेसमाथि गरिने नियन्त्रणको प्रयास कदापि स्वीकार्य छैन ।
