काठमाडौं– श्रम, रोजगार तथा सामाजिक सुरक्षामन्त्री डोलप्रसाद अर्यालले इजरायलमा रहेका नेपाली कामदारको सुरक्षाप्रति चासो व्यक्त गरेका छन् । आइतबार बिहान इरानले इजरायलको राजधानी तेल अभिभलगायतका क्षेत्रमा ड्रोन आक्रमण गरेपछि मन्त्री अर्यालले नेपाली कामदारको सुरक्षा संवेदनशीलतालाई ध्यान दिँदै उक्त विषयमा चासो व्यक्त गरेका हुन् ।
मन्त्री अर्यालले इजरायलका लागि नेपाली राजदूत कान्ता रिजालसँग आइतबार नै टेलिफोन सम्पर्क गरी नेपाली कामदारको सुरक्षा सम्बन्धमा बारेमा जानकारी लिएको उनको सचिवालयले जनाएको छ । राजदूत रिजालका अनुसार अहिलेसम्म नेपाली कामदार सुरक्षित रहेको जानकारी प्राप्त भएको बताइएको छ ।
यसैबीच इजरायलमाथि इरानले हमला गरेपछि तेलअभिभस्थित नेपाली दूतावासले अत्यावश्यक अवस्थामाबाहेक घरबाट बाहिर ननिस्कन त्यहाँ रहेका नेपालीहरुलाई आग्रह गरेको छ । आवश्यक सुरक्षाका लागि नेपालीलाई स्थानीय सुरक्षा प्रोटोकलहरुको पालना गर्न, आफ्नो क्षेत्रका लागि जारी गरिएका अद्यावधिक सूचनाबारेमा जानकार रहन पनि दूतावासले सचेत गराएको छ ।
यसैगरी आफ्नो सुरक्षातर्फ विशेष ध्यान दिन, अत्यावश्यक अवस्थामाबाहेक घरबाट बाहिर ननिस्कन तथा सुरक्षित आश्रयस्थलको सुविधा भएको स्थलको आसपासमै रहनसमेत दूतावासले अनुरोध गरेको छ ।
दूतावासले जनाएअनुसार इजरायलमाथि इरानी हमला सुरु भएको सन्दर्भमा हालै इजरायली होम फ्रन्ट कमाण्डद्वारा सर्वसाधारणका लागि नयाँ निर्देशनहरुसमेत जारी भएका छन् । उक्त आक्रमणपछि सोमबार राति ११ बजेसम्म लागू हुनेगरी सम्पूर्ण शैक्षिक क्रियाकलाप बन्द गर्ने र ठूलो स्तरको सभा÷भेला नगर्ने भनी निर्देशन जारी भएको बताइएको छ ।
हाल इजरायलमा केयर गिभर र ‘लर्न एण्ड अर्न’ अन्तर्गत चार हजार ५०० नेपाली काम गरिरहेको परराष्ट्र मन्त्रालयसँग भएको तथ्यांकले देखाएको छ । यसअघि सन् २०२३ को अक्टोबर ७ मा इजरायलको गाजापट्टीमा प्यालेस्टाइनको हमास समूहले गरेको आक्रमणमा परी १० जना नेपालीको मृत्यु भएको थियो ।
