काठमाडौं– नेपाली युवालाई आकर्षक आम्दानीको प्रलोभन देखाएर ‘भिजिट भिसा’मा भारत तथा युएईको बाटो प्रयोग गरी सेनामा भर्ती गराउन रुस पु¥याउने गरेको पाइएको छ । जिल्ला प्रहरी परिसर काठमाडौंले नेपाली नागरिकलाई रुस लैजाने गिरोहका १२ जनालाई पक्राउ गरी लिएकोे प्रारम्भिक बयानका आधारमा उनीहरुलाई भारत तथा यूएई हुँदै रुस पु¥याउने गरेको खुलासा भएको हो ।
रुसी सेनामा भर्ती भएका नेपालीको मृत्यु भएको घटनापछि उनीहरुलाई रुस पठाउने गिरोहको खोजीमा लागेको प्रहरीले महाराजगञ्ज, लैनचौर र ठमेल क्षेत्रबाट १२ जना पक्राउ गरी बुधबार सार्वजनिक गरेको छ । पक्राउ पर्नेमा उदयपुर घर भएका ४२ वर्षीय हरिबहादुर विश्वकर्मा, काठमाडौं घर भएका सन्तोष रोका, सिन्धुपाल्चोकका २३ वर्षीय मनिष न्यौपाने, काठमाडौं– १६ घर भएका रोजल महर्जन, ३१ वर्षीय क्षितिज गिरी र सिराहा घर भएका १९ वर्षीय दिपेन परियार छन् ।
त्यस्तै काभ्रे घर भएका सुवास लामा, चितवन घर भएका गोकर्ण अर्याल, बाराका सन्तोष नेपाल, ओखलढुंगा घर भई गोकर्णेश्वर बस्ने सुजता दाहाल, लमजुङ घर भएका ईश्वर अधिकारी र दाङको घोराही उपमहानगरपालिका घर भएका ३८ वर्षीय द्रोणा डाँगी रहेका छन् ।
प्रारम्भिक अनुसन्धान तथा सोधपुछबाट नेपाली युवालाई आकर्षक रोजगारीको प्रलोभन देखाएर रुसी सेनामा भर्ती हुन पठाउने गरेको पाइएको काठमाडौं प्रहरी प्रमुख एसएसपी भुपेन्द्र खत्रीले बताए । उनका अनुसार रुसी सेनामा भर्ती गराइदिने भन्दै गिरोहले प्रतिव्यक्ति सात लाखदेखि २० लाख रुपैयाँसम्म लिने गरेको प्रारम्भिक अनुसन्धानबाट खुलेको छ । पक्राउ गरिएको गिरोहमा दुई समूह रहेको प्रहरीले जनाएको छ । एउटा समूहको नेतृत्व सुजता दाहाल र गोकर्ण अर्यालले गरेको र अर्को समूहको नेतृत्व हरिबहादुर विश्वकर्मा र ईश्वर अधिकारीले गरेको बताइएको छ ।
नेपालमा सक्रिय गिरोहलाई रुसमा बस्ने नेपाली नागरिक शोभराज र अनुपले सहयोग गर्ने गरेको प्रहरीले उल्लेख गरेको छ । रुसबाट इन्भाइट लेटर र भिजिट भिसा उपलब्ध गराएबापत गिरोहका मुख्य सदस्य हरिबहादुर विश्वकर्माले एक हजार ८५० अमेरिकी डलर पठाउने गरेको प्रहरीले गरेको अनुसन्धानबाट खुलेको छ । त्यस्तै एसएसपी खत्रीका अनुसार ‘सेटिङ र टिकेटिङ’को लागि नेपालबाट शोभराजलाई २ लाख भारतीय रुपैयाँ पठाएको अनुसन्धानबाट थाहा भएको छ । प्रहरीले नेपाली युवालाई रुसी सेनामा भर्ती हुन पठाउने गिरोहको साथबाट २७ लाख ६० हजार रुपैयाँ नगद र ४३ थान पासपोर्टसमेत बरामद गरेको जनाएको छ ।
युक्रेनसँग युद्ध लडिरहेको रुसले विदेशी नागरिकलाई पनि सेनामा भर्ती खोलेपछि विभिन्न माध्यमबाट नेपालीहरु रुस पुगेको बताइन्छ । रुसी सेनामा भर्ती भएका केही नेपालीहरुले सामाजिक सञ्जाल टिकटकमा भिडियो हालेपछि रुसी सेनामा नेपाली पनि भर्ती भएको खुलेको थियो । यसरी रुसी सेनामा भर्ती हुनेमा पूर्व प्रहरी, सेनादेखि सुरक्षागार्डका रुपमा काम गरिसकेका नेपालीहरु रहेको प्रहरीले उल्लेख गरेको छ । यद्यपि, कति नेपाली रुसी सेनमा भर्ती हुन पुगे भन्ने यकिन तथ्यांक नभएको प्रहरीले उल्लेख गरेको छ ।
रुसी सेनामा भर्ती भएका ६ जना नेपालीको मृत्यु भएपछि रुसी सेनामा रहेका नेपालीलाई फर्काइदिन सरकारले कुटनीतिक नोटसमेत पठाएको छ । रुसी सेनामा नेपालीलाई भर्ती गराउने नेपाल सरकारको नीति नभएपनि विभिन्न गिरोहमार्फत अवैध बाटो हुँदै त्यहाँ लैजाने गरेको निष्कर्ष निकाल्दै प्रहरीले यसमा संलग्नहरुको थप खोजी र अनुसन्धान जारी राख्ने बताएको छ ।
औपचारिक माध्यमबाट विप्रेषण पठाउन आग्रह
वैदेशिक रोजगारीमा रहेका र स्वदेशमा विप्रेषण रकम प्राप्त गर्नेहरूलाई आग्रह गरेको छ । वैदेशिक रोजगारीमा रहेका कतिपय नेपालीले केही रकम जोगिने प्रलोभनमा अवैध तवरले व्यक्तिमार्फत नेपालमा रकम पठाउने गरेको पाइएको भन्दै प्रहरीले औपचारिक माध्यम प्रयोग गर्न सचेत गराएको छ ।
यसरी विदेशी रकम प्राप्त गरेपश्चात ती अमूक व्यक्तिले म तपाईंले भनेको व्यक्तिको नेपालस्थित बैंक खातामा यस बराबरको सटही नेपाली रकम जम्मा गरिदिन्छु भनी गैरकानुनी तवरमा नेपालमा रहेको बैंक खातामा जम्मा गराइदिने गरेको अनुसन्धानबाट खुलेको प्रहरी प्रवक्ता कुवेर कडायतले बताए । पछिल्लो समय ‘साइबर’जन्य ठगी गर्ने गिरोह बढी नै सक्रिय रहेको पाइएको हुँदा यस्ता झुटा अश्वासनमा नपरी, ठगी हुनबाट जोगिन पनि प्रहरीले आग्रह गरेको छ ।
-1745656903.jpeg)