काठमाडौं– वैदेशिक रोजगार विभागले रोजगारीका लागि विदेश पठाइदिने भन्दै लाखौं रुपैयाँ ठगी गरेको अभियोगमा एक हप्ताभित्र सात जनाविरुद्ध मुद्दा दायर गरेको छ । आकर्षक तलब सुविधाको प्रलोभन देखाई ठगी गरेको आरोपमा पक्राउ परेका उनीहरुलाई आवश्यक छानबिन र अनुसन्धानपछि विभागले वैदेशिक रोजगार न्यायाधिकरणमा मुद्दा दायर गरेको हो ।
विभागले शुक्रबार एक विज्ञप्ति जारी गर्दै वैदेशिक रोजगार ऐन, २०६४ को दफा १० र ४३ बमोजिमको कसूर अपराध गरेको देखिँदा ठगी गर्नेहरुमाथि अनधिकृत रुपमा उठाएको रकम र त्यसको ५० प्रतिशतले हुन आउने हर्जनाको मागदाबीसहित न्यायाधिकरणसमक्ष अभियोगपत्र प्रस्तुत गरेको उल्लेख गरेको छ । विभागले ठगी गरेको अभियोगमा खिमप्रसाद गुरुङ, अर्जुन पोखरेल, उमेश सेती सुरुवाल, आर्जु सेती सुराल र मोहम्मद मोतिबाबु अन्सारी, भवानीप्रसाद लामिछाने, रोशन राजा शेखविरुद्ध कानुनी कारबाही र न्याय सम्पादनका लागि अभियोगपत्र प्रस्तुत गरेको जनाएको छ ।
प्रतिवादी खिमप्रसाद गुरुङले दक्षिण अफ्रिकामा रोजगारीमा पठाइदिने भन्दै चार जनासँग २६ लाख ५० हजार अनधिकृत रुपमा उठाएर ठगी गरेको अभियोगमा विभागले उक्त रकम र त्यसको ५० प्रतिशतले हुन आउने रकम जाहेरवालाहरुलाई भराइ पाउनुपर्ने मागदाबी लिई यही भदौ २१ गते मुद्दा दायर गरेको छ । गुरुङले लिलमाया गुरुङ, खिमविक्रम थापा र प्रेमकुमारी गुरुङबाट प्रतिव्यक्ति छ लाख ५० हजार रुपैयाँ र अर्जुनसिंह गुरुङबाट सात लाख रुपैयाँ लिएर ठगी गरेको अभियोगपत्रमा उल्लेख गरिएको छ । यसैगरी प्रतिवादी अर्जुन पोखरेलले सर्बियामा कृषिसम्बन्धी काममा पठाइदिने भन्दै सुदिप तामाङसँग चार लाख लिएर ठगी गरेको अनुसन्धानबाट खुलेको जनाउँदै विभागले उक्त रकम र त्यसको ५० प्रतिशतले हुन आउने हर्जना रकम भराइ पाउनुपर्ने मागदाबीसहित यही भदौ २६ गते मुद्दा दायर गरेको छ ।
यस्तै प्रतिवादी उमेश सेती सुरुवाल र आरजु सेती सुरालले आपसी मिलेमतो गरी रोजगारीका लागि पोर्चुगल र कम्बोडिया पठाउने भन्दै छ जनासँग ५५ लाख ५० हजार रुपैयाँ उठाएर ठगी गरेको विभागले उल्लेख गरेको छ । यसरी ठगी गरेको रकम र त्यसको ५० प्रतिशतले हुन आउने हर्जना रकम जाहेरीवालाहरुलाई भराइ पाउनुपर्ने मागदाबीसहित यही भदौ २७ गते मुद्दा दायर गरिएको छ । सुरुवालद्वयले सुरज श्रेष्ठ, टंककुमार श्रेष्ठ, हेमबहादुर तामाङसँग जनही १३ लाख रुपैयाँ, सञ्जिव गौतमसँग ११ लाख रुपैयाँ, रोहन दाहालसँग पाँच लाख र प्रतिमा गुरुङ मगरसँग ५० हजार रुपैयाँ लिएर ठगी गरेको विभागले अभियोगपत्रमा उल्लेख गरेको छ ।
त्यसैगरी प्रतिवादी मोहम्मद मोतिबाबु अन्सारी, भवानीप्रसाद लामिछाने र रोशन राजा शेखले वैदेशिक रोजगारीका लागि संयुक्त अरब इमिरेट्स (युएई) पठाइदिने प्रलोभन देखाई सत्यनारायण साह, राकेशकुमार साह र धर्मेन्द्र साहसँग ११ लाख ६८ हजार ३०० रुपैयाँ ठगी गरेको विभागले उल्लेख गरेको छ । उनीहरु तीनै जनामाथि ठगी गरेको रकम र त्यसको ५० प्रतिशतले हुन आउने हर्जना रकम पीडितहरुलाई भराइ पाउनुपर्ने मागदाबीसहित विभागले मुद्दा दायर गरेको छ ।
विभागले वैदेशिक रोजगारीका नाममा व्यक्तिगत रुपमा ठगी गर्नेलाई मात्र नभई म्यानपावर कम्पनीहरुलाई समेत कानुनी दायरामा ल्याउन कारबाही गरेको छ । प्रचलित ऐन÷नियममा भएका व्यवस्थाहरुलाई अक्षरशः कार्यान्वयन गर्न÷गराउन सदैव क्रियाशील रहेको भन्दै विभागले दुईवटा म्यानपावर कम्पनीलाई कारबाही गरेको विज्ञप्तिमार्फत जानकारी दिएको छ । विभागले इजाजतपत्र प्राप्त युनाइटेड म्यानपावर एजेन्सीलाई वैदेशिक रोजगारसम्बन्धी सम्पूर्ण गतिविधि सञ्चालन गर्न रोक लगाएको छ ।
उक्त म्यानपावरलाई वैदेशिक रोजगारीमा युक्रेन, रोमानिया र पोल्याण्ड पठाउने भनी विभिन्न व्यक्तिसँग रकम लिई सम्बन्धित मुलुकमा नपठाएको र उनीहरुको रकमसमेत फिर्ता नगरेको भन्दै यही भदौ २७ गतेको निर्णयअनुसार निलम्बन गरिएको विभागले जनाएको छ । त्यस्तै अर्को इजाजतपत्र प्राप्त म्यानपावर युरो एसिया एचआर सोलुसनलाई पनि वैदेशिक रोजगारीका लागि जान इच्छुक व्यक्तिहरुबाट भिसा शुल्क, सेवा शुल्क तथा प्रवद्र्धन खर्च बढी लिएको पुष्टि भएको भन्दै विभागले एक लाख रुपैयाँ जरिवाना गरेको छ ।