काठमाडौं - वैदेशिक_रोजगार_बोर्ड_सचिवालयले बहराइनको एक अस्पतालको कोमामा उपचाररत दिनेशकुमार चौधरीलाई नेपाल ल्याएर थप उपचारका लागि वीर अस्पतालसँग समन्वय गरेको छ । बोर्डको समन्वय र खर्चमा बहराइनको किङ हमाद युनिभर्सिटी अस्पतालको कोमामा उपचाररत सुनसरीका चौधरीलाई नेपाल ल्याएर वीर अस्पतालमा थप उपचार सुरु भएको हो ।
चौधरीलाई सम्पूर्ण खर्चसहित गत असार २९ गते कुवेत एयरवेजको उडानमार्फत स्ट्रेचर र अस्पतालका विशेषज्ञ डाक्टरसहित त्रिभुवन अन्तर्राष्ट्रिय विमानस्थलसम्म ल्याइएको बोर्डले जनाएको छ । उनलाई नेपाल ल्याउन तीन हजार २१३ बहराइन दिनार अर्थात् ११ लाख १९ हजार रुपैयाँ खर्च भएको बोर्डका निर्देशक एवं सूचना अधिकारी राजन पौडेलले जानकारी दिए ।
कोमाको अवस्थामा रहेका चौधरीलाई परिवारको आग्रहमा नेपाल ल्याउने र थप उपचारका लागि वीर अस्पतालमा भर्ना गरिएको उनले बताए । पौडेलका अनुसार बहराइनस्थित नेपाली दूतावासको समन्वयमा नेपाल ल्याइएका चौधरीको उपचारका लागि बोर्डले वीर अस्पतालसँग आवश्यक समन्वय गरिरहेको छ । विदेशमा रहेका श्रमिकलाई स्वास्थ्य परामर्श दिने र बिरामीको उपचारका लागि बोर्डले वीर अस्पतालसँग सम्झौता गरेको छ ।
रोजगारीका लागि २०२२ मा श्रम स्वीकृति लिएर बहराइन पुगेका चौधरी आल्मुनियम कम्पनीमा काम गर्दागर्दै उच्च रक्तचापका कारण १७ मार्च २०२३ मा ढलेको बताइएको छ । उपचारका लागि कम्पनीले नै अस्पताल पु¥याएर चार महिनासम्म उपचार गर्दा पनि होस नआएपछि परिवारको चाहना र आग्रहअनुसार नै नेपाल ल्याइएको बोर्डले जनाएको छ ।
चौधरीमात्र नभई वैदेशिक रोजगारीको क्रममा ज्यान गुमाएका, गम्भीर बिरामी तथा अंगभंग भएका र विभिन्न समस्यामा परेकाहरूलाई बोर्डले सम्पूर्ण खर्चसहित उद्धार गर्दै आएको पौडेलले बताए । ‘कोमाको अवस्थामा रहेका नेपालीहरूलाई बोर्डले विभिन्न समयमा उद्धार गर्दै आइरहेको छ, गत आर्थिक वर्षमा मात्रै कोमामा रहेका तीन जनाको सम्पूर्ण खर्च व्यहोरेर ल्याइएको छ,’ उनले भने ।
वैदेशिक रोजगारीको क्रममा विभिन्न कारणले कोमाको अवस्थामा पुगेका श्रमिकलाई स्वदेश ल्याउन र स्वदेशमा नै उपचारको थप व्यवस्था गर्न बोर्डले आर्थिक सहयोग गर्दै आइरहेको छ । गम्भीर बिरामी वा अंगभंग भएर स्वदेश फर्किएका श्रमिकलाई अवस्था हेरेर बोर्डले सात लाख रुपैयाँसम्म आर्थिक सहायता उपलब्ध गराउन सक्ने प्रावधान रहेको छ ।
