विगत १४ वर्षदेखि नियमित हुन नसकेको स्वतन्त्र विद्यार्थी युनियन (स्ववियु) निर्वाचन यसपटक भने हुने लगभग सुनिश्चित भएको छ । त्रिभुवन विश्वविद्यालय (त्रिवि)मा हुने स्ववियु निर्वाचनका लागि देशभरका क्याम्पसमा शनिबार उम्मेदवारी दर्ता भएको छ । काठमाडौंको रत्नराज्यलक्ष्मी क्याम्पसलगायत केही क्याम्पसमा भने उम्मेदवारी दर्ताकै दिन झडप भएको छ । यसले स्ववियु निर्वाचन शान्तिपूर्णरुपमा हुनेमा आशंका जन्माएको छ ।
शनिबार उम्मेदवारी दर्ता गर्नेक्रममा विद्यार्थीहरु निकै उत्साहित भएको पाइयो । यसरी उत्साहित हुनुको कारण वर्षौंदेखि नियमित हुन नसकेको स्ववियु निर्वाचन हुनु नै हो । प्रत्येक दुई÷दुई वर्षमा हुने स्ववियु निर्वाचन २०६५ सालयता नियमित हुनसकेको छैन । २०६५ चैत ६ गते भएको स्ववियु निर्वाचन एकै पटक आठ वर्षमा २०७३ चैत १५ गते भएको थियो । पछिल्लोपटक निर्वाचन हुँदासमेत सबै क्याम्पसमा हुन सकेको थिएन । जसले लामो समयदेखि स्ववियु नेतृत्वविहीन बन्न रहँदै आएको थियो । नयाँ विद्यार्थीले नेतृत्व तहमा पुग्ने अवसर पाइरहेका थिएनन् । त्यसैले निर्वाचनमार्फत स्ववियु हाँक्नका लागि प्रतिस्पर्धा गर्न पाउनु विद्यार्थीहरुका लागि सुखद् अवसर हो । जसकारण उनीहरु उत्साहित हुनुलाई स्वाभाविक मान्नुपर्छ ।
स्ववियु निर्वाचनमा अध्यक्ष, सचिव र कोषाध्यक्ष तथा ५० प्रतिशत सदस्य प्रत्यक्ष निर्वाचन प्रणाली र उपाध्यक्ष, सहसचिव र ५० प्रतिशत सदस्य समानुपातिक निर्वाचन प्रणालीबाट निर्वाचित हुने छन् । निर्वाचनमा २८ वर्षे उमेर हदबन्दी कायम गरिएको छ । प्रत्यक्ष तथा समानुपातिकतर्फका उम्मेदवार २०५१ फागुन २८ गते जन्म मितिको र सोभन्दा पछि जन्मेका विद्यार्थीले उम्मेदवार बन्न पाउने छन् ।
स्ववियु निर्वाचन आगामी चैत ५ गते हुँदै छ । निर्वाचन देशभरि त्रिविका ६२ आंगिक र एक हजार ४० सम्बन्धन प्राप्त क्याम्पसमा हुनेछ । विद्यार्थीको हक हितका लागि काम गर्ने स्ववियुलाई लामो समय नेतृत्वविहीन बनाइराख्नु कुनै पनि हिसाबले ठीक थिएन । वर्षौंदेखि गिजोलिएको निर्वाचन हुने क्रममा पुग्नु खुसीको कुरा हो । यसलाई सफल बनाउनु सरोकारवाला सबैको दायित्व हो ।
आसन्न निर्वाचनमा विद्यार्थीहरुलाई शान्तिपूर्ण मतदान गर्न पाउने वातावरण सिर्जना गर्नु जरुरी छ । विद्यार्थीको निर्वाचनमा असम्बन्धित व्यक्तिहरु प्रवेश गरी झडपको अवस्था सिर्जना गर्न दिनु हुँदैन । यस्ता कार्य नियन्त्रणका लागि सबै क्याम्पसहरुमा सुरक्षा व्यवस्था कडा बनाउनुपर्छ । निर्वाचनलाई शान्तिपूर्ण बनाउन विभिन्न राजनीतिक दलनिकट विद्यार्थी संगठनहरु बढी जिम्मेवार बन्नुपर्छ । स्वस्थ प्रतिस्पर्धामार्फत स्ववियुमा सक्षम नेतृत्व चुन्नुपर्छ । यसमा सरोकारवाला सबैको ध्यान पुगोस् ।
