काठमाडौं– पूर्वसञ्चारकर्मीसमेत रहेका रवि लामिछानेले आफ्नो दल रास्वपा सरकारबाट अलग भएको घोषणा गर्ने क्रममा सबैभन्दा बढी गालीको वर्षा मिडियामाथि गरे । विभिन्न सञ्चारमाध्यम र तिनका सञ्चालक तथा सम्पादक लामिछानेको निशानामा परे । उनले ती मिडियाका सञ्चालक र सम्पादकलाई तुच्छ ढंगले चर्को आलोचना गरेका थिए । जसको आधारमा उनको दलले सरकारबाट बाहिरिनुको कारण फेरि गृह मन्त्रालय नपाएर होइन, पत्रकारहरूले खेदो खनेर हो ।
यतिसम्म कि आफ्नो आलोचना गर्ने मिडिया र सम्पादकहरूलाई चितवन–२ मा उपनिर्वाचन लड्न आउन चुनौती दिए । सोही क्रममा लामिछानले भन्न भ्याए– ‘हिजो पत्रकारितामा रहँदा पनि खेदो गर्नुभयो । र, राजनीतिमा गए उपप्रधानमन्त्री भएँ । अझै खेदो गर्दै हुनुहुन्छ, अब प्रधानमन्त्री बन्नेगरि चुनाव जितेर आउँछु ।’ उनले नेपाली पत्रकारिता साह्रै बिग्रेको टिप्पणी गरे ।
लामिछानेको यो अभिव्यक्ति खेदजनक छ । यो स्वतन्त्र पत्रकारितामाथिकै ठाडो चुनौती हो । आफूअनुकूल समाचार नलेखेकै आधारमा उनले सञ्चार क्षेत्रमाथि आधारहीन लाञ्छाना लगाउनु कदापि स्वीकार्य हुँदैन । विगतमा सञ्चारकर्ममा हुँदा राजनीतिक नेतृत्वमाथि गाली बर्साउने उनी अहिले राजनीतिमा होमिएपछि मिडियामाथि गाली बर्साउन लागेका छन् । यो कति पनि शोभनीय र स्वीकार्य हुँदैन ।
सञ्चारमाध्यमले उनी गृहमन्त्री हुँदा स्वार्थ बाझिने मन्त्रालयको जिम्मेवारी लिएको उल्लेख गरी समाचार प्रकाशन गरेका थिए । उनले अमेरिकी नागरिकता त्यागेर पुनः नेपाली नागरिकता प्राप्त गर्ने प्रक्रिया पूरा नगरेको आरोपमाथि गृह प्रशासनबाटै छानबिन चलिरहेको अवस्थामा सोही मन्त्रालयको नेतृत्वमा जानु सरासर गलत थियो । जुन कुरा सर्वोच्च अदालतको फैसलाबाट पुष्टि भइसकेको छ । सञ्चारमाध्यमले तथ्यमाथि टेकेर लेखेको समाचारअनुसार नै अदालतको फैसला आएको छ ।
तथ्यमै आधारित रहेर समाचार प्रकाशन/प्रसारण गर्दा मिडियामाथि खनिनुले उनमा आलोचनालाई स्वीकार गर्ने सामथ्र्य नभएको प्रस्ट देखाउँछ । हिजो अरुलाई चर्को स्वरमा आलोचना गरेर मिडियामा स्थापित भएका उनी आफैं आलोचना सुन्न तयार नहुनुले उनको घमण्डीपन थप छर्लंग भएको छ । त्यसो त उनी सञ्चारकर्मी हुँदा पनि उत्तिकै विवादित बनेका पात्र हुन् । अनुमगनकारी संस्थासँगसमेत उनको टकराव परेको थियो । उनको आफूभन्दा कसैलाई नगन्ने प्रवृत्ति हिजो सञ्चारकर्ममा हुँदा थियो र राजनीतिमा आएपछि पनि त्यसैलाई निरन्तरता दिए ।
पुनः नागरिकता नलिएको प्रकरणमा सर्वोच्चबाट दोषी ठहर भई उपप्रधान तथा गृहमन्त्री, पार्टी सभापतिलगायत पद एकसाथ गुमाएका उनले सर्वोच्चको फैसलापछि पुनः नागरिकता लिने प्रक्रिया पूरा गरेका थिए । रविले नागरिकता लिने प्रक्रिया पूरा नगरेको विषय सबैजसो सञ्चारमाध्यमले प्राथमिकताका साथ उठाएका थिए । त्यस कारण पनि उनले सञ्चारमाध्यममाथि आक्रोश पोखेका हुन् ।
सञ्चारमाध्यममा प्रकाशित समाचारमा चित्त नबुझे खण्डन गर्न सकिन्छ । तर, उनी खण्डनभन्दा पनि प्रतिशोध साँध्नतिर लागे, जुन गलत छ । परम्परागत दल र तिनका नेताबाट परिवर्तन सम्भव नभएको भन्दै राजनीतिमा होमिएका उनको यो व्यवहार र हर्कत उनी स्वयंका लागि घातक हुने निश्चित छ ।
