काठमाडौं - वैदेशिक रोजगारीमा जाने श्रमिकहरूले अबदेखि विमानस्थलमा थप कागजात अनिवार्य रूपमा साथमा राख्नुपर्ने भएको छ। वैदेशिक रोजगार विभागले एक सूचना जारी गर्दै मिति २०८२ पुस २९ गतेदेखि लागू हुने गरी यस्तो व्यवस्था गरिएको जनाएको छ।
विभागका अनुसार, वैदेशिक रोजगारीका लागि प्रस्थान गर्ने सम्पूर्ण श्रमिकहरूले विमानस्थल जाँदा आवश्यक कागजातसँगै थप प्रमाणहरू पनि अनिवार्य रूपमा साथमा लिएर मात्र यात्रा गर्नुपर्नेछ। सूचनामा उल्लेख भएअनुसार, श्रमिकहरूले गन्तव्य मुलुकसम्मको हवाई टिकट तथा सो टिकटको बिल/रसिद अनिवार्य रूपमा साथमा राख्नुपर्नेछ। उक्त बिल वा रसिद संस्थागत वा व्यक्तिगत जुनसुकै भए पनि मान्य हुनेछ।
त्यसैगरी, म्यानपावर कम्पनी (इजाजतप्राप्त संस्था) मार्फत वैदेशिक रोजगारीमा जाने श्रमिकहरूले सम्बन्धित संस्थालाई बुझाएको सेवा शुल्क वापतको आधिकारिक रसिद पनि साथमा राख्नुपर्ने व्यवस्था गरिएको छ।विभागले सबै इजाजतप्राप्त संस्थाहरूलाई पनि श्रमिकबाट लिएको सेवा शुल्कको भौचर/रसिद अनिवार्य रूपमा उपलब्ध गराउन निर्देशन दिएको छ।
सरकारले पछिल्लो समय वैदेशिक रोजगारी क्षेत्रमा देखिएका अनियमितता नियन्त्रण गर्न तथा श्रमिकको हित संरक्षणका लागि यस्तो व्यवस्था लागू गरिएको जनाएको छ।
-1775543394.jpeg)
