काठमाडौं- वैदेशिक रोजगारीमा जाने श्रमिकले अब म्यानपावर कम्पनीलाई बुझाएको सेवा शुल्कको रसिद विमानस्थलमा देखाउनुपर्ने भएको छ । सरकारले श्रमिकबाट भइरहेको अवैध रकम अशुली रोक्न विमानस्थलमा रसिद जाँच गरिने भएको हो ।
वैदेशिक रोजगार विभागले सोमबार जारी गरेको सूचनामा यही चैत २९ गतेदेखि म्यानपावर कम्पनीलाई बुझाएको रकमको रसिद विमानस्थलमा अनिवार्य देखाउनुपर्ने व्यवस्था गरिएको उल्लेख गरिएको छ । विभागले विमानस्थल जाँदा त्यस्तो रसिद अनिवार्य राख्न भनेको छ ।
म्यानवापर कम्पनीलाई पनि श्रमिकबाट प्राप्त गरेको सेवा शुल्कबापतको भौचर या रसिद अनिवार्यरुपमा श्रमिकलाई उपलब्ध गराउन विभागले आग्रह गरेको छ । साथै, संस्थागत र व्यक्तिगत दुवै माध्यमबाट जाने श्रमिकले गन्तव्य मुलुकसम्मको हवाइ टिकट तथा सो टिकटको रसिद पनि विमानस्थल जाँदा साथमा राख्न भनेको छ ।
नयाँ सरकार गठनसँगै वैदेशिक रोजगारीमा ‘फ्रि-भिसा, फ्रि-टिकट’को प्रावधान कार्यान्वयन गराउन अग्रसर भएको छ । शनिबार श्रम, रोजगार तथा सामाजिक सुरक्षामन्त्री दीपककुमार साहले भिडियो सन्देश जारी गर्दै उक्त प्रावधान लागू भएका मुलुकहरुमा जाने कामदारसँग १० हजार रुपैयाँभन्दा बढी सेवा शुल्क लिएको पाए कारबाही गरिने बताएका थिए ।
२०७२ सालदेखि नै मलेसियासहित खाडी राष्ट्रहरुका लागि यस्तो प्रावधान लागू गरिएको भए पनि व्यवहारमा कार्यान्वयन भएको छैन । तत्कालीन श्रममन्त्री टेक बहादुर गुरुङले २०७२ जेठ २६ गतेदेखि कार्यान्वयनमा ल्याएको फ्रि भिसा, फ्रि टिकटको प्रावधानलाई वैदेशिक रोजगार व्यवसायीले अव्यावहारिक भन्दै नमानेको अवस्था थियो । उनीहरुले सेवा शुल्क बढाउन अघिल्ला सरकारहरुलाई दबाब दिँदै आएका थिए । तर बालेन्द्र शाह नेतृत्वको सरकारले श्रमिकमैत्री भनिएको सो प्रावधान कार्यान्वयनमा ल्याउन कडाइ गर्न थालेको हो ।
