- मध्यपूर्वका सात मुलुकका लागि खुलाइयो पुनः श्रम स्वीकृतिमध्यपूर्वका सात मुलुकका लागि खुलाइयो पुनः श्रम स्वीकृति
- साउदी अरेबिया, संयुक्त अरब इमिरेट्स (युएई), कतार, ओमान, यमन, जोर्डन र टर्कीको श्रम स्वीकृति नवीकरण हुने
- इरान, इजरायल, बहराइन, कुवेत, इराक र लेबनानका लागि भने पुनः श्रम स्वीकृति अझै स्थगनमै
काठमाडौं- सरकारले मध्यपूर्वका सात मुलुकका लागि पुनः श्रम स्वीकृति खुला गरेको छ । मध्यपूर्वमा जारी द्वन्द्वका कारण बन्द गरिएको पुनः श्रम स्वीकृति खुलाउने निर्णय गरिएको मंगलबार श्रम, रोजगार तथा सामाजिक सुरक्षा मन्त्रालयले जानकारी दिएको छ ।
यो निर्णयसँगै साउदी अरेबिया, संयुक्त अरब इमिरेट्स (युएई), कतार, ओमान, यमन, जोर्डन र टर्कीको श्रम स्वीकृति नवीकरण हुने भएको छ । इरान, इजरायल, बहराइन, कुवेत, इराक र लेबनानका लागि भने पुनः श्रम स्वीकृति अझै स्थगनमै राखिएको छ । मन्त्रालयले मंगलबार जारी गरेको विज्ञप्तिमा पुनः श्रम स्वीकृति खुलाउन चौतर्फी दबाब आएकाले उक्त निर्णय भएको जनाएको छ । सम्बन्धित देशका गैरआवासीय नेपाली संघ, दूतावासहरु तथा श्रम स्वीकृति समाप्त भएर पुनः नवीकरण गर्न नपाएका श्रमिकहरुले विभिन्न माध्यमबाट पुनः श्रम स्वीकृति खुलाउन माग गरेको विज्ञप्तिमा उल्लेख छ । साथै, मंगलबार नै परराष्ट्र मन्त्रालयले सो विषयको सम्बोधन गर्न सिफारिस गरेको र वैदेशिक रोजगार विभागलेसमेत पत्राचार गरेकाले खुलाउने निर्णय भएको मन्त्रालयले जनाएको छ ।
गत फागुन १६ गते शनिबारदेखि इजरायल-अमेरिका र इरानबीच युद्ध सुरु भएको थियो । श्रम मन्त्रालयले फागुन १७ गते सुरक्षा संवेदनशीलताका कारण भन्दै मध्यपूर्वका १२ मुलुकमा व्यक्तिगत र संस्थागत श्रम स्वीकृति दिने कार्य स्थगन गरेको थियो । मध्यपूर्व नेपालीहरुको प्रमुख श्रम गन्तव्य हो । हाल त्यस क्षेत्रमा १७ लाख २९ हजारभन्दा बढी नेपाली कार्यरत रहेको परराष्ट्रको तथ्यांक छ । जसमध्ये युएईमा सबैभन्दा धेरै सात लाख नेपाली छन् । त्यस्तै, साउदीमा तीन लाख ८४ हजार, कतारमा तीन लाख ५७ हजार, कुवेतमा एक लाख ७५ हजार, ओमानमा २५ हजार, बहराइनमा २८ हजार, इराकमा ३० हजार, साइप्रसमा १७ हजार, इजरायलमा छ हजार ५००, लेबनानमा एक हजार ५००, इजिप्टमा ५०० तथा इरानमा छ जना छन् ।
अघिल्लो आर्थिक वर्षको तथ्यांक हेर्दा तीन लाख ३३ हजार ३०९ जना श्रम स्वीकृति नवीकरण गरेर रोजगारीमा गएका थिए । जसअनुसार दैनिक औसतमा ९१३ जना गएको देखिन्छ । यसरी दैनिक ६०० भन्दा बढी पुनः श्रम स्वीकृति लिएर मध्यपूर्वका देशहरुमा जाने गरेका छन् । श्रम स्वीकृति रोकिएको १८ दिनभन्दा बढी भइसक्दा मध्यपूर्वबाट छुट्टीमा आएका करिब १० हजार श्रमिक जान नपाएको देखिएको छ ।
सरकारले मध्यपूर्वको सुरक्षा अवस्था केही सामान्य भएको तथा बढी नेपाली कार्यरत क्षेत्रमा श्रम स्वीकृति नवीकरण खुलाएको बुझिएको छ । साथै, सम्बन्धित मुलुकका दूतावास तथा गैरआवासीय संघले नै आग्रह गर्नुले उक्त मुलुकमा श्रमिकको अवस्था जोखिमपूर्ण नरहेको अनुमान गर्न सकिन्छ ।
केही मुलुकको श्रम स्वीकृति नवीकरण खुलेसँगै चरणबद्धरुपमा मध्यपूर्वको रोजगारी खुल्ने अनुमानसमेत गरिएको छ । सोमबार अमेरिकी राष्ट्रपति डोनाल्ड ट्रम्पले यही हप्ताभित्र नभए पनि चाँडै युद्ध रोकिने दाबी गरेका छन् । यद्यपि, मध्यपूर्वमा इरानको मिसाइल तथा ड्रोन आक्रमण रोकिएको छैन ।
