काठमाडौं- चालु आर्थिक वर्षको आठ महिनामा पाँच लाखभन्दा बढी युवा रोजगारीको खोजीमा विभिन्न मुलुकतर्फ लागेका छन् । वैदेशिक रोजगार विभागले सार्वजनिक गरेको चालु आर्थिक वर्षको साउनदेखि फागुन मसान्तसम्मको तथ्यांकअनुसार उक्त अवधिमा पाँच लाख ३१ हजार १२० जना श्रम स्वीकृति लिएर विदेश लागेका हुन् । यो संख्या संस्थागत तथा व्यक्तिगत श्रम स्वीकृति लिने र श्रम स्वीकृति नवीकरण गरेर जानेहरुको हो ।
गत फागुन महिनामा रोजगारीमा जानेको संख्या भने घटेको छ । उक्त महिनामा ५२ हजार ९४४ जनाले मात्र श्रम स्वीृकति लिएका छन् । जसमा ४६ हजार ४५२ जना पुरुष र छ हजार ४९२ जना महिला छन् । अघिल्लो महिना माघसम्म मासिक औसत ६८ हजार ३११ जना रोजगारीमा गएका थिए । फागुन १६ गतेदेखि पश्चिम एसियामा द्वन्द्व चर्किंदा सो क्षेत्रको रोजगारी बन्द भएको छ । द्वन्द्वले आवागमन बन्द हुँदा रोजगारीमा जानेहरुको संख्या घटेको छ ।
नेपालीहरुको प्रमुख गन्तव्य रहेको क्षेत्रमा युद्धको असर पर्दा श्रम स्वीकृति दिन सरकारले बन्द गरेको छ । जसकारण रोजगारीमा जानेको संख्या फागुनमा घटेको हो । फागुनमा पहिलोचोटि रोजगार गर्न जानेहरुको संख्यामा विगतका महिनाभन्दा कमी आएको छ । फागुनमा २८ हजार ३८३ जना पहिलोपटक विदेसिएको तथ्यांक छ, जसमा २४ हजार १२९ जना पुरुष र चार हजार २५४ जना महिला छन् । संस्थागत माध्यमबाट २० हजार १३० जना जाँदा १७ हजार १६६ जना पुरुष र दुई हजार ४६९ जना महिला छन् ।
विभागका अनुसार उक्त महिना व्यक्तिगत श्रम स्वीकृति लिएर सात हजार ६४५ जना विदेसिएका छन् । यसरी जानेहरुमा पाँच हजार ९८६ जना पुरुष र एक हजार ६५९ जना महिला छन् । त्यस्तै, जिटुजीमार्फत जम्मा ५७४ जना जाँदा ४४० जना दक्षिण कोरिया र १३४ जना इजरायल गएको तथ्यांक छ । फागुनमा युवाहरु रोजगारीको सिलसिलामा १०४ वटा मुलुक पुगेका छन् । उनीहरु म्यानपावरबाट १४ र व्यक्तिगत श्रम स्वीकृतिमा ९० वटा मुलुकमा गएका छन् ।
मलेसिया प्रमुख गन्तव्य
पश्चिम एसिया द्वन्द्वग्रस्त बन्दा गत फागुनमा मलेसिया प्रमुख गन्तव्य बनेको छ । उक्त मुलुकमा सबैभन्दा धेरै १२ हजार ६०४ जना रोजगारीका लागि गएका छन् । लामो समयदेखि पहिलो गन्तव्य बन्दै आएको संयुक्त अरब इमिरेट्स (युएई) भने दोस्रोमा झरेको छ । युएईमा ११ हजार ४९२ जना गएका छन् । त्यसपछि, कतारमा छ हजार ७५७ जना, साउदी अरबमा छ हजार २२५ र रोमानियामा तीन हजार २६८ जना पुगेका छन् । यो फागुन महिनाको तथ्यांक हो ।
उक्त महिना महिलाहरुका लागि भने युएई नै पहिलो गन्तव्य बनेको छ । सो महिना एक हजार ६५२ जना महिला युएई गएका छन् । यद्यपि, विगतमा प्रत्येक महिना औसतमा दुई हजार ५०० को हाराहारीमा महिलाहरु युएई जाने गर्थे । त्यसपछि मलेसियामा ७५४, साइप्रसमा ६२०, कतारमा ५९९ र कुवेतमा ५०० जना गएका छन् ।
जिल्लागत तथ्यांक हेर्दा रोजगारीमा जाने सबैभन्दा धेरै धनुषाबाट दुई हजार ४७९ जना छन् । उक्त जिल्लाबाट दुई हजार ४४९ जना पुरुष विदेसिदा महिला भने ३० जनामात्र छन् । त्यसपछि, झापाबाट दुई हजार ३६५, मोरङबाट दुई हजार १४०, सिरहाबाट एक हजार ८४५ र महोत्तरीबाट एक हजार ७९१ जना रोजगारीका लागि विदेश लागेका छन् । सबैभन्दा कम मनाङबाट नौ जना पुरुष र दुई जना महिला गरी ११ जना परदेसिएका छन् ।
उक्त एक महिनामा सबैभन्दा बढी ३१ हजार २२३ जना दक्ष श्रमिक रोजगारीमा गएका छन् । दक्ष श्रमिकमध्ये २७ हजार २८१ जना पुरुष र तीन हजार ९४२ जना महिला छन् । त्यसपछि १३ हजार ५५४ जना अदक्ष कामदार विदेसिदा ११ हजार ६९४ जना पुरुष र एक हजार ८६० जना महिला छन् । त्यस्तै अर्धदक्ष ९३८, व्यावसायिक १७९ र उच्च दक्ष ५० जना कामदार रोजगारीमा गएका छन् ।
