- गत आवको सात महिनामा ७.५ प्रतिशतले बढेको रेमिट्यान्स चालु आवको सोही अवधिमा ३९.८ प्रतिशतले बढ्यो
- माघमामात्रै एक खर्ब ९८ अर्ब आठ करोड रुपैयाँ भित्रिएको तथ्यांक
- वैदेशिक रोजगारीमा जानेको संख्या बढ्दा रेमिट्यान्समा वृद्धि निरन्तर
काठमाडौं- चालु आर्थिक वर्ष २०८२/८३ को सात महिनामै मुलुकमा साढे १२ खर्बभन्दा बढी विप्रेषण (रेमिट्यान्स) भित्रिएको छ । नेपाल राष्ट्र बैंकले बुधबार सार्वजनिक गरेको विवरणअनुसार गत साउनदेखि माघ महिनासम्म १२ खर्ब ६१ अर्ब एक करोड रुपैयाँ रेमिट्यान्स भित्रिएको हो ।
क्त अवधिमा नेपाल भित्रिने रेमिट्यान्स ३९.८ प्रतिशतले बढेको राष्ट्र बैंकले जनाएको छ । जबकि अघिल्लो आथिक वर्षको सोही अवधिमा विप्रेषण आप्रवाह ७.५ प्रतिशतले बढेको थियो । यो तथ्यांकले चालु आर्थिक वर्षको रेमिट्यान्स वृद्धिदर निकै उच्च देखिएको छ ।
राष्ट्र बैंकका अनुसार पछिल्लो महिना माघमामात्रै एक खर्ब ९८ अर्ब आठ करोड रुपैयाँ रेमिट्यान्समार्फत मुलुकमा आएको छ । अघिल्लो वर्षको सोही अवधिमा एक खर्ब ३७ अर्ब ५० करोड रुपैयाँ भित्रिएको तथ्यांक छ । जसअनुसार अघिल्लो आवको सात महिनाको तुलनामा चालु आवको सात महिनामा ६० अर्ब ५८ करोड रुपैयाँ बढी रेमिट्यान्स आएको छ ।
गत माघ महिनामा भित्रिएको रेमिट्यान्स चालु आवको एकै महिनामा भित्रिएको दोस्रो बढी रकम हो । गत असोजमा सबैभन्दा बढी दुई खर्ब रुपैयाँभन्दा बढी रकम आएको थियो । पुस महिनामा एक खर्ब ९२ अर्ब ६२ करोड रुपैयाँ भित्रिएको थियो ।
मुलुकको अर्थतन्त्रमा करिब ३० प्रतिशत योगदान रहेको रेमिट्यान्स बढ्नुको कारण वैदेशिक रोजगारीमा जानेको संख्या बढ्नु नै प्रमुख देखिन्छ । वैदेशिक रोजगार विभागको तथ्यांकअनुसार चालु आवको सात महिनामा गत आवको सोही अवधिको तुलनामा सात हजार ६९ जना बढी वैदेशिक रोजगारीमा गएका छन् ।
समीक्षा अवधिमा वैदेशिक रोजगारीमा जान श्रम स्वीकृति लिनेको संख्या चार लाख ७२ हजार ५७७ पुगेको विभागको तथ्यांकमा उल्लेख छ । अघिल्लो आवको सोही अवधिमा चार लाख ६५ हजार ५०८ जना रोजगारीका लागि विभिन्न मुलुक पुगेका थिए । यो संख्या नयाँ श्रम स्वीकृति, पुनः श्रम स्वीकृति र व्यक्तिगत श्रम स्वीकृति लिनेहरुको हो ।
समीक्षा अवधिमा अमेरिकी डलरमा विप्रेषण आप्रवाह ३३.० प्रतिशतले बढेर आठ अर्ब ८६ करोड रुपैयाँ पुगेको प्रतिवेदनमा उल्लेख छ । अघिल्लो वर्ष यस्तो आप्रवाह ५.५ प्रतिशतले बढेको थियो ।
