- जायद अन्तर्राष्ट्रिय विमानस्थलमा ड्रोन निष्क्रिय पार्दा गोरखाको भीनसेन थापा गाउँपालिका-७ ठाटीबजारका दिवस श्रेष्ठको मृत्यु
- शनिबार दिवसले फेसबुकमा लेखेको स्टाटस नै बन्यो अन्तिम सन्देश
- छुट्टीमा आएर बिहे गर्ने भनेका दिवसको सपना अधुरै
- इजरायल गएका ११ नेपाली विद्यार्थी मारिएको दुई वर्ष नबित्दै नेपालीलाई दुःखी तुल्याउने दिवसको मृत्यु खबर
- मध्यपूर्वका विभिन्न देशमा कार्यरत करिब १७ लाख नेपालीको सुरक्षा चिन्ता
हामी हरदम तपाईंहरुको साथमा छौं । नेपाली जहाँ रहे पनि प्रत्येक नागरिकको व्यक्तिगत सुरक्षा र हितको रक्षामा सरकार प्रतिबद्ध छ ।
सुशीला कार्की
प्रधानमन्त्री
काठमाडौं- मध्यपूर्वमा द्वन्द्व चर्किंदै जाँदा युएईको आबुधाबीस्थित जायद अन्तर्राष्ट्रिय विमानस्थलमा दिवस श्रेष्ठ ड्युटीमा थिए । २९ वर्षीय दिवस सेक्युरिटी गार्ड थिए । उनको घर गोरखाको भीमसेन थापा गाउँपालिका-७ को ठाटीबजार हो ।
समाचार विवरणहरूमा शनिबार अमेरिका-इजरायलको संयुक्त आक्रमणपछि इरानले आबुधाबीसहित खाडी राष्ट्रहरूमा रहेका अमेरिकी सैन्य आधार शिविरहरूमा प्रत्याक्रमण गर्ने विवरण थियो । आबुधाबीमा आक्रमण थालेको भनिएको थियो । त्यहीँ रहेका दिवसले यस्तो समाचारको खण्डन गरे र फेसबुकमा लेखे, ‘समाचार हेरेपछि मेरो ध्यानाकर्षण भयो । अबुधाबीको बासिन्दाका हिसाबले यहाँको अवस्था के छ मलाई थाहा छ । केही रिपोर्टहरू बढाइचढाइ भएर आएका छन् ।’
दिवसको त्यो स्टाटसमा आश्वस्त स्वर थियो । त्रास कम गर्ने प्रयास थियो । तर, नियतिले ठीक उल्टो निर्णय सुनायो । त्यही स्टाटस उनको जीवनको अन्तिम सन्देश बन्यो । इरानले गरेको ड्रोन आक्रमणमा परी संयुक्त अरब इमिरेट्सको राजधानी अबुधाबीस्थित जायद अन्तर्राष्ट्रिय विमानस्थलमा ड्युटी गरिरहेका दिवसले ज्यान गुमाए । विदेशी भूमिमा उनी कहिल्यै नफर्किने गरी अस्ताए ।
सामान्य परिवारमा जन्मिएका दिवसले काठमाडौंमा ओभरसियर अध्ययन गरेका थिए । घरको आर्थिक अवस्था मध्यम थियो । भविष्यलाई उज्ज्वल बनाउन विदेश गएका थिए । बुबा चामबहादुरकाअनुसार दिवस मिहेनती थिए । उनी तीन वर्षअघि वैदेशिक रोजगारीका लागि युएई पुगेका हुन् । अबुधाबीको व्यस्त जीवन, विमानस्थलको सुरक्षा जिम्मेवारी र दिनरातको ड्युटी नै उनको दैनिकी थियो ।
गत असोजमा बिदामा घर फर्किएका दिवसले परिवारसँगै दसैं-तिहार मनाए । गाउँका साथीभाइसँग भेटघाट गरे । चामबहादुर भन्छन्, ‘अर्को छुट्टीमा आउँदा बिहे गर्छु भन्थे । खै के भयो भयो ।’ दिवस चामबहादुर दम्पतीका एक्ला छोरा हुन् । चामबहादुरसँग उनको कुराकानी शनिबार साँझ भएको थियो । त्यसबेला दिवसले भनेको सम्झिँदै भन्छन्, ‘सबै ठीक छ यहाँ । आत्तिनुपर्दैन ।’
तर, आइतबार बिहानदेखि दिवसको फोन उठेन । सोमबार भने दिवसको मृत्यु भएको खबर थाहा पाउँदा होस् उडेजस्तो भएको चामबहादुरले बताए । अबुधाबीस्थित नेपाली दूतावासका अनुसार दिवसको मृत्यु जायद अन्तर्राष्ट्रिय विमानस्थलमा ड्रोन निष्क्रिय पार्ने क्रममा भएको हो । दूतावासले युएई सरकारसँग समन्वय गरी शव नेपाल ल्याउने प्रक्रिया अघि बढाएको जनाएको छ ।
दूतावासको यो खबरले गोरखाको ठाटीबजारमात्रै होइन, सिंगो नेपाली समुदायलाई स्तब्ध तुल्याएको छ । संयुक्त अरब इमिरेट्ससहित मध्यपूर्वका विभिन्न देशमा लाखौं नेपाली कार्यरत छन् । त्यहाँको युद्ध, राजनीतिक तनाव वा आतंककारी गतिविधिसँग नेपालीहरूको प्रत्यक्ष सरोकार नभए पनि उनीहरू जोखिमको घेरामा पर्छन् ।
यसअघि २० असोज २०८० मा इजरायलमा प्यालेस्टाइनी सशस्त्र समूह हमासको आक्रमणमा १० जना नेपाली विद्यार्थीको मृत्यु भएको थियो । कैलालीका नारायणप्रसाद न्यौपाने, गणेशकुमार नेपाली, आशिष चौधरी, दार्चुलाका दीपेशराज विष्ट, धनुषाका आनन्द साह, सुनसरीका राजेशकुमार स्वर्णकार, डोटीका राजन फुलारा र पदम थापा, सल्यानका प्रवेश भण्डारी तथा दार्चुलाका लोकेन्द्रसिंह धामीको मृत्यु भएको थियो । हमास समूहले त्यही दिन नियन्त्रणमा लिएर लगेका विपीन जोशीको गत असोज अन्तिम साता मृत्यु भएको खबर आएको थियो । जोशीसँगै ११ नेपाली विद्यार्थीले ज्यान गुमाए । चार नेपाली घाइते भएका थिए ।
यतिबेला भने मध्यपूर्वी देशहरूमा द्वन्द्व थप चर्किएसँगै नेपालीको सुरक्षालाई लिएर झनै चिन्ता बढेको छ । सोमबार प्रधानमन्त्री सुशीला कार्कीले राष्ट्रका नाममा सम्बोधन गर्दै सरकार नागरिकको सुरक्षाप्रति कटिबद्ध रहेको बताएकी छन् । ‘नेपाली जहाँ रहे पनि प्रत्येक नागरिकको व्यक्तिगत सुरक्षा र हितको रक्षामा सरकार प्रतिबद्ध छ,’ मध्यपूर्वका देशहरूमा रहेका नेपालीहरूप्रति ढाडस दिँदै उनले भनिन् ।
खाडी मुलुकहरूमा रहेका सबै नेपाली नियोगहरूलाई सुरक्षा सहजीकरणमा कुनै कमी हुन नदिन सक्रिय बनाइएको र परराष्ट्र मन्त्रालयले सघन अनुगमन गरिरहेको प्रधानमन्त्री कार्कीले बताइन् । अमेरिका र इजरायलले इरानमाथि शनिबार संयुक्त आक्रमण गरेर त्यहाँका सर्वोच्च नेता आयतोल्लाह अलि खामेनीसहित थुप्रै वरिष्ठ राजनीतिक र सैन्य अधिकारीहरू मारेपछि मध्यपूर्वमा तनाव झनै गहिरिएको छ ।
परराष्ट्र मन्त्रालयका अनुसार मध्यपूर्वका १६ मध्ये १३ देशमा करिब १७ लाख २९ हजारभन्दा बढी नेपाली कार्यरत छन् । इजरायलमा करिब छ हजार ५०० र इरानमा छ जना नेपाली रहेको जानकारी दिइएको छ । युएईमामात्र करिब सात लाख नेपाली छन् । साउदी अरेबियामा तीन लाख ८४ हजारभन्दा बढी, कतारमा तीन लाख ५७ हजारभन्दा बढी, कुवेतमा एक लाख ७५ हजार, ओमानमा २५ हजार, बहराइनमा २८ हजार, इराकमा ३० हजार, जोर्डनमा तीन हजार र लेबनानमा एक हजार ५०० नेपाली रहेका परराष्ट्र मन्त्रालयको तथ्यांक छ ।
सम्भावित जोखिमलाई मध्यनजर गर्दै सरकारले अनलाइन रजिस्ट्रेसन प्लेटफर्म र कन्सुलर एप्स सञ्चालनको तयारी थालेको छ । परराष्ट्रसचिव अमृतबहादुर राईको नेतृत्वमा गृह र श्रम मन्त्रालयसहित बहुपक्षीय आपतकालीन उद्धार संयन्त्र गठन गर्ने तयारी भइरहेको छ ।
यसबीच श्रम, रोजगार तथा सामाजिक सुरक्षा मन्त्रालयले साउदी अरेबिया, युएई, कतार, कुवेत, बहराइन, ओमान, इराक, यमन, जोर्डन, लेबनान, टर्की र इजरायल गरी १२ देशका लागि श्रम स्वीकृति दिने कार्य स्थगित गरेको छ । यससँगै दैनिक करिब १५ सय नेपाली वैदेशिक रोजगारीका लागि बाहिरिने क्रम प्रभावित भएको छ । विश्वराजनीति र सैन्य टकरावको केन्द्र बनेको मध्यपूर्वको संकटले हजारौं नेपाली परिवारलाई अनिश्चितता र त्रासमा धकेलेको छ ।
शोकमा डुब्यो बोर्लाङ ठाँटी
गोरखा- घरको आर्थिक अवस्था सुधार्न चार वर्षअघि संयुक्त अरब इमिरेट्स (युएई)को दुबई पुगेका थिए दिवस श्रेष्ठ । भीमसेन थापा गाउँपालिका-७ बोर्लाङ ठाँटीका २९ वर्षीय दिवस चामबहादुर र पवित्राको एकमात्र छोरा हुन् । दिवस गत वर्षको दसैंमा घर आएका थिए ।
गाउँकै सरस्वती माध्यमिक विद्यालयबाट एसइई उत्तीर्ण गरेका श्रेष्ठले काठमाडौंबाट ‘ओभरसियर’को अध्ययन पूरा गरेका थिए । देशमै रोजगारी नपाएपछि विदेसिनुएका उनले आगामी दसैंमा भने घर फर्केर विवाह गर्ने योजना सुनाएका थिए । श्रेष्ठ दम्पतीको पनि बुहारी भित्र्याउने सपना थियो । तर त्यो सपना सदाका लागि अधुरोमात्रै भएन छोरा नै गुमाएपछि अहिले निशब्द छन् उनीहरु ।
अघिल्लो दिन अर्थात् शनिबार साँझसम्म ‘भिडियो कल’ मा कुराकानी गरेको छोरा भोलिपल्टै सदाका लागि अस्ताउँलान् भन्ने बुबाआमालाई थाहा हुने कुरै भएन । तर आइतबार युएईमा इरानको ड्रोन आक्रमणमा परी श्रेष्ठको निधन भयो ।
मृतक दिवसका काका प्रदीप श्रेष्ठका अनुसार दिवस मिडल इस्ट कम्पनीमार्फत सेक्युरिटी गार्डका रुपमा दुबई पुगेका थिए । ‘अस्तिको दिन बेलुकीमात्र घरपरिवारसँग भिडियोमा कुराकानी भएको रहेछ । त्यहाँको अवस्था सामान्य भए पनि आकाशमा मिसाइल पड्किरहेको छ भनेर बुबालाई भनेको थियो रे,’ काका प्रदीपले भने, ‘त्यसपछि फोन सम्पर्क नभएको रहेछ । उसका साथीभाइसँग बुझ्दा भागदौड भएर मोबाइल हराएको र खुट्टामा चोट लागेको भन्ने खबर पाएका रहेछन् ।’
युएईस्थित नेपाली दूतावासबाट सोमबारमात्रै छोराको मृत्यु भएको खबर औपचारिकरुपमा उनीहरुले प्राप्त गरे । दिवसको मृत्युको खबरले अहिले ठाँटी गाउँ शोकमा डुबेको छ । प्रदीप भन्छन्, ‘गाउँको युवा, सबैसँग मिल्ने, अत्यन्त इमान्दार, मिजासिलो थियो । उसको आमाबुबाको कोखै रित्तियो ।’
हाल गाउँमा बुबा चामबहादुर र दिवसका हजुरआमा छन् । आमा पवित्रा भने छोरी भेट्न काठमाडौं गएको बोर्लाङका वडाध्यक्ष नारायण श्रेष्ठले बताए । ‘घरमा बेहाल छ । आमा र दिदी पनि यतै आउने कि बाबुको शव लिएर आउने भन्ने सल्लाह हुँदै छ । उताबाट शव कहिले आउँछ त्यसको पनि ठेगान छैन,’ उनले भने ।
अबुधाबीस्थित नेपाली राजदूतावासले सोमबार एक सूचना जारी गर्दै अबुधाबीस्थित जायद अन्तर्राष्ट्रिय विमानस्थलमा ड्रोन निष्क्रिय पार्ने क्रममा भएको घटनामा गोरखाका २९ वर्षीय दिवस श्रेष्ठको मृत्यु भएको पुष्टि गरेको हो । उनको मृत्युबारे युएईको परराष्ट्र मन्त्रालयबाट आधिकारिक जानकारी प्राप्त भएको राजदूतावासले जनाएको छ । रा
