काठमाडौं- चालु आर्थिक वर्षको सात महिनामा साढे चार लाखभन्दा बढी युवा रोजगारीका लागि विदेसिएका छन् । वैदेशिक रोजगार विभागको तथ्यांकअनुसार गत साउनदेखि माघसम्मको अवधिमा चार लाख ७८ हजार १७६ जना रोजगारीको खोजीमा विभिन्न मुलुक पुगेका हुन् । यो संख्या व्यक्तिगत, संस्थागत र पुनः श्रम स्वीकृति लिएर गएकाहरुको हो ।
अघिल्लो आर्थिक वर्षको तुलनामा चालु आवमा रोजगारीमा जानेहरु १२ हजार ६६८ जनाले बढे छन् । गत आव २०८१/८२ को यसै अवधिमा चार लाख ६५ हजार ५०८ जना रोजगारीमा गएका थिए । विभागका अनुसार पछिल्लो महिना माघमामात्रै ७० हजार ५०३ जनाले मुलुक छोडेका छन् । जसमा ६२ हजार १६२ जना पुरुष र आठ हजार ३४१ जना महिला छन् । उक्त महिना २६ हजार ८०७ जना म्यानपावर कम्पनीमार्फत रोजगारीमा गएका तथ्यांकमा देखिन्छ । यसरी जानेमा २४ हजार २८१ जना पुरुष र दुई हजार ५२६ जना महिला रहेका छन् ।
त्यस्तै व्यक्तिगत श्रम स्वीकृति लिएर १० हजार ३६० जना गएका छन् । यसरी जानेमा आठ हजार ४० जना पुरुष र दुई हजार ३२० जना महिला छन् । उक्त महिनामा ३२ हजार ६९१ जना पुनः श्रम स्वीकृति लिएर गएको तथ्यांक छ । पुनः श्रम स्वीकृति लिनेमा २९ हजार २८८ जना पुरुष र ३२ हजार ६९१ महिला छन् । माघमा ३७ हजार ८१२ जना पहिलोपटक रोजगारीमा गएका छन् । ३२ हजार ८७४ जना पुरुष र चार हजार ९३८ जना महिला रोजगारीका लागि पहिलोपटक विदेश यात्रामा निस्किएका हुन् । यस्तै जिटुजी प्रणालीमार्फत ५७९ जनाले रोजगारीको अवसर पाएका छन् । जसमा ५२२ जना दक्षिण कोरिया र ५७ जना इजरायल गएका विभागको तथ्यांकमा उल्लेख छ ।
माघमा युवाहरु रोजगारीको खोजीमा १०७ वटा मुलुकमा गएका छन् । उनीहरु संस्थागत माध्यमबाट १३ वटा मुलुक जाँदा व्यक्तिगत श्रम स्वीकृतिमा ९१ वटा मुलुक पुगेका छन् । विभागका अनुसार २५ वटा मुलुकमामात्र १०० जनाभन्दा बढी श्रमिक गएका छन् । २१ वटा मुलुकमा एक जना कामदारमात्र गएको तथ्यांक छ ।
लयमा युएई रोजगारी
नेपालीहरुको प्रमुख रोजगार गन्तव्य संयुक्त अरब इमिरेट्स (युएई) जेन–जी आन्दोलनपछि सातौं स्थानसम्म पुगेको थियो । गत पुसमासमेत युएई तेस्रो प्रमुख गन्तव्य थियो । माघबाट भने युएईको रोजगारीले पुरानै लय समात्न थालेको छ । सो महिनामा सबैभन्दा बढी १५ हजार १३७ जना युएई गएका छन् । यद्यपि, भदौअघिको तथ्यांक हेर्दा प्रत्येक महिना २० देखि २५ हजार युवा उक्त मुलुक जाने गरेका थिए । जेन-जी आन्दोलनपछि सुरक्षा चुनौतीका कारण युएई रोजगारी केही समय बन्द भएको थियो ।
माघमा युएईपछि धेरै युवा साउदी अरब गएका छन् । साउदीमा ११ हजार ५९२ जना गएको विभागको तथ्यांक छ । त्यसपछि कतारमा ११ हजार ५८०, मलेसियामा १० हजार ३४१ र कुवेतमा पाँच हजार ४४३ जना गएका छन् । जिल्लागत तथ्यांकअनुसार सबैभन्दा धेरै झापाबाट तीन हजार १२८, धनुषाबाट तीन हजार ११६, मोरङबाट दुई हजार ९७९, सिरहाबाट दुई हजार ५१३ र महोत्तरीबाट दुई हजार १६० जना रोजगारीमा गएका छन् । सबैभन्दा कम भने मनाङबाट १९, मुस्ताङबाट २१, हुम्लाबाट ५१, डोल्पाबाट ७० र मुगुबाट ८८ जना गएका छन् ।
माघमा रोजगारीमा गएकाहरुमध्ये सबैभन्दा धेरै ४१ हजार ४९५ जना सीपयुक्त कामदार रहेका छन् । अदक्ष कामदार १७ हजार ७३१ जना गएका छन् । त्यस्तै, अर्धदक्ष कामदार १० हजार ८६८, व्यावसायिक ३१९ र उच्च दक्ष ९० जना कामदार विदेसिएका छन् ।
