- आवेदन स्वीकृत भएकामध्येबाट दुई हजार ११२ जना चिट्ठामार्फत छनोट भएकामा ६० प्रतिशतभन्दा बढी इजरायल पुगे
- इजरायल गएकामध्ये ७७० जना महिला र ५४३ पुरुष
काठमाडौं- गत एक वर्षको अवधिमा एक हजार ३१३ जनाले इजरायलमा रोजगारीको अवसर पाएका छन् । त्यहाँको दीर्घकालीन स्याहार केन्द्रमा सहायक कामदार (केयरगिभर)का रुपमा जानका लागि छनोट भएकामध्ये उक्त अवधिमा ६० प्रतिशतभन्दा बढी कामदार गएका वैदेशिक रोजगार विभागअन्तर्गतको इजरायल शाखाले जानकारी दिएको छ ।
रोजगारीका लागि आवेदन स्वीकृत भएकामध्येबाट दुई हजार ११२ जना चिट्ठाबाट इजरायल जानका लागि छनोट भएका थिए । उनीहरूको करार सम्झौता २०२५ जनवरी २८ बाट आउन थालेको थियो । त्यसयता हालसम्म इजरायल गएकामध्ये ७७० जना महिला र ५४३ पुरुष रहेको जनाइएको छ । अब ७९९ जना जान बाँकी रहेका छन् । उनीहरूको पनि दैनिकजसो करार सम्झौता आइरहेको विभागले जनाएको छ ।
बाँकी कामदारलाई कहिलेसम्म लगिसक्ने भन्ने यकीन नभएको सो शाखाका शाखा अधिकृत देवेन्द्र केसीले बताए । ‘कन्ट्र्याक्ट (सम्झौता) आइसकेपछि हामीले पिवालाई पठाइदिन्छौं । पिवाले विभिन्न रोजगारदातालाई सो कन्ट्र्याक्ट पठाइदिन्छ,’ उनले भने, ‘रोजगारदाताले जति चाँडो रेस्पोन्स गरेर प्रक्रिया थाल्छ त्यहीअनुसार कामदार जान्छन् । यो उनीहरूकै आवश्यकताअनुसार हुन्छ ।’
इजरायलको पपुलेसन इमिग्रेसन एण्ड बोर्डर अथोरिटी (पिवा)ले नागरिक तथा विदेशीहरूको कानुनी स्थिति नियमन गर्ने आप्रवासी कामदारको रोजगारीसम्बन्धी कानुन लागू गर्नेलगायतका काम गर्छ । विभागले २०८१ असार ११ गते केयरगिभरका लागि आवेदन आह्वान गरेको थियो । जसका लागि चार हजार २४ जनाले अनलाइन फाराम भरेका थिए । तीमध्ये तीन हजार ४६१ वटा आवेदन स्वीकृत भएका थिए । आवेदन स्वीकृत भएकाबाट छानिएका दुई हजार १२१ जनाबाट एक हजारको मेडिकल गर्दा ९२३ जना सफल भए । त्यसैमध्येबाट चार जना पूर्वप्रस्थान अभिमुखीकरण तालिममा अनुपस्थित भएकाले पहिलो चरणमा ९१९ जना छनोटका लागि तयार भएका थिए । उक्त लटका सबै जना गइसकेका छन् ।
आवेदन स्वीकृत भएका तर चिट्ठाबाट छनोट नभएकालाई पनि विगतमा रोजगारीको अवसर दिने गरिन्थ्यो । यसपटक भने उनीहरूलाई के गर्ने भनेर कुनै जानकारी प्राप्त नभएको केसीले बताए । ‘विभिन्न समयमा कुरा उठिरहेको पनि हो । श्रम मन्त्रालयले कूटनीतिक हिसाबले कुरा राखिदिनू भनेर परराष्ट्रलाई पत्राचार गरेको थियो,’ उनले भने, ‘परराष्ट्रले आफ्नो हिसाबले केही गर्दै होला सायद । विभागमा केही जानकारी आएको छैन ।’
इजरायलले नेपालसहित भारत, फिलिपिन्स, थाइल्याण्ड, नाइजेरियालगायतका मुलुकबाट कामदार लग्दै आएको छ । आर्थिक वर्ष २०८१÷८२ मा जिटुजी प्रणालीमार्फत ६३९ जना इजरायल गएका थिए । त्यसैगरी, संस्थागत माध्यमबाट १४९ र पुनः श्रम स्वीकृति लिएर ५५४ जना गरी एक हजार ३४२ जना गएका थिए । जसमध्ये ८१६ जना महिला र ५२६ जना पुरुष छन् । हाल त्यहाँ पाँच हजारभन्दा बढी नेपाली कार्यरत रहेको बताइन्छ ।
इजरायलले बच्चा, वृद्धवृद्धा तथा गम्भीर अपांगता भएकाहरूको स्याहारका लागि नेपालबाट जिटुजी प्रक्रियाबाट केयरगिभर लग्दै आएको छ । त्यहाँ जाने कामदारले प्रत्येक दिन सात घण्टाका दरले हप्ताको छ दिन काम गर्नुपर्छ । अतिरिक्त काम गरे छुट्टै पारिश्रमिक पाइन्छ । इजरायलमा प्रतिमहिना एक जना श्रमिकले पाँच हजार ८८० इजरायली सेकेल अर्थात् दुई लाख रुपैयाँभन्दा बढी कमाउने गरेका छन् ।
