- संशोधित आप्रवासन नीति अन्तर्गत अधिकांश विदेशी नागरिकले देशमा काम सुरु गर्नुअघि रोजगारीको लागि अस्थायी बसाइँ अनुमतिपत्र लिनु पर्ने हुन्छ
- लिथुआनियाको रोजगार सेवाको तथ्यांकअनुसार सन् २०२६ का लागि करिब ११० पेसामा उच्च माग भएका कामको रूपमा वर्गीकृत गरिएको जनाइएको छ
- लिथुआनियामा गत आर्थिक वर्ष २०८१/८२मा १३४ जना नेपाली गएका थिए भने २०८०/८१मा १५३ जना नेपाली पुगेका थिए
काठमाडौं- लिथुआनियाले २०२६देखि विदेशी कामदार भित्र्याउन आफ्नो आप्रवासी प्रणाली परिमार्जन गरेको छ । करिव ११० मुख्य क्षेत्रमा कामदारको अभाव भएपछि लिथुआनिया नियम परिमार्जन गरेको त्यहाँका सञ्चारमाध्यमहरुले जनाइएका छन् ।
नयाँ सुधारले लिथुआनियाका सम्पूर्ण क्षेत्रमा देखिएको श्रमिक अभाव हल गर्ने र विदेशी कामदारहरुको वैधानिक प्रवेशलाई सहज बनाउने बताइएको छ । जर्मनी, क्यानडा, र बेलायतजस्ता परम्परागत गन्तव्यमा भिसामा कडा नियम भोग्दै गरेका कामदारका लागि लिथुआनियालाई विकल्पको रूपमा प्रस्तुत गर्ने जनाइएको छ ।
संशोधित आप्रवासन नीति अन्तर्गत अधिकांश विदेशी नागरिकले देशमा काम सुरु गर्नुअघि रोजगारीको लागि अस्थायी बसाइँ अनुमतिपत्र लिनु पर्ने हुन्छ । विगतमा लिइँदै आएको केही क्षेत्रहरूमा लागू हुने छोटो अवधिको रोजगार व्यवस्था बन्द गरिएको छ । आवेदनहरु केन्द्रीय डिजिटल प्रणालीमार्फत अप्रवासन प्राधिकरणले व्यवस्थापन गर्ने भएका छन् ।
सरकारले क्षेत्र–विशेष रोजगारीको कोटा पनि हटाइदिएको जनाइएको छ । यसलाई एकल राष्ट्रिय श्रम कोटाले प्रतिस्थापन गरेको छ । समाचारमाअनुसार अब सबै रोजगारदाताले विदेशी कामदार भर्ना गर्दा एउटै कोटाबाट छनोट गर्नेछन् । वार्षिक कोटा सकिएपछि कम्पनीहरूले फेरी आप्रवासी कामदार भर्ना गर्न सक्छन् । कामदारका आवश्यकताहरु सुरक्षित गर्न तलबसम्बन्धी मापदण्ड बनाइएको छ । यो पेसा र भिसा प्रकार अनुसार फरक पर्न सक्छ ।
लिथुआनियाको रोजगार सेवाको तथ्यांकअनुसार सन् २०२६ का लागि करिब ११० पेसाहरुमा उच्च माग भएका कामको रूपमा वर्गीकृत गरिएको जनाइएको छ । जसअन्तर्गत निर्माण र सीपयुक्त व्यवसायमा करिब ३५ पेसा पर्छन् भने उद्योग र निर्माण क्षेत्रमा करिब ४० पेसा छन् । सेवा र व्यावसायिक पेसामा करिब १५ पेसा र कृषि, वनजंगल र मौसमी काममा करिब १० पेसा समावेश रहेको जनाइएको छ । यो सुची रोजगारदाताको माग र रोजगार प्रवृत्तिमा आधारित भएर हरेक वर्ष तयार गरिन्छ ।
आवेदन प्रक्रियाका लगि लिथुआनियाली रोजगारदाताबाट विदेशी नागरिकलाई रोजगार दिने आधिकारिक प्रस्ताव प्राप्त गर्नुपर्ने जनाइएको छ । जागिर प्रस्तावपछि, रोजगारदाताले लिथुआनियाली अधिकारीसँग वर्क पर्मिटका लागि कागजात पेश गर्छन् । पर्मिट पाइसकेपछि, आवेदकले आफ्नो देशमा रहेको लिथुआनियाली दूतावास वा कन्सुलेटमार्फत भिसाको लागि आवेदन दिनुपर्ने भनिएको छ ।
लिथुआनियाले विभिन्न पेसाअनुसार कामदार भिसा प्रदान गर्छ । जसमा श्रमिक अभाव भएका पेसाका लागि दक्ष कामदार भिसा, उच्च योग्य विशेषज्ञका लागि इयू ब्लु कार्ड, मौसमी कार्य भिसा, उद्यमीहरुको लागि स्टार्टअप भिसा, र बहुराष्ट्र्रिय कम्पनीका कर्मचारीका लागि इन्ट्रा–कम्पनी ट्रान्सफर भिसा रहेका छन् ।
आवेदकले आधिकारिक पासपोर्ट, रोजगार सम्झौता, स्वीकृत कार्य अनुमति, योग्यता र अनुभवको प्रमाण, स्वास्थ्य बीमा प्रमाण, र आवास विवरण बुझाउन पर्छ भने अन्तिम स्वीकृतिसम्म बायोमेट्रिक बुझाउनु आवश्यक छ । दक्ष कामदारले स्थिर रोजगार, पर्याप्त आय, वैध स्वास्थ्य बीमा र उपयुक्त आवास देखाएपछि आफ्ना परिवार ल्याउनसमेत आवेदन दिन सक्ने उल्लेख गरिएको छ ।
उक्त मुलुकमा गत आर्थिक वर्ष २०८१/८२मा १३४ जना नेपाली गएका थिए भने २०८०/८१मा १५३ जना नेपाली पुगेको वैदेशिक रोजगार विभागको तथ्यांक छ । उनीहरु सबै व्यक्तिगत श्रम स्वीकृति लिएर गएका हुन् । लिथुआनिया, इस्टोनिया लगायतका बाल्टिक मुलुकमा कामदारको माग उच्च रहेपनि मागपत्र प्रमाणीकरण नहुँदा ती मागहरु खेर गइरहेको वैदेशिक रोजगार व्यवसायीले बताउँदै आएका छन् ।
