- नेपाल वैदेशिक रोजगार व्यवसायी संघ र स्वास्थ्य परीक्षण स्वास्थ्य संस्था सञ्चालक संघ नेपाल (होडान) बीच सहमतिपत्रमा हस्ताक्षर
- होडानमा आबद्ध स्वास्थ्य परीक्षण संस्थाहरुले पुरानै दरमा कामदारको स्वास्थ्य परीक्षण गर्ने
- गत भदौ २३ र २४ गतेको जेन-जी आन्दोलनमा सहिद तथा घाइते भएकाको परिवारका सदस्यको परीक्षणमा सहुलियत
काठमाडौं- नेपाल वैदेशिक रोजगार व्यवसायी संघले वैदेशिक रोजगारीमा जाने श्रमिकको स्वास्थ्य परीक्षण स्वास्थ्य संस्था सञ्चालक संघ नेपाल (होडान)मार्फत गराउने भएको छ । सोमबार वैदेशिक रोजगार व्यवसायी संघअन्तर्गतको मेडिकल तथा ओरियन्टेसन समस्या समाधान समितिका संयोजक तथा संघका प्रथम उपाध्यक्ष सुजितकुमार श्रेष्ठ र होडानका महासचिव रघुनाथ पनेरुले उक्त सहमतिपत्रमा हस्ताक्षर गरेका हुन् ।
रोजगारीमा जाने श्रमिकको स्वास्थ्य परीक्षणको शुल्क वृद्धि खारेज भइसक्दा पनि केही स्वास्थ्य परीक्षण गर्ने संस्थाले बढेकै शुल्कमा परीक्षण गरेको र केहीले सेवा नै रोकेको अवस्थामा साविककै शुल्कमा परीक्षण गराउन होडान तयार भएकाले सहकार्य भएको मेडिकल तथा ओरियन्टेसन समस्या समाधान समितिका संयोजक श्रेष्ठले बताए । साथै, उनले पुरानै शुल्कमा परीक्षण गर्ने संस्थाबाट मात्रै सेवा लिन व्यवसायीहरुलाई आग्रहसमेत गरेका छन् ।
संघले होडानमा आबद्ध व्यवसायीहरुको विवरण एक हप्ताभित्र उपलब्ध गराउन आग्रह गरेको छ । रोजगारीमा जाने श्रमिकको स्वास्थ्य परीक्षण गराउने १७१ वटा संस्थामध्ये ५० प्रतिशत संस्था होडानमा आबद्ध रहेको बताइएको छ । विगतकै दरमा परीक्षण गर्न तयार भएको होडानले गत भदौ २३ र २४ गतेको जेन-जी आन्दोलनमा सहिद तथा घाइते भएकाको परिवारका सदस्यको परीक्षणमा सहुलियत दिनेसमेत सम्झौता गरेको छ । आन्दोलनबाट घाइते भएको एकाघरको सदस्यलाई परीक्षणमा ५० प्रतिशत सहुलियत र सहिद भएका परिवारका सदस्यलाई सतप्रतिशत सहुलियतमा परीक्षण गर्ने सहमति भएको संघले जानकारी दिएको छ । यसका लागि नेपाल सरकारले प्रदान गरेको पत्र र वैदेशिक रोजगार व्यवसायी संघको सिफारिस आवश्यक पर्ने जनाइएको छ ।
यही पुस ४ गते अन्तर्राष्ट्रिय आप्रवासन दिवसका अवसरमा आयोजित कार्यक्रममा बोल्दै श्रम, रोजगार तथा सामाजिक सुरक्षामन्त्री राजेन्द्रसिंह भण्डारीले वृद्धि भएको शुल्क खारेज भएको घोषणा गरेका थिए । यसअघि मन्त्रालयले कात्तिक ३० गते मापदण्ड पुगेका संस्थाको सूची सार्वजनिक गर्दै नयाँ मापदण्ड लागू गर्न भनेको थियो । यसपछि अधिकतम् छ हजार ५०० रुपैयाँमा स्वास्थ्य परीक्षण गराउँदै आएका संस्थाहरुले ३४ प्रकारका परीक्षणका लागि नौ हजार ५०० रुपैयाँ लिन थालेका थिए । उक्त मूल्यवृद्धिको वैदेशिक रोजगार व्यवसायीहरुले विरोध जनाएका थिए । नेपाल वैदेशिक रोजगार व्यवसायी संघले शुल्क वृद्धि खारेजीका लागि पहल गरेको थियो । अन्ततः श्रममन्त्रीमा भण्डारीको नियुक्तिसँगै महासंघको माग सम्बोधन भएको हो ।
नेपाल मेडिकल व्यवसायी संघ र नेपाल स्वास्थ्य व्यवसायी महासंघले भने खारेजीको निर्णयमा आपत्ति जनाउँदै आएका छन् । आफूहरुलाई सरकारले करोडौंका उपकरण थप्न लगाएपछि यस्तो निर्णय गर्दा व्यवसायीहरु मारमा परेको सेवा रोकेका स्वास्थ्य व्यवसायीहरुको दाबी छ । सरकार फेरिएपिच्छे नीति नियम फेरिँदा आफूहरु समस्यामा परेको उनीहरुको गुनासो छ । पुरानो दरमा सेवा दिन नसक्ने भन्दै उनीहरुले परीक्षण रोकेका छन् ।
