- जलीब अल-शुईउख क्षेत्रमा ६७ वटा पुराना भवन भत्काइएपछि कामदारहरु नजिकका निजी आवासीय क्षेत्रहरू खैतान, अल-फिर्दौस, अल-अन्दालुस, अल-राबिया र अल-ओमारीयालगायत ठाउँमा स्थानान्तरण भएका हुन्
काठमाडौ- कुवेतको जलीब अल-शुईउख क्षेत्रमा ६७ वटा पुराना भवन भत्काइएपछि वैदेशिक रोजगारीका लागि पुगेका एकल पुरुष कामदार निजी आवासीय क्षेत्रहरूमा बस्न थालेका छन् । त्यहाँका स्थानीय अधिकारीहरूका अनुसार त्यस्ता कामदार नजिकका निजी आवासीय क्षेत्रहरू खैतान, अल-फिर्दौस, अल-अन्दालुस, अल-राबिया र अल-ओमारीयालगायत ठाउँमा स्थानान्तरण भएका हुन् ।
यस परिवर्तनले त्यहाँको सरकारलाई एकल पुरुषहरुका लागि निर्दिष्ट नगरिएका क्षेत्रमा बसोवास गर्ने बढ्दो प्रवृत्तिलाई नियन्त्रण गर्ने सहयोग पुर्याएको जनाइएको छ । यसले कुवेती नागरिकको सुरक्षा र सहजताको सुनिश्चित गर्ने भनिएको छ । यही कदमको अंशको रूपमा, कुवेतका नगरपालिकाले उक्त नियम उल्लंघन गरेको छ/छैन भनेर निरीक्षणलाई तीव्र बनाएको जनाइएको छ । उक्त कार्य आन्तरिक मन्त्रालयको समन्वयमा विशेष गरी खैतान क्षेत्रमा तीव्र परिएको अधिकारीहरुले जनाएका छन् । इन्जिनियर मोहम्मद अल-जलावी, ब्याचलर समितिका रिपोर्टर तथा यो प्रावधान अगाडि बढाउन जिम्मेवारी पाएकाहरुले मुलुकका नगरपालिका र उर्जा तथा जलस्रोत मन्त्रालयको न्यायिक नियन्त्रण टोलीसँग सहकार्य गर्दै खैतान क्षेत्रमा गहन निरीक्षण अभियान अगाडि बढाइरहेका छन् । यसमा गृह मन्त्रालयले पनि समन्वय गरिरहेको जनाइएको छ ।
खैतानमा गरिएको निरीक्षण अभियानका अधिकारीहरुका अनुसार नियम उल्लघंन गर्ने पुरुषहरूले बसोबास गरेका १४ वटा आवासबाट बिजुली काटिएको छ । यससँगै सोही प्रकारको उल्लघंन गरेका अन्य ३४ सम्पत्तिहरूलाई सचेतनामूलक सूचना जारी गरिएको छ । अधिकारीका अनुसार विशिष्ट क्षेत्रीय टोलीलाई व्यक्तिगत आवासीय छिमेकहरूमा अविवाहितहरुको बासस्थान सम्बन्धि गतिविधि निरन्तर अनुगमन गर्न परिचालन गरिएको छ । टोलीले घुम्ती निरीक्षण गरिरहेको बुझिएको छ । निरीक्षण बढाएर यस प्रचलनलाई पहिला न्यूनिकरण गर्ने र अन्ततः पूर्ण रुपमा हटाउने सरकारको निर्देशन रहेको बुझिन्छ । आवासीय नियम बढी उल्लघंन भएका क्षेत्रहरुमा खैतान, अल-फिर्दौस, अल-एन्डालुस, अल-राबिया, र अल-ओमारिया रहेको भनिएको छ ।
हालसालै मात्र, स्थानीय बासिन्दालाई असहज पार्ने गतिविधि गर्ने र उक्त क्षेत्रको जीवनस्तर घटाउने नकारात्मक व्यवहारहरू प्रदर्शन गरेको पाइएपछि निरीक्षकहरूले अल-राबियामा १८ चेतावनीहरू जारी गरेको जनाइएको छ ।
