काठमाडौं- नेपाल वैदेशिक रोजगार व्यवसायी संघले स्वास्थ्य परीक्षणमा भएको शुल्क वृद्धिको विरुद्धमा गृह मन्त्रालयको समेत ध्यानाकर्षण गराएको छ । आइतवार गृहमन्त्री ओमप्रकाश अर्याललाई भेटेर यस विषयमा ध्यानाकर्षण गराउँदै पत्र बुझाएको संघका महासचिव महेश बस्नेतले बताए ।
संघले रोजगारीमा जाने कामदारको स्वास्थ्य परस्क्षणमा अचानक ठूलो अनुपातमा गरिएको शुल्क वृद्धि अनावश्यक र अस्वस्थ प्रतिस्पर्धाको उपज भएको जनाएको छ । व्यवसायीको पत्र बुझ्दै मन्त्री अर्यालले यस विषय अध्ययन गर्ने बताएको जनाइएको छ । संघले गत शुक्रवार श्रम, रोजगार तथा सामाजिक सुरक्षा मन्त्रालय र स्वास्थ्य मन्त्रालयलाई पनि पत्र बुझाएको थियो ।
संघले आफ्नो अध्ययनमा कुनै पनि मुलुकले ३४ प्रकारको मेडिकल अनिवार्य नगरेको जनाएको छ । जिसिसिका मुलुकहरुले मेडिकल गर्दै आएको गाम्काबाट मेडिकल गरेर जाने श्रमिक फर्किएर आएको घटना न्यून रहेको संघको दाबी छ । मलेसियाको हकमा भने स्वास्थ्य परीक्षणमा फेल भएर फर्कने घटना बढी देखिएकाले शुल्क वृद्धिभन्दा पनि परीक्षणलाई व्यवस्थित बनाउने पर्ने संघको माग छ ।
गृहमन्त्रीसँगको भेटमा जिल्ला प्रशासन कार्यालयले श्रमिकको उद्धार गर्ने, नेपाल फर्काउने नाममा व्यवसायीलाई समस्या दुःख दिने गतिविधि गरेकाले यसलाई रोक्न र जेन–जी आन्दोलनपछि गन्तव्य मुलुक सामु विश्वास गुमेको अवस्थामा विश्वसनीय वातावरण निर्माण गर्न भूमिका खेल्नसमेत ध्यानाकर्षण गराएको जनाएको छ ।
शुल्कवृद्धिको विषय विवादास्पद बनेसँगै श्रम मन्त्रालयले मेनपावर व्यवसायी, मेडिकल व्यवसायी र सरोकालवाला पक्षलाई आज छलफलमा बोलाएको छ ।
