काठमाडौं- नेपाल वैदेशिक रोजगार व्यवसायी संघले गौशाला प्रहरी वृत्तमा निर्माण गरेको भवन हस्तान्तरण गरेको छ । बुधवार विशेष कार्यक्रमको आयोजना गर्दै उक्त भवनको हस्तान्तरण गरिएको हो ।
गत भदौ २३ र २४ गतेको जेन–नी आन्दोलनबाट क्षतिग्रस्त प्रहरी वृत्तमा संघले २० लाख लागतमा चार कोठाको कार्यालय भवन र तीन कोठाको थुनुवा कक्ष निर्माण गरिदिएको छ । कार्यक्रममा संघका अध्यक्ष भुवनसिंह गुरुङले सबैको साथ र सहयोगले निर्माण सफल भएको बताए । शान्ति सुरक्षाको प्रत्याभुति नभए मानिसको जीवन कठिन हुने भन्दै सबै नागरिकको सुरक्षाका लागि उक्त सहयोग गरिएको गुरुङको भनाइ छ ।
‘प्रहरी नभएको अवस्थामा अब के हुने हो भनेर त्रासमा बस्नुपर्ने अवस्थाबनेको थियो । प्रहरीहरुलाई फेरी विगतकै जसरी कामकारवाहीमा फर्काउनपर्छ भनेर सहयोग गरेका हौँ,’ गुरुङले भने ।संघले उक्तः प्रहरी वृत्तको मुख्य भवन पनि बनाइदिने जनाएको छ । उक्त काम पनि चाँडै सुरु गरिने गुरुङले बताए । ‘जलेको पक्की भवन पनि चाँडै बनाउने जिम्मा लिएका छौँ । आगामी दिनमा पनि राम्रो काममा जुट्न पाइराखौँ,’ गुरुङले भने । उक्त पक्की भवन बनाउन एक करोड ६० लाख लाग्ने अनुमान गरिएको जनाइएको छ ।
कार्यक्रमका प्रमुख अतिथि तथा जिल्ला प्रहरी परिसर कार्यालय काठमाडौंका कार्यालय प्रमुख प्रहरी वरिष्ठ उपरिक्षक रमेश थापाले यस्ता सहयोगका कारण काठमाडौंका सबै प्रहरी कार्यालयहरु सञ्चालनमा आएको बताए । विभिन्न संघ संस्थाले देखाएको सहयोगप्रति थापाले आभार प्रकट गरेका छन् । ‘यस्तो त्रासदीपूर्ण घटना बढ्छ भनेर तपाइँ हामी कसैले पनि कल्पना गरेका थिएनौँ,’ थापाले भने, ‘घटनाकै भोलिपल्टबाटै हामीलाई साथ, सहयोग र ढाडस दिनुभयो । उक्त सहयोग बयान गर्न नसकिने खालको छ ।’
