- नोभेम्बर १८ तारिखबाट त्यहाँका सरकारी तथा अर्धसरकारी क्षेत्रको भिसा दिइएको थियो
- मंगलबारबाट नीजि कम्पनीले पनि पुलिस रिपोर्टसहित भिसाको लागि पेश गर्न आग्रह
- भिसा बन्द भएयता कात्तिकमा २६५ जनामात्र गएका यूएई गएका थिए
काठमाडौं– संयुक्त अरब इमिरेट्स (यूएई)का नीजि कम्पनीले श्रमिक भिसाका लागि ‘पुलिस रिपोर्ट’ माग्न थालेका छन् । योसँगै नेपालीका लागि केही महिनादेखि अघोषित रुपमा बन्द भएको यूएईको श्रम बजार सामान्यतर्फ उन्मुख हुन थालेको व्यवसायीले बताएका छन् ।
भदौ २३ र २४ गते जेन–जी विद्रोहयता यूएईले नेपाली श्रमिकको भिसा रोकेको थियो । त्यहाँको सरकारले औपचारिक जानकारी बिनै भदौ ३० यता भिसा बन्द गरिदिएको थियो । त्यसयता नोभेम्बर १८ तारिखबाट त्यहाँका सरकारी तथा अर्धसरकारी क्षेत्रको भिसा दिइएको थियो । मंगलबारबाट नीजि कम्पनीले पनि पुलिस रिपोर्टसहित भिसाको लागि पेश गर्न भनेको नेपाल वैदेशिक रोजगार व्यवसायी संघका महासचिव महेश बस्नेतले बताए ।
‘युएईको समस्या समाधानका लागि व्यवसायीको सल्लाह, सुझाव लिएर हामीले सरकारका विभिन्न निकायलाई ध्यानाकर्षण गराएका थियौँ । मंगलवारबाट केहस् सकारात्मक संकेत देखिएका छन्,’ बस्नेतले भने, ‘त्यहाँका कम्पनीले भिसाको लागि पुलिस क्लियरेन्स सर्टिफिकेट पेश गर्न भनेका छन् । यूएईको रोजगारी समाधानतर्फ उन्मुख भएको देखिन्छ ।’
यूएईमा नेपाली श्रमिक पुलिस रिपोर्टबिनै जाँदै आएका थिए । जेन–जी विद्रोहमा मुलुकभरका जेलबाट भागेका कैदिबन्दीका कारण सुरक्षा चुनौति देखिएको भन्दै भिसा रोकिएको त्यहाँका कम्पनीले बताएका थिए । सुरक्षाको विषयलाई ध्यानमा राख्दै पुलिस रिपोर्ट लिएर कामदार लग्ने प्रक्रियालाई निरन्तरता दिन खोजेको देखिन्छ ।
नेपाल यूएईको प्रमुख स्रोत मुलुकमध्ये पर्छ । नेपालबाट पनि दैनिक पाँचदेखि आठ सय श्रमिक संस्थागत, व्यक्तिगत र श्रम स्वीकृति नवीकरण गरेर रोजगारीमा जाँदै आएका छन् । जेन–जी विद्रोहपछि अवस्था सामान्य हुँदै गएपनि हालसालै बाराको गतिविधिजस्ता कारणले पनि रोजगारदाता सशंकित हुने अवस्था आउने भएकाले यसलाई नियन्त्रण गरिनुपर्ने व्यवसायी बताउँछन् ।
यूएई नेपाली युवाहरूको प्रमुख रोजाइको श्रम गन्तव्य बन्दै आएको छ । प्रत्येक महिना १५ हजारभन्दा बढी युवा संस्थागत माध्यमबाट यूएई जाँदै आएकोमा यूएई बन्द भएयता असोज महिनामा सात हजार २३७ र कात्तिकमा २६५ जनामात्र गएका थिए । गत आर्थिक वर्ष २०८१÷८२मा सबैभन्दा धेरै दुई लाख ७४ हजार ५९० जना रोजगारीका लागि यूएई गएका थिए । त्यस्तै ०८०÷८१मा एक लाख ९३ हजार ४३८ जना गएका थिए ।
-1787143572.jpg)
