- चालु आर्थिक वर्ष २०८२/८३को चार महिनामा वैदेशिक राजेगारीमा गएकामध्ये सीप सिकेर विदेशिने कामदारको संख्या दुई लाख नौ हजार ४८० रहेको छ
- अघिल्लो आर्थिक वर्षको वैदेशिक रोजगारीमा दक्षताबिनै जाने श्रमिक २७.०९ प्रतिशत थिए
- आर्थिक वर्ष २०७५/७६को तथ्यांक हेर्दा रोजगारीमा ५६.०९ प्रतिशत अदक्ष कामदार विदेशिएका थिए
काठमाडौं- पछिल्लो वर्षहरुमा वैदेशिक रोजगारीमा सीप सिकेरमात्र जाने क्रम बढ्न थालेको छ । पछिल्लो चार महिनाको तथ्यांकहेर्दा ७५.२५ प्रतिशत श्रमिक सीप सिकेर वैदेशिक रोजगारीमा गएको पाइएको हो ।
चालु आर्थिक वर्ष २०८२/८३को चार महिनामा वैदेशिक राजेगारीमा गएकामध्ये सीप सिकेर विदेशिने कामदारको संख्या दुई लाख नौ हजार ४८० रहेको छ । वैदेशिक रोजगार विभागको तथ्यांकअनुसार उक्त अवधिमा ६६ हजार २८२ जना कामदार कुनै सीपबिनै रोजगारीमा गएको पाइएको छ । उक्त अवधिमा संस्थागत, व्यक्तिगत र श्रम स्वीकृति नवीकरण गरेर दुई लाख ७५ हजार ७६२ जना विदेशिएका छन् ।
उक्त अवधिमा सबैभन्दा बढी दक्ष श्रमिक कात्तिकमा गएका छन् । कात्तिकमा श्रम स्वीकृति लिएर रोजगारीमा गएकामध्ये ८१.४९ प्रतिशतले आफूले गर्ने कामबारे केही न केही ज्ञान लिएको पाइन्छ । उक्त महिनामा विदेशिएका ७३ हजार ९४ जनामध्ये ७० जना उच्च दक्ष, ३३४ व्यवसायिक, आठ हजार ३०५ जना अर्धदक्ष र ५० हजार ८६२ जना सीपयुक्त श्रमिक रहेका छन् । १८.५ प्रतिशत अर्थात् १३ हजार ५२३ जना भने अदक्ष कामदार रहेका छन् ।
असोजमा रोजगारीमा गएका ६४ हजार ६३४ जनामध्ये २२.२४ प्रतिशत श्रमिक पेशागत ज्ञानबिनै गएका छन् । १४ हजार ३७८ जना अदक्ष युवा उक्त महिनामा परदेशिएका छन् । यसबाहेका पेशागत दक्षता उच्च भएका, सीपयुक्तदेखि अर्धदक्ष श्रमिकको संख्या ५० हजार २५६ अर्थात ७७.७५ प्रतिशत रहेको छ ।
त्यस्तै, भदौ महिनामा रोजगारीमा गएकामध्ये २८.१५ प्रतिशत अदक्ष कामदार छन् । उक्त महिनामा ६७ हजार ९७२ जना विदेशिएकोमा १९ हजार १३५ जना सीप नै नसिकी गएको तथ्यांकछ । दक्ष भएर अर्थात् केही न केही सिकेर जाने ७१.८४ प्रतिशत रहेका छन् । यस महिना ११३ जना उच्च दक्ष, २३६ जना व्यवसायिक, ११ हजार ४१८ जना अर्धदक्ष र ३७ हजार ७० जना दक्ष श्रमिक गरी कुल ४८ हजार ८३७ जना कम्तीमा पेशागत ज्ञान लिएर जानेहरू छन् ।
सबैभन्दा कम दक्ष कामदार भने साउनमा गएका छन् । २८.२५ प्रतिशत अर्थात १९ हजार २४६ जना अदक्ष युवाहरू उक्त महिनामा विदेशिएका हुन् । उक्त अवधिमा उच्च दक्ष, दक्ष, व्यवसायिक र सीप भएकाहरू ७१.७४ प्रतिशत गएका छन् । यस्ता श्रमिकको संख्या ४८ हजार ८६४ रहेको छ ।
आर्थिक वर्ष २०७५/७६को तथ्यांकहेर्दा रोजगारीमा जाने अदक्ष कामदारको संख्या बढी थियो । उक्त वर्ष ५६.०९ प्रतिशत अदक्ष श्रमिक विदेशिएका थिए । कुल पाँच लाख आठ हजार ८२७ जना रोजगारीमा गएकोमा दुई लाख ८५ हजार ४४५ जना कुनै सीपबिनै रोजगारीमा गएका थिए । अर्धदक्ष, दक्ष, व्यवसायिक र उच्च दक्ष श्रमिक भने ४३.९० प्रतिशतमात्र थिए ।
आर्थिक वर्ष ७७/७८मा आइपुग्दा केही सुधार भएको पाइन्छ । सो आर्थिक वर्षमा एक लाख ६६ हजार ६९८ जना रोजगारीमा जाँदा ४८.२२ प्रतिशत अदक्ष कामदार थिए । उक्त वर्षमा ८० हजार ३८२ जना सीपबिनै रोजगारीमा गएका थिए । अर्ध दक्षदेखि उच्च दक्ष कामदार भने ५१.७७ प्रतिशत थिए ।
अघिल्लो आर्थिक वर्षको तथ्यांकहेर्दा रोजगारीमा दक्षताबिनै जाने श्रमिक २७.०९ प्रतिशत थिए । उक्त अवधिमा आठ लाख ३९ हजार २६६ जना रोजगारीमा गएकोमा दुई लाख २७ हजार ४०७ जना अदक्ष श्रमिक थिए । २७.०९ प्रतिशत अदक्ष श्रमिक गएकोमा ७२ प्रतिशतले कुनै न कुनै किसिमको पेशागत ज्ञान हासिल गरेर गएको पाइन्छ ।
