काठमाडौं- ओमानको सामाजिक विकास मन्त्रालयले आप्रवासी कामदारको भर्तीलाई नियमन गर्न संघ स्थापना गर्ने निर्णय गरेको छ । त्यहाँका सामाजिक विकास मन्त्री डा. लैला बिन्त अहमद अल नज्जरले मन्त्रिस्तरीय निर्णय जारी गर्दै आप्रवासी श्रम भर्ती गर्ने एजेन्सीको संघ स्थापना गरेका छन् ।
उक्त संघले राज्यभित्र र बाहिरका इजाजतपत्र प्राप्त एजेन्सी, सरकारी निकाय र कम्पनीबीच समन्वय सुधार गरेर श्रमिकको भर्ना प्रक्रियालाई नियमन गर्ने जनाइएको छ । यसको जिम्मेवारी भर्ती अभ्यासले आधारभूत कानून र श्रम नियमको पालना गरेको छ÷छैन भनेर सुनिश्चित गर्ने रहेको छ । त्यस्तै सरकारी निकायसमक्ष सदस्य एजेन्सीको प्रतिनिधित्व पनि गर्ने छ । यसले विदेश मन्त्रालयमार्फत दूतावाससँग समन्वय गरेर एजेन्सी, रोजगारदाता र कामदार बीचको समस्याको समाधानमा पनि सहयोग गर्नेछ ।
साथै उक्त संघले अनुमतिपत्र नभएका भर्ती गतिविधिलाई सम्बोधन गर्न र श्रम बजारलाई नियमन गर्न अधिकारीसँग सहकार्य गर्ने भनिएको छ । यसलाई ओमानका लागि उपयुक्त कामदारको भर्ती प्रक्रियामा समन्वय गर्ने जिम्मेवारी दिइएको छ । जसअन्तर्गत श्रमिक पठाउने देशसँग समझदारीपत्रको स्वीकृति र सरकारी निकाय र मान्यता प्राप्त दूतावासबाट स्वीकृतिको अधीनमा विभिन्न राष्ट्रमा श्रमिक भर्नाका च्यानल विस्तार गर्ने जनाइएको छ ।
१२ सदस्यीय निर्देशक बोर्डले दुई वर्षको कार्यकालको लागि संघको व्यवस्थापन गर्नेछ । सदस्यहरू पुनः निर्वाचनमा जान पाउनेछन् । पहिलो साधारण सभामा संस्थापक सदस्यले मात्र बोर्डको लागि उम्मेदवारी दिन सक्ने प्रावधान राखिएको छ । संघको कोष सदस्यता शुल्क, मन्त्रीद्वारा अनुमोदित चन्दा र वसीयतनामा, गतिविधिबाट प्राप्त राजस्व, सरकारी अनुदान र अन्य मन्त्रालय–अनुमोदित स्रोतहरूबाट आउनेछ ।
-1763876747.jpg)
