काठमाडौं– चालु आर्थिक वर्षको चार महिनामा साढे दुई लाखभन्दा बढी युवा रोजगारीका लागि विदेसिएका छन् । गत साउनदेखि कात्तिकसम्मको अवधिमा कूल दुई लाख ७५ हजार ७६२ जना श्रम स्वीकृति लिएर रोजगारीका लागि विभिन्न मुलुमा गएका हुन् ।
पछिल्लो महिना कात्तिकमामात्रै ७३ हजार ९४ जनाले श्रम स्वीकृति लिएको वैदेशिक रोजगार विभागले मंगलबार सार्वजनिक गरेको तथ्यांकमा देखिन्छ । यो संख्या संस्थागत, व्यक्तिगत र पुनः श्रम स्वीकृति लिनेको हो । गत भदौ २३ र २४ को जेन–जी आन्दोलनपछि नेपालीहरुको प्रमुख श्रम गन्तव्य संयुक्त अरब इमिरेट्स (युएई)को रोजगारी बन्द हुँदा वैदेशिक रोजगारीमा जाने प्रवृत्तिमा केही फेरबदल देखिएको छ । चालु आर्थिक वर्ष २०८२/८३ को कात्तिक महिनामा संस्थागत माध्यमबाट रोजगारीमा जानेहरुको संख्या करिब आधाले घटेको छ । श्रम स्वीकृति नवीकरण (पुनः श्रम स्वीकृति) गरेर जानेहरुको संख्या भने उल्लेख्यरुपमा बढेको छ ।
कात्तिकसम्म युएईको रोजगारी बन्द भएको अवस्थामा विदेसिनेहरु नै घट्ने अनुमान गरिएको थियो । रोजगारीका लागि विदेसिनेको संख्यामा भने यसको असर देखिएको छैन । यद्यपि, संस्थागत माध्यमबाट जानेको संख्यामा कमी आउँदा श्रम स्वीकृति नवीकरण जानेहरु भने हालसम्मकै बढी पाइएको छ ।
हालसम्म मासिक करिब ३० हजार श्रमिक रोजगारीका लागि पठाउँदै आएका इजाजत प्राप्त संस्थाले कात्तिकमा १२ हजार १४९ जनालाई मात्र रोजगारीमा पठाएका छन् । जसमा १० हजार ६५५ पुरुष र एक हजार ४९४ जना महिला छन् । श्रम स्वीकृति नवीकरण गरेर जानेहरुको संख्या भने ह्वात्तै बढेको छ । कात्तिकमामात्रै ५० हजार ५८० श्रमिक पुनः श्रम स्वीकृति लिएर गएका छन् । चालु आवको साउनमा २३ हजार ६४४, भदौमा २२ हजार २४० र असोजमा ३१ हजार ३७३ जनाले श्रम स्वीकृति नवीकरण गरेर गएका थिए ।
अघिल्ला आर्थिक वर्षको प्रत्येक महिनाको तथ्यांक हेर्दा पनि अधिकतम् ३० हजारको हाराहारीमा श्रम स्वीकृति नवीकरण गरेर गएको पाइन्छ । कात्तिक महिनामा नौ हजार ५५३ जनाले व्यक्तिगत श्रम स्वीकृति लिएका छन् । जसमध्ये सात हजार १९६ जना पुरुष र दुई हजार ३५७ जना महिला छन् । त्यस्तै, जिटुजीमार्फत ७८३ जना रोजगारीमा गएका तथ्यांक छ । जसमा ७१ जना इजरायल र ७१२ जना दक्षिण कोरिया गएका हुन् ।
कात्तिकमा वैदेशिक रोजगारीमा युवाहरु १०६ वटा मुलुकमा गएका छन् । जसमध्ये सबैभन्दा धेरै साउदी अरेबियामा १५ हजार ७६९ जना गएका छन् । साउदीमा १५ हजार ६१३ जना पुरुष र १५६ जना महिला गएको तथ्यांक छ । त्यसैगरी, दोस्रो कतारमा १३ हजार ७३२ जना गएका छन् । त्यसपछि युएईमा १३ हजार ३९९, मलेसियामा नौ हजार ८७२ र कुवेतमा पाँच हजार २७८ जना गएको तथ्यांक छ । श्रम स्वीकृति नवीकरण गरेर सबैभन्दा बढी १२ हजार १६७ जना साउदी गएका छन् ।
जिल्लागत तथ्यांक हेर्दा कात्तिकमा सबैभन्दा बढी झापाका नागरिक वैदेशिक रोजगारीमा गएका छन् । उक्त जिल्लाबाट दुई हजार ७६० पुरुष र ७३३ जना महिलाले श्रम स्वीकृति लिएको देखिन्छ । उक्त एक महिनामा विदेसिएकामध्ये सबैभन्दा बढी महिला कामदार पनि सोही जिल्लाका छन् । झापापछि धनुषाबाट तीन हजार ४२१ जना, मोरङबाट तीन हजार १७४ जना, सिरहाबाट दुई हजार ५६१ र रुपन्देहीबाट दुई हजार ३९० जनाले रोजगारीका लागि मुलुक छाडेका छन् । सबैभन्दा कम श्रमिक भने मुस्ताङ र मनाङबाट १८÷१८ जना गएका छन् ।
उक्त एक महिनामा सबैभन्दा बढी दक्ष श्रमिक रोजगारीमा गएका छन् । ५० हजार ८६२ जना दक्ष श्रमिक रोजगारीमा गएकोमा ४४ हजार ८७२ जना पुरुष र पाँच हजार ९९० जना महिला छन् । त्यस्तै १३ हजार ५२३ जना अदक्ष श्रमिक विदेसिएका छन् । अदक्ष श्रमिकमा ११ हजार ९४१ जना पुरुष र एक हजार ५८२ जना महिला छन् । रोजगारीमा आठ हजार ३०५ जना अर्धदक्ष कामदार ३३४ जना व्यावसायिक कामदार गएका छन् । त्यस्तै, ५४ जना पुरुष र १६ जना महिला गरी ७० जना उच्च दक्ष श्रमिक रोजगारीमा गएका छन् ।
