- हप्तामा २५ वटामात्र पासपोर्ट पेस गर्न पाउने सीमा निर्धारण गरेकोमा आइतबारदेखि उक्त सीमा बढाएर १५० वटा पुर्याएसँगै राहत
काठमाडौं– साउदी रोजगारीका लागि इजाजतप्राप्त संस्थाले पुनः १५० वटा पासपोर्ट पेस (सबमिट) गर्न पाएका छन् । पासपोर्टको सीमा बढेसँगै व्यवसायीहरुले केही राहत महसुस गरेका छन् ।
साउदी दूतावासले केही समययता हप्तामा २५ वटामात्र पासपोर्ट पेस गर्न पाउने सीमा निर्धारण गरेको थियो । आइतबारदेखि १५० वटा पासपोर्ट बुझाउन गर्न सकिने भएको हो ।
गत शुक्रबार नेपालस्थित साउदी दूतावासका कन्सुलर अब्दुल रहमान र नेपाल वैदेशिक रोजगार व्यवसायी संघका तृतीय उपाध्यक्ष तथा साउदी संयोजक वैकुण्ठ पौडेलबीचको भेटमा उक्त विषयमा सहमति भएको संघले जानकारी दिएको छ । जेन–जी आन्दोलनभन्दा केही अगाडि २५ वटामात्र पेस गर्न पाउने व्यवस्था गरिएको थियो । जसले गर्दा व्यवसायीहरु समस्यामा पर्दै आएका थिए । अब एउटा व्यवसायीले हप्तामा एकपटक अधिकतम् १५० वटा पासपोर्ट पेस गर्न मिल्ने छ ।
त्यस्तै, एउटा इजाजतवाला संस्थालाई दुईवटा ‘इन्ट्री कार्ड’ दिने व्यवस्था केही समय रोकिएको अवस्थामा उक्त भेटबाट पुनः दुईवटा इन्ट्री कार्ड दिने सहमति भएको जानकारी दिइएको छ । संघले अघिल्लो बैैठकबाट गरेका विभिन्न मागमध्ये यी दुई समस्या समाधान भएको तृतीय उपाध्यक्ष पौडेलले बताए ।
केही व्यवसायीहरुको युजर ‘ब्लक’ भएको, भुक्तानीमा समस्या र सवारी चालक पठाउनका लागि थप कागजात माग गरी भिसा लगाउन जटिलता आइपर्नेलगायत गुनासो बढेको पौडेलले बताए । यसको समाधानका लागि पनि पहल गरिरहेको उनले जानकारी दिए । उक्त भेटमा यी समस्या समाधानका लागि दूतावास सकारात्मक देखिएको पौडेलले बताए ।
