काठमाडौं- आगामी मंसिर महिनाको सुरुआतबाटै कोरिया रोजगारीमा जान चाहनेहरुका लागि भाषा परीक्षा सञ्चालन हुने भएको छ । वैदेशिक रोजगार विभागअन्तर्गतको इपिएस कोरिया शाखाले जारी गरेको सूचनाअनुसार मंसिर १ गतेदेखि परीक्षा सुरु हुने छ ।
रोजगार अनुमति प्रणाली (इपिएस)मार्फत उत्पादनमूलक क्षेत्रतर्फ रोजगारीमा जान चाहनेहरुका लागि मंसिर १ गतेदेखि परीक्षा सञ्चालन हुने शाखाको सूचनामा उल्लेख छ । हरेक दिन बढीमा चार सिफ्टमा सञ्चालन हुने परीक्षा माघको २७ गतेसम्म चल्ने जानकारी दिइएको छ ।
सूचनामार्फत शाखाले परीक्षार्थीहरुले पालना गर्नुपर्ने विभिन्न नियमहरु पनि उल्लेख गरेको छ । परीक्षार्थीहरुलाई परीक्षामा सहभागी हुनुभन्दा एक दिन अगाडि शाखामा पुगेर बायोमेट्रिक गर्नुपर्ने भनिएको छ । उक्त बायोमेट्रिक परीक्षा हुने दिनमा रुजु गरिने जनाइएको छ । यसका लागि परीक्षाको समयभन्दा दुई घण्टा अगाडि परीक्षा केन्द्रमा उपस्थित हुन सूचनामार्फत भनिएको छ ।
बायोमेट्रिक प्रमाणीकरणपछि अधिमुखीकरण गरेर मात्र परीक्षामा सहभागी हुन पाइने शाखाले जनाएको छ । भाषा परीक्षा ललितपुरको भँैसेपाटीस्थित राष्ट्रिय व्यावसायिक प्रशिक्षण प्रतिष्ठानमा हुने छ । कृषि तथा उत्पादनमूलक क्षेत्रका लागि कूल एक लाख दुई हजार ५६४ जनाले आवेदन दिएको शाखाले जानकारी दिएको छ । जसमध्ये उत्पादनतर्फ तीन हजार ५०० र कृषि तथा पशुपालनतर्फ एक हजार ८०० जनाको कोटा निर्धारण गरिएको छ ।
