- कोरिया रोजगारीको सुनिश्चितता माग्दै इपिएस भाषा परीक्षा उत्तीर्ण गरेर रोस्टरमा रहेका युवाहरु प्रदर्शनमा
- रोस्टर अवधि सकिन लागेपछि उत्पादन क्षेत्र, कृषि तथा पशुपालन, सीप बिल्डिङ क्षेत्रमा जाने प्रतीक्षामा रहेकाहरु निराश
- भाषा परीक्षा उत्तीर्ण हुनु रोजगारीको ग्यारेण्टी होइन भन्नका लागि आफूहरुले कुनै चिट्ठा नभरेको भनाइ
- उत्तीर्ण भएपछि नलग्ने भए परीक्षा दिने व्यवस्था खारेज गर्नुपर्ने माग
काठमाडौं– कोरिया रोजगारीको सुनिश्चितता माग्दै इपिएस भाषा परीक्षा उत्तीर्ण गरेर रोस्टरमा रहेका युवाहरु प्रदर्शनमा उत्रिएका छन् । रोजगार अनुमति प्रणाली (इपिएस) अन्तर्गत भाषा परीक्षा उत्तीर्ण गरेर रोस्टरमा परेको वर्षौं बित्दासमेत कोरिया जान नपाएकाहरुले बिहीबार ग्वार्कोस्थित वैदेशिक रोजगार विभागअन्तर्गतको इपिएस कोरिया शाखा घेराउ गरेका हुन् ।
रोस्टर अवधि सकिन लागेका उत्पादन क्षेत्र, कृषि तथा पशुपालन, सीप बिल्डिङलगायतका क्षेत्रमा जाने प्रतीक्षामा रहेकाहरु घेराउका लागि पुगेका थिए । आन्दोलनमा सहभागी भक्तपुर दुवाकोटका सुमन थिङले भाषा परीक्षा उत्तीर्ण हुनु रोजगारीको ग्यारेण्टी होइन भन्नका लागि आफूहरुले कुनै चिट्ठा नभरेको बताए । ‘यत्रो वर्षको कम्ती समय छ, आर्थिक लगानी भएको छ । त्यसमाथि पनि मानसिक तनाव छुट्टै छ,’ थिङले भने, ‘जसलाई भेटे पनि कहिले कोरिया जाने भनेर सोध्छन् । के जवाफ दिने ?’ यस्तो महँगीमा तीन वर्ष तयारी गरेर परीक्षा दिएको र त्यसयता नाम पर्खिएको झण्डै दुई वर्ष पुग्न लागेको गुनासो उनको छ ।
त्यस्तै, सिबिटीको परीक्षा दिएका पाँचथरका सफल मगरले कि कोरिया लग्ने ग्यारेण्टी गर्नुपर्ने कि इपिएस नै बन्द गर्नुपर्ने बताएका छन् । ‘रोस्टरमा भएका सबैलाई कि कोरिया लग्ने ग्यारेण्टी गर्नुपर्यो, कि इपिएस बन्द गर्नुपर्यो । यसरी गरिब नेपालीको पैसा र समय लुटिनेमात्र हो,’ मगरले भने । यदि नलग्ने भए परीक्षा दिने व्यवस्था खारेज गर्नुपर्ने भन्दै उनले आक्रोश पोखे ।
सन् २०२२/२३ को भाषा परीक्षामा पास भएकाहरुको रोस्टर अवधि सकिन लागेको अवस्था छ । हाल कृषि तथा पशुपालन, सीप विल्डिङ र उत्पादन क्षेत्रमा १७ हजारभन्दा बढीको रोस्टरमा नाम निस्किएर छनोटको पर्खाइमा छन् । अझ कृषि तथा पशुपालन क्षेत्रतर्फ त अर्को परीक्षा नभए रोस्टर नै खाली हुने अवस्था छ । यसतर्फ सन् २०२३ मा भएको परीक्षा नै पछिल्लो परीक्षा हो । त्यसबेला परीक्षा दिएकाहरुको रोस्टर अवधि करिब साढे दुई महिनामात्र बाँकी रहेको जनाइएको छ । साढे दुई महिनाभित्र नयाँ परीक्षा नभए कृषितर्फ जाने कामदार नै नहुने देखिन्छ ।
विगतकै परीक्षाबाट पास भएकाहरु ठूलो संख्यामा रहेकाले रोस्टर अवधि थप हुनुपर्ने र नयाँ परीक्षा लिन नहुने माग उनीहरुको छ । त्यस्तै, आन्दोलनमा सहभागी कतिपयले दुई वर्षको रोस्टर अवधिमा कम्पनीमा एक पटक पनि फाइल नपुगेको भन्दै शाखाप्रति आक्रोशसमेत पोखेका छन् । इपिएसले भने कामदार छनोटको कुनै प्रक्रियामा आफ्नो भूमिका नहुने बताउँदै आएको छ ।
शाखाका अनुसार सन् २००८ यता भाषा परीक्षा उत्तीर्ण भएर एक लाख २० हजारभन्दा बढी श्रमिकले कोरियामा रोजगारीको अवसर पाएका छन् । कोरियामा नेपालसहित १७ वटा मुलुकबाट श्रमिक जाने गरेका छन् । इपिएसमार्फत अन्य मुलुकको तुलनामा नेपालबाट बढी श्रमिक लग्दै आएको शाखाको भनाइ छ ।
