वर्कसपमा सहभागी हुन गएको बेला जापानस्थित नेपाली दूतावासमा गएर राजदूतलाई एसएसडब्ल्यू खोल्न आग्रह गरेपछि मागपत्र प्रमाणीकरणको काम सुरु भएको हो । सबै व्यवसायीलाई मागपत्र पेस गर्न अनुरोध छ ।
भुवनसिंह गुरुङ
अध्यक्ष, नेपाल वैदेशिक रोजगार व्यवसायी संघ
- यही अक्टोबर १४ बाट जापानस्थित नेपाली दूतावासले मागपत्र प्रमाणीकरण सुरु गरेको जानकारी
- व्यक्तिगत श्रम स्वीकृति लिएर जापान पुगेका अधिकांश समस्यामा रहेको पाइएको संघका अध्यक्ष भुवनसिंह गुरुङको भनाइ
काठमाडौं– जापानमा विशिष्ट सीप भएका कामदार (स्पेसिफाइड स्किल्ड वर्कर– एसएसडब्ल्यू) पठाउने मागपत्र प्रमाणीकरणको काम सुरु भएको छ । नेपाल वैदेशिक रोजगार व्यवसायी संघका अनुसार यही अक्टोबर १४ बाट जापानस्थित नेपाली दूतावासले मागपत्र प्रमाणीकरणको काम गरिरहेको छ ।
श्रमिक पठाउने १४ वटा मुलुकहरुको कार्यशालामा सहभागी हुन जापान पुगेका बेला संस्थागत तवरबाट अर्को काम गर्न सफल भएको संघका अध्यक्ष भुवनसिंह गुरुङले बताए । जापानस्थित नेपाली राजदूत डा. दुर्गाबहादुर सुवेदीसँगको भेटमा उक्त पहल गरेको र प्रमाणीकरण पनि सुरु भइसकेको गुरुङको भनाइ छ ।
‘वर्कसपमा सहभागी हुन गएको थिएँ । त्यही सिलसिलामा संस्थागत काम गर्न भनेर पाँच दिन बसाइ लम्ब्याएँ,’ उनले भने, ‘दूतावासमा गएर राजदूतलाई एसएसडब्ल्यू खोल्नुपर्छ भनेर विस्तृत कुरा भएपछि उहाँहरुको सहकार्य र समन्वयमा काम सुरु भएको हो । सबै व्यवसायीलाई मागपत्र पेस गर्न अनुरोध छ ।’
अध्यक्ष गुरुङले जापानमा कार्यरत नेपाली कामदारहरुसँग भेटघाट गरेको पनि बताए । भेटमा व्यक्तिगत श्रम स्वीकृति लिएर जापान पुगेका अधिकांशले दुःख पाएको र समस्यामा परेकाहरुको दुःख बुझिदिने कोही नभएको पाएको उनले बताए । जापानमा व्यक्तिगत श्रम स्वीकृति लिएर जानेहरुको संख्या धेरै छ । अघिल्लो आर्थिक वर्ष २०८०÷८१ मा २३ हजार ७१ जना जापान गएकामा एक हजार ५८१ जना संस्थागतरुपमा गएका थिए भने १७ हजार १६३ जना व्यक्तिगत श्रम स्वीकृति लिएर गएका थिए ।
जापान सरकारले एसएसडब्ल्यूमा १६ वटा क्षेत्र समेटेको छ । जसमा नर्सिङ तथा स्याहारसुसार, भवन सरसफाइ, व्यवस्थापन, औद्योगिक पार्टपुर्जा उत्पादन, अटोमोबाइल्स तथा यातायात व्यवसाय, उड्डयन क्षेत्र, रेल्वे, कृषि, काठ उद्योग, कच्चापदार्थ उद्योग आदि रहेका छन् । एसएसडब्ल्यूमा जान जापानी भाषाको आधारभूत परीक्षण वा जापानी भाषा दक्षता परीक्षाको लेभल चार उत्तीर्ण भएको हुनुपर्छ । नर्सिङ क्षेत्रमा आवेदन दिने व्यक्तिले भने नर्सिङ स्याहारसुसारसम्बन्धी छुट्टै जापानी भाषा मूल्यांकन परीक्षा उत्तीर्ण भएको हुनुपर्ने व्यवस्था छ ।
