काठमाडौं- कुवेतस्थित नेपाली दूतावासका लागि श्रम सहचारी पदमा आवेदन दिएका उम्मेदवारहरुले यही असोज ३१ गते व्यावसायिक कार्ययोजना प्रस्तुत गर्ने भएका छन् ।
श्रम, रोजगार तथा सामाजिक सुरक्षा मन्त्रालयले उक्त पदका लागि आवेदन प्राप्त उम्मेदवारहरुलाई आफ्नो व्यावसायिक कार्ययोजना प्रस्तुतीकरण गर्न उक्त दिनको समय तोकेको हो । मन्त्रालयले गत बिहीबार सूचना प्रकाशित गरी व्यावसायिक योजना प्रस्तुतीकरण सुरु हुनु अगाडि नै आफ्नो योग्यताको प्रमाणपत्र बुझाउन उम्मेदवारहरुलाई आग्रह गरेको छ ।
त्यसअघि व्यावसायिक कार्ययोजना तयारी भने एक दिनअघि अर्थात् असोज ३० गते हुने भएको छ । मन्त्रालयले जारी गरेको सूचनाअनुसार व्यावसायिक योजना तयारी र प्रस्तुतीकरण सिंहदरबारस्थित मन्त्रालयको सभाकक्षमा हुने छ । असोज ३० गतेको योजना तयारीका लागि दिउँसो ४ः०० देखि ४ः३० बजेसम्मको समय तोकिएको छ । यसैगरी योजना प्रस्तुतीकरणका लागि असोज ३१ गते दिउँसो ४ः०० बजेको समय तोकिएको मन्त्रालयले जानकारी दिएको छ ।
मन्त्रालयले यही असोज ६ गते सूचना प्रकाशित गरी निकट भविष्यमा रिक्त हुने पदमा श्रम सहचारी छनोट तथा नियुक्तिका लागि आवेदन आह्वान गरेको थियो । मन्त्रालयले ‘काउन्सेलर (श्रम) तथा श्रम सहचारी छनोट तथा नियुक्तिसम्बन्धी मापदण्ड,२०८१’ अनुसार तोकिएबमोजिमको योग्यता पुगेका इच्छुक कर्मचारीहरुले असोज २६ गतेभित्र आफ्नो व्यक्तिगत विवरण उल्लेख गरी अनुसूची–२ बमोजिम निवेदन दिन सूचनामार्फत आह्वान गरेको थियो ।
कुवेतस्थित राजदूतावासमा काम गर्नका लागि एक जना श्रम सहचारी छनोट गरिने छ । श्रम मन्त्रालयमा कार्यरत रहेका महाशाखा प्रमुखहरुमध्ये वरिष्ठ सहसचिवको संयोजकत्वमा गठित सिफारिस समितिले आवेदकहरुको मूल्यांकन गरी सचिवसमक्ष सिफारिस गर्ने व्यवस्था छ ।
श्रम सहचारी पद नेपाल सरकारको राजपत्रांकित तृतीय श्रेणी अधिकृतस्तरको हुन्छ । काउन्सेलर (श्रम) तथा श्रम सहचारीले आफू कार्यरत रहेको दूतावास वा नियोग प्रमुखको प्रत्यक्ष नियन्त्रणमा रही अन्य कूटनीतिक कर्मचारीसरह काम गर्ने र निजले कूटनीतिक कर्मचारीका लागि तोकिएको आचरणको पालना गर्नुपर्ने मापदण्डमा उल्लेख गरिएको छ ।
यस्तो छ योग्यताको व्यवस्था
काउन्सेलर (श्रम) तथा श्रम सहचारी छनोट तथा नियुक्तिसम्बन्धी मापदण्डअनुसार नेपाल प्रशासन सेवा, सामान्य प्रशासन समूहका कर्मचारीले काउन्सेलर (श्रम) तथा श्रम सहचारी पदमा नियुक्तिका लागि उम्मेदवार बन्न पाउने छन् । आवेदन फाराम भर्ने अन्तिम मितिसम्म छनोट हुने पदका निमित्त आवश्यक पर्ने श्रेणी र पदमा सेवा अवधि कम्तीमा तीन वर्ष पूरा भएको र अनुसूची–१ मा उल्लिखित कार्यालयमा लगातार कम्तीमा एक वर्षदेखि कार्यरत रहेको हुनुपर्ने मापदण्डमा उल्लेख छ । यद्यपि, पदस्थापन मन्त्रालय वा अन्तर्गत भई अन्यत्र निकायमा काजमा रहेको अवधिबाहेक अन्यत्र दरबन्दी रही श्रम, रोजगार तथा सामाजिक सुरक्षा मन्त्रालय र मातहत निकायमा अविच्छिन्न कार्यरत अवधिलाई समेत गणना गरिने मापदण्डमा प्रस्ट पारिएको छ ।
‘अंग्रेजी भाषामा आइइएलटिएस परीक्षणमा कम्तीमा ६.० स्कोर वा टोफेल पिबिटी÷आइबिटी मध्ये कुनै एउटा परीक्षामा कम्तीमा क्रमशः ५५०/२१३/७९ स्कोर हासिल गरेको वा पिटिई परीक्षामा कम्तीमा ५१ अंक प्राप्त गरेको र यस दफा अनुसारको भाषा परीक्षामा सहभागी भएको अवधि दुई वर्ष ननाघेको,’ श्रम सहचारी नियुक्तिका लागि तोकिएको योग्यतामा उल्लेख छ ।
उक्त मापदण्डअनुसार छनोटको सूचना प्रकाशन भएको मितिदेखि अनिवार्य अवकाशको अवधि दुई वर्षभन्दा कम भएको अवस्थामा श्रम सहचारी पदमा उम्मेदवार बन्न अयोग्य मानिने छ । साथै, छनोट सूचना प्रकाशन भएको मितिले विगत एक वर्षको अवधिमा कुनै विभागीय कारबाही पाएको, कुनै कसुरको अभियोगमा अनुसन्धानका लागि थुनामा रहेको वा निलम्बनमा रहेको अवधिभर, एकपटक काउन्सेलर (श्रम) तथा श्रम सहचारीमा रही काम गरिसकेको कर्मचारीले पनि उम्मेदवार बन्न पाउने छैनन् ।
‘काउन्सेलरका लागि निजामती सेवाको रा.प. द्वितीय श्रेणीको अधिकृतस्तरको पदमा र श्रम सहचारीका लागि निजामती सेवाको रा.प. तृतीय श्रेणीको अधिकृतस्तरको पदमा अविच्छिन्न तीन वर्ष सेवा अवधि पूरा नभएको, छनोटको सूचना प्रकाशन भएको मितिदेखि लगत्तै अघिको दुई वर्षको अवधिमा पटक–पटक वा एकमुष्ठ रुपमा छ महिनाभन्दा बढी बेतलबी वा असाधारण बिदा बसेको,’ श्रम सहचारी छनोट तथा नियुक्तिका लागि अयोग्य हुने बुँदामा उल्लेख छ ।
-1787143572.jpg)
