नेपालमा गत भदौ २३ र २४ गते भएको जेन–जी आन्दोलनका क्रममा भएको तोडफोड र आगजनीपछि विभिन्न मुलुकले नेपाली नागरिकलाई भिसामा कडाइ गर्न थालेको सन्दर्भमा दूतावासको यस्तो सूचना आएको हो । यसअघि युएईस्थित नेपाली दूतावासले पनि यस्तै सूचना जारी गरेको थियो ।
काठमाडौं– कतारस्थित नेपाली राजदूतावासले त्यहाँको नियम, कानुन, सांस्कृतिक मूल्यमान्यता पूर्णरुपमा पालना गर्न नेपालीहरुलाई सचेत गराएको छ । दूतावासले बुधबार जरुरी सूचना जारी गर्दै कतारमा कार्यरत नेपालीहरुलाई यस्तो आग्रह गरेको हो ।
‘कतारमा विभिन्न पेसा र व्यवसायमा कार्यरत रहनुभएका सम्पूर्ण नेपाली दिदीबहिनी र दाजुभाइहरूलाई कतारको नियम, कानुन, सांस्कृतिक मूल्य–मान्यता पूर्णरुपमा पालना गर्न नेपाली राजदूतावास, दोहा हार्दिक अनुरोध गर्दछ,’ सूचनामा भनिएको छ ।
नेपालमा गत भदौ २३ र २४ गते भएको जेन–जी आन्दोलनका क्रममा भएको तोडफोड र आगजनीपछि विभिन्न मुलुकले नेपाली नागरिकलाई भिसामा कडाइ गर्न थालेको सन्दर्भमा दूतावासको यस्तो सूचना आएको हो । यसअघि युएईस्थित नेपाली दूतावासले पनि यस्तै सूचना जारी गरेको थियो । जेन–जी आन्दोलनपछि युएईले नेपालीलाई भिजिट भिसा र कामदार भिसा दुवै रोकेको अवस्था छ । कतारसहित अन्य खाडी राष्ट्रहरु र युरोपका देशहरुले पनि भिसामा कडाइ गरेको बताइएको छ ।
‘सार्वजनिक स्थलमा मादकपदार्थको सेवन तथा झैझगडा, लागुपदार्थ ओसारपसार, मादकपदार्थ उत्पादन तथा बिक्री, अश्लील भिडियोको कारोबार, चेक बाउन्स, सामाजिक सञ्जालमा मिथ्या आरोप, गाली गलौज र चरित्रहत्या, तेस्रो मुलुक खासगरी पूर्वी युरोप पठाइदिने भनी ठगी कार्य, अध्यागमन र ट्राफिक नियमको उल्लंघन आदि दण्डनीय कार्य भएको हुँदा यस्ता कार्यहरूमा संलग्न नहुन र देहायका विषयहरूमा विशेष सावधानी अपनाउनुहुन सम्पूर्ण नेपाली समुदायमा हार्दिक अनुरोध गर्दछ,’ कतारस्थित नेपाली दूतावासको सूचनामा थप भनिएको छ ।
दूतावासले सूचनामा कतारमा रहँदा पालना गर्नुपर्ने विषयहरु १७ वटा बुँदामा उल्लेख गरी सार्वजनिक गरेको छ । जसमा कतारको कानुन, नियम र सांस्कृतिक मूल्य–मान्यताको पूर्ण पालना गर्ने, कतारको कानुनले निषेध गरेका कुनै पनि कार्यहरू नगर्ने, सार्वजनिकस्थलमा मादक पदार्थ र धूमपान सेवन नगर्ने भनिएको छ ।
यसैगरी, कुनै पनि व्यक्तिले दिएको सामान चेकजाँच नगरी नबुझ्ने, अध्यागमन र ट्राफिक नियमको सधैं पालना गर्ने, जहाँसुकै र जहिलेसुकै शिष्ट, मर्यादित र अनुशासित व्यवहार गर्ने, कसैसँग कुनै किसिमको नगद कारोबार वा लेनदेन नगर्ने, प्रलोभनमा परेर वा नबुझिकन कुनै कागजातमा सही गर्न नहुने, आफ्नो राहदानी, कतार परिचयपत्र, बैंक खाता नम्बर, फोनको सीम कार्ड कसैलाई पनि नदिने र कतार आइडी बुझाइ कुनै किसिमको बैंक ऋण नलिनेलगायत बुँदा सूचनामा उल्लेख छ ।
दूतावासले एउटा कम्पनीको कतार आइडी लिएर अर्को कम्पनीमा काम गर्नु अवैधानिक हुनेसमेत सचेत गराएको छ । साथै, नेपालबाट भाङको अचार, मर्चाजस्ता खाद्यवस्तुहरू ल्याउन र लेनदेन नगर्न आग्रह गरिएको छ ।‘सामाजिक सञ्जालहरूमा व्यक्तिगत चरित्र हत्या गर्ने तथा सामाजिक सद्भाव खलबल्याउने किसिमले जथाभावी पोस्ट नगर्ने, नेपाली चाडपर्वहरू मनाउँदा स्थानीय धार्मिक र सांस्कृतिक संवेदनशीलता तथा मूल्यमान्यतालाई गम्भीरताका साथ ध्यान दिनुपर्ने । चाडपर्व होस वा अन्य समय, कुनै पनि बेला जुवातास खेल्न नहुने, सार्वजनिक स्थलमा फोटो खिच्दा र टिकटकलगायतका भिडियो बनाउँदा अपरिचित व्यक्तिहरूलाई फ्रेममा लिन नहुने,’ दूतावासले उल्लेख गरेको बुँदामा छ ।
सार्वजनिकस्थलमा अमर्यादित, उच्छृंखल र भड्किलो पोसाक लगाएर नहिँड्न पनि दूतावासले सचेत गराएको छ । कतार सरकारको सम्बन्धित निकायबाट पूर्वस्वीकृति नलिई कुनै पनि कार्यक्रम नगर्न र नेपाली समुदायबीच एकता कायम गर्न सबै संघसंस्था र समाजहरूबीच आपसी सद्भाव र सहयोग अभिवृद्धि गर्न दूतावासले आग्रह गरेको छ ।कतार नेपालीहरुको प्रमुख रोजगार गन्तव्य मुलुकमध्येको एक हो । त्यहाँ लाखौं संख्यामा नेपालीहरु कार्यरत छन् । जेन–जी आन्दोलनपछि युएईले नेपाली नागरिकलाई भिसा रोके पनि कतारले हालसम्म भिसा दिइरहेको व्यवसायीहरुले बताएका छन् ।
