- सबैभन्दा बढी युएई जान २५ हजार २१८ जनाले लिए श्रम स्वीकृति
- व्यक्तिगत श्रम स्वीकृति लिएर सबैभन्दा बढी रोमानियामा दुई हजार ३४४ जना गएको तथ्यांक
- भदौमा विदेसिनेमा धनुषाबाट सबैभन्दा धेरै तीन हजार ३०३ जना
- सबैभन्दा धेरै श्रमिक पठाउने म्यानपावरमा प्याराडाइज इन्टरनेसनल
काठमाडौं- चालु आर्थिक वर्ष २०८२/८३ को सुरुआती दुई महिनामै झण्डै डेढ लाख युवा रोजगारीका लागि विदेसिएका छन् । वैदेशिक रोजगार विभागले सार्वजनिक गरेको तथ्यांकअनुसार चालु आवको साउन र भदौ महिनामा वैदेशिक रोजगारीमा जान एक लाख ३६ हजार ८२ जनाले श्रम स्वीकृति लिएका छन् ।
विभागका अनुसार भदौ महिनामा विभागबाट ६७ हजार ९७२ जनाले श्रम स्वीकृति लिएका छन् । जसमा ५९ हजार ९२३ जना पुरुष र आठ हजार ४९ जना महिला छन् । यो संख्या व्यक्तिगत, संस्थागत र पुनः श्रम स्वीकृति लिएर जानेहरुको हो । यसअघि साउन महिनामा ६८ हजार ११० जना श्रम स्वीकृति लिएर विदेसिएका थिए । भदौमा यस्तो संख्या करिब डेढ सयले मात्र घटेको हो ।
भदौ महिनामा संस्थागत माध्यमबाट ३३ हजार एक जना, व्यक्तिगत श्रम स्वीकृति लिएर ११ हजार ७७५ जना र श्रम स्वीकृति नवीकरण गरेर २२ हजार २४० जना गएको विभागको तथ्यांकमा उल्लेख छ । यसैगरी, जिटुजीमार्फत ९०१ जना गएका छन् । जसमा ७४५ जना दक्षिण कोरिया र १५६ जना इजरायल गएका हुन् । वैधानिकीकरण प्रक्रियामार्फत ५५ जनाले श्रम स्वीकृति लिएको विभागले उल्लेख गरेको छ ।
विभागको तथ्यांक अनुसार भदौमा विदेसिएकामध्ये ३७ हजार ७० जना दक्ष श्रमिक छन् । जसमा ३१ हजार ९३२ जना पुरुष र पाँच हजार १३८ जना महिला हुन् । यस्तै ११ हजार ४१८ जना अर्धदक्ष, १९ हजार १३५ जना अदक्ष, ११३ जना उच्च दक्ष भएका र २३६ जना व्यावसायिक कामदारका रुपमा जान श्रम स्वीकृति लिएको विभागले जानकारी दिएको छ ।
प्रमुख पाँच गन्तव्य
गत महिना सबैभन्दा धेरै संयुक्त अरब इमिरेट्स (युएई) गएका छन् । युएईमा २२ हजार ३०० पुरुष र दुई हजार ९१८ जना महिला गरी कूल २५ हजार २१८ जना रोजगारीमा गएका छन् । त्यस्तै दोस्रोमा सबैभन्दा धेरै कतारमा १० हजार ३६९ जना गएका छन् । जसमा नौ हजार ४९२ जना पुरुष र ८७७ जना महिला छन् ।
साउदी अरेबियामा १० हजार १५८ जना पुरुष र ४३ महिला गरी १० हजार २०१ जना, मलेसियामा पाँच हजार १२८ जना र कुवेतमा तीन हजार ६९६ जना गएको विभागले उल्लेख गरेको छ । यो संख्या व्यक्तिगत, संस्थागत र श्रम स्वीकृति नवीकरण गरेर जानेहरुको हो । उक्त एक महिनामा संस्थागत माध्यमबाट सबैभन्दा बढी युएईमा १७ हजार ४०६ जना गएका छन् । व्यक्तिगत श्रम स्वीकृति लिएर सबैभन्दा बढी रोमानियामा दुई हजार ३४४ जना गएका छन् । त्यस्तै, श्रम स्वीकृति नवीकरण गरेर सबैभन्दा बढी छ हजार ४४० जना कतार गएको तथ्यांक छ ।
सो अवधिमा सबैभन्दा धेरै धनुषाबाट तीन हजार ३०३ जना विदेसिएका छन् । त्यसपछि झापाबाट तीन हजार ६३, मोरङबाट दुई हजार ७९३, सिरहाबाट दुई हजार ५१३ जना र महोत्तरीबाट दुई हजार ६०६ जना रोजगारीमा गएका छन् । सबैभन्दा कम भने मुस्ताङबाट २५ जनामात्र गएका छन् । भदौमा श्रमिकहरु रोजगारीका लागि विभिन्न ९८ मुलुकमा गएको विभागको तथ्यांकमा उल्लेख छ । जसमध्ये म्यानपावर व्यवसायीले १४ वटा मुलुकमा श्रमिक पठाएका छन् । व्यक्तिगत श्रम स्वीकृति लिएर भने ८६ वटा देशमा गएका छन् । त्यस्तै श्रम स्वीकृति नवीकरण गरेर ७४ वटा मुलुकमा गएका छन् ।
उक्त तथ्यांकअनुसार ७२ वटा मुलुकमा १०० जनाभन्दा कम श्रमिक गएका छन् । विभिन्न २० वटा मुलुकमा एक जनामात्र कामदार गएका छन् । भदौ महिनामा सबैभन्दा धेरै ८२१ जना श्रमिक प्याराडाइज इन्टरनेसनल म्यानपावर कम्पनीले पठाएको छ । ५३ वटा म्यानपावर कम्पनीले एक जनामात्र श्रमिक पठाएका छन् ।
