काठमाडाैं - संयुक्त अरब इमिरेट्स (यूएई)ले नेपाली नागरिकका लागि वर्किङ भिसासँगै भिजिट भिसा पनि बन्द गरेको छ। नेपालमा जेन-जी आन्दोलनका क्रममा भएको तोडफोड, आगजनी, लुटपाट र कैदी भाग्ने घटनापछि यूएईले यस्तो कदम चालेको जनाइएको हाे ।
दुबईस्थित विभिन्न कम्पनीहरूले भिसा टाइपिङ गर्नै नसक्ने र पहिले नै टाइप भएका भिसासमेत रद्द हुन थालेको जानकारी दिएका छन्। एक सुरक्षा कम्पनीले सेक्युरिटी गार्डका लागि पेश भएका भिसा अस्वीकार भएको जनाउँदा, वेयरहाउस र क्लिनिङ कम्पनीहरूले पनि आवेदन दर्ता भए तापनि दर्जनौँ नेपाली कामदारका भिसा नस्वीकृत भएको बताएका छन्।
यससँगै गणतन्त्र कोरियाले पनि ई–७ भिसामार्फत नेपाली श्रमिक लैजाने बाटो बन्द गरेको छ। वैदेशिक रोजगार विभागले मंगलबार सूचना जारी गर्दै श्रम, रोजगार तथा सामाजिक सुरक्षा मन्त्रालयको निर्देशनअनुसार ‘गणतन्त्र कोरियामा सीपयुक्त श्रमिक पठाउनेसम्बन्धी कार्यविधि, २०८०’ कार्यान्वयन नगर्ने निर्णय गरेको हो।
हाल नेपालबाट कोरिया जाने श्रमिकहरू रोजगार अनुमति प्रणाली (ईपीएस)मार्फत मात्रै पठाइने व्यवस्था यथावत् रहने विभागले जनाएको छ।
