काठमाडौं- नेपाल वैदेशिक रोजगार व्यवसायी एकता समितिले जेन–जी आन्दोलका क्रममा ध्वस्त पारिएको सुकेधारास्थित प्रहरी चौकीको पुनर्निर्माण गरेको छ । सुकेधारादेखि नयाँ बसपार्कसम्म रहेका चौकीहरुको पुनर्निर्माण गर्ने योजनाअनुरुप उक्त काम थालिएको समितिका अध्यक्ष हरिबहादुर पाण्डे बताए । अब तिलिङटार र मछापोखरीको चौकी पनि चाँडै बनाउने उनले बताए ।
गत हप्ता भएको जेन–जी आन्दोलनबाट उक्त क्षेत्रमा पर्ने चारवटा चौकीमध्ये बसपार्क र सुकेधाराको चौकी पूर्णरुपमा ध्वस्त पारिएको थियो । चक्रपथ र तिलिङटारको चौकी मर्मत गर्नुपर्ने अवस्थामा छ । सबैभन्दा बढी क्षति भएको चक्रपथको चौकी बनाउन हेडक्वार्टरबाट बजेट आउने भएकाले त्यहाँ खर्च गर्ने रकम माछापोखरीको चौकीमा खर्च गरिने अध्यक्ष पाण्डेले बताए । उनका अनुसार माछापोखरीमा एक तलाको चौकी थियो । जलेर नष्ट भएको उक्त चौकीमा समितिले अर्को एक तला थपिदिने जानकारी दिएको छ । यसका लागि समितिले १५ लाख खर्च गर्ने अध्यक्ष पाण्डेले बताए । त्यहाँ खर्च गरेर बाँकी भएको रकम नेपाल वैदेशिक रोजगार व्यवसायी संघलाई सहयोग गर्ने उनको भनाइ छ ।
सुरक्षा संयन्त्रविनाको समाज असुरक्षित हुने भएकाले व्यवसायीकोसमेत सुरक्षालाई मध्यनजर गर्दै यो कदम चालिएको उनले बताए । ‘प्रहरीविनाको देश कस्तो हुने रहेछ भन्ने कुरा अहिले महसुस गरेका छौं । हामी व्यवसायमात्र गर्दैनौं । सामाजिक काम पनि गरिरहेका छौं,’ अध्यक्ष पाण्डेले भने, ‘विगतमा २०७२ को भूकम्प होस् या सिन्धुपाल्चेकको जुरे पहिरो, विपद्को बेला सहयोग गर्दै आएका छौं । सामाजिक उत्तरदायीत्वको हिसाबले यो काम गरिरहेका हौं ।’ दसैंभन्दा पहिला प्रहरीलाई ओतमुनि बसेर काम गर्ने वातावरण मिलाउन दिनरात खटिरहेको उनले बताए । समितिले तीनवटा समूह बनाएर कार्यविभाजन गरेको छ । सुकेधाराबाट चक्रपथसम्मका लागि नेपाल वैदेशिक रोजगार व्यवसायी संघका पूर्वउपाध्यक्ष सञ्जु गुरुङको संयोजकत्वमा कृष्ण ढकाल, गोविन्द कटवाललगायतले सहयोग गरेका थिए । चक्रपथदेखि बसुन्धराको तिलिङटारम्म संघका द्वितीय उपाध्यक्ष देवकुमार खोखालीको संयोजकत्वमा राज लामा, बिएन सुब्बा, लक्ष्मण पौडेल, नरेश अर्लामी मगरलगायतले काम गरिरहेको समितिले जानकारी दिएको छ । दुई–तीन दिनमा उक्त चौकीको पुनर्निर्माण सम्पन्न गरेर हस्तान्तरण गर्ने समितिको भनाइ छ ।
बसुन्धरादेखि माछापोखरीसम्म समितिका अध्यक्ष पाण्डेकै संयोजकत्वमा सुशिल केसी, हरिस कुँवर, तारानाथ अर्याल, नरेन्द्र ढकाल, जगतनारायण श्रेष्ठ, एमबहादुर बिसी, नूरमोहम्मद मियाँ, भीष्मराज सिवाकोटी, निर्मल जिसी, शालिकराम गौतम, विनोदजंग केसीलगायतले समन्वय गरिरहेको जानकारी दिइएको छ ।
