काठमाडौं– वैदेशिक रोजगारीमा मृत्यु भएकाको परिवारका सदस्यलाई दिइने आर्थिक सहायता लिने संख्या बढ्न थालेको छ । गत आर्थिक वर्ष २०८१/८२ मा यस्तो सहायता एक हजार ५१७ जनाका परिवारले लिएका छन् । यो एक आर्थिक वर्षमा वैदेशिक रोजगार बोर्डबाट लिइएको सबैभन्दा धेरै सहायता हो ।
बोर्डको पछिल्लो पाँच वर्षको तथ्यांकअनुसार आर्थिक वर्ष २०८०/८१ मा एक हजार ३४६ जनाले यस्तो सहायता लिएका थिए । जसमा एक हजार ३०५ जना पुरुष र ४१ जना महिला थिए । त्यस्तै आव २०७९/८० मा एक हजार २७६, २०७८/७९ मा एक हजार ५१२, ०७७/७८ मा एक हजार २४३ र ०७६/७७ मा ६८१ जनाले सहायता लिएको बोर्डको तथ्यांक छ ।
बोर्डले करार अवधिभित्रै या करार अवधि सकिएको एक वर्षभित्र वैदेशिक रोजगारीको सिलसिलामा मृत्यु भएका कामदारका परिवारलाई आर्थिक सहायता प्रदान गर्छ । वैदेशिक रोजगार नियमावली पाँचौं संशोधनका अनुसार यस्तो सहायता स्थानीय तहबाट पनि लिन सकिन्छ ।
विगतमा करार अवधि समाप्त भएको एक वर्षभित्र बोर्डमा उपस्थित भए त्यस्ता परिवारका सदस्यलाई सात लाख रुपैयाँ सहायता दिइँदै आएको थियो । श्रम, रोजगार तथा सामाजिक सुरक्षा मन्त्रालयले गत आर्थिक वर्षबाट मृतकका परिवारलाई दिइने क्षतिपूर्ति बढाएर १० लाख रुपैयाँ पु¥याएको छ । पछिल्लो समय बोर्डले प्रदान गर्ने कल्याणकारी सेवाको विषयमा जानकारी विस्तार भएका कारण सहायता लिन आउनेहरु बढेको जनाइएको छ ।
बोर्डले आव २०८१/८२ मा एक हजार ८६, २०८०/८१ मा ९६६, २०७९/८० मा ८१९, २०७८/७९ मा ७९५, २०७७/७८ मा ७७० र २०७६/७७ मा ६८८ जनाको शव ढुवानी तथा झिकाउन सहजीकरण गरिदिएको तथ्यांकमा देखिन्छ । बोर्डले सम्बन्धित देशको दूतावाससँगको सहकार्यमा शव झिकाउनका लागि सहकाय गर्दै आएको जानकारी दिएको छ ।
उक्त अवधिमा वैदेशिक रोजगारी गएका कति श्रमिकको मृत्यु भयो भन्ने यकीन तथ्यांक भने आफूहरुसँग नभएको बोर्डको भनाइ छ । एक वर्षभित्र मृतकका परिवारले लिने आर्थिक सहायताका आधारमै मृतकको संख्या अनुमान गरिँदै आएको बोर्डका अधिकारीहरु बताउँछन् ।पछिल्लो समय वैदेशिक रोजगारीमा जानेहरुको संख्या बढ्दा मृतकको संख्या पनि बढ्दै गएको छ । बढ्दो क्रममा रहेको मृत्युदरलाई घटाउन आवश्यक पहल गर्नुपर्ने सरोकारवालाहरुको भनाइ छ ।
विभिन्न आर्थिक वर्षको तथ्यांक हेर्दा रोजगारीमा जानेहरु हृदयघात, सडक दुर्घटना, कार्यस्थल दुर्घटना, आत्महत्या, बिरामी, प्राकृतिक मृत्यु र अन्य विभिन्न कारणले ज्यान गुमाउने गरेका छन् । बोर्डको अध्ययनअनुसार सबैभन्दा बढी श्रमिकको स्वास्थ्य समस्याका कारण ज्यान गएको पाइएको छ ।
अंगभंग भएकालाई आर्थिक सहायता
बोर्डले रोजगारीका क्रममा अंगभंग भएका तथा गम्भीर बिरामीलाई पनि आर्थिक सहायता दिने गरेको छ । गत आव २०८१/८२ मा ८६७ जनाले यस्तो सहायता लिएका थिए । त्यस्तै, २०८०/८१ मा ६५३, २०७९/८० मा २७९, २०७८/७९ मा २४५ जना, २०७७/७८ मा १४३ जना २०७६/७७ मा २०५ जनाले सहायता लिएका थिए । पछिल्लो छ वर्षमा सबैभन्दा धेरै गत आर्थिक वर्षमा र सबैभन्दा कम आव २०७७/७८ मा यस्तो सहायता लिएको तथ्यांक छ ।
