काठमाडौं- नेपालमा व्यवसायिक शिक्षा र रोजगारीबीचको खाडललाई कम गर्ने उद्देश्यसहित इम्बार्क कलेजले दुई नयाँ कार्यक्रम सार्वजनिक गरेको छ । व्यावहारिक सीप तालिम (अप्रेन्टिससिप) कार्यक्रम र नवप्रवर्तन (स्टार्टअप) क्षमता विकास कार्यक्रम रहेका छन् ।
कलेजका कार्यकारी निर्देशक तथा सिइओ आशिष ठाकुरका अनुसार यी कार्यक्रमहरूले स्नातकलाई शैक्षिक जीवनपछि व्यावसायिक जीवनमा प्रवेश गर्दा हुने अनिश्चितता हटाइ करियर-रेडी शिक्षाको नयाँ मापदण्ड स्थापित गर्ने भएको छ । अप्रेन्टिससिप कार्यक्रममार्फत विद्यार्थीहरूले उद्योगसँग प्रत्यक्ष संलग्न भएर सीप सिक्ने, संरचित तालिम पाउने र रोजगारी सुनिश्चित गर्ने अवसर पाउनेछन् । यसमा सहभागी कम्पनीहरूले सीप आवश्यकताको मूल्याङ्कन अनुसार रोजगारी उपलब्ध गराउने छ। नियमित मूल्याङ्कन, व्यावसायिक परामर्श र दीर्घकालीन साझेदारी सम्झौता यस कार्यक्रमका विशेषता रहेको कलेजले जनाएको छ ।
त्यस्तै, स्टार्टअप क्षमता विकास कार्यक्रमले १० वर्षभन्दा कम समयदेखि सञ्चालनमा रहेका र वार्षिक कारोबार १५ करोडभन्दा कम भएका नवप्रवर्तन व्यवसायलाई सहयोग गर्नेछ । नेपाल सरकारको राष्ट्रिय स्टार्टअप नीति २०८० र औद्योगिक उद्यम ऐन २०७६ सँग मेल खाने गरी सञ्चालन हुने यस कार्यक्रमले कानुनी रूपमा दर्ता भएका स्टार्टअपहरूलाई व्यवसाय योजना, वित्तीय विवरण र परीक्षण समीक्षामार्फत छनोट गर्ने भएको छ ।
सीईओ ठाकुरले भने,‘नेपालमा उद्यमशीलताको सम्भावना अपार छ, तर रणनीतिक स्रोतहरूमा पहुँच अभाव छ। हाम्रो कार्यक्रमले नवप्रवर्तनलाई दीगो व्यवसायमा रूपान्तरण गर्ने समग्र क्षमता विकासमा जोड दिनेछ ।’ यी दुवै कार्यक्रमले सरकारको नीति अनुरूप समृद्ध उद्यमशील पारिस्थितिक तन्त्र निर्माणमा टेवा पुर्याउने अपेक्षा गरिएको छ । अप्रेन्टिससिप कार्यक्रममा उद्योगका लागि दक्ष जनशक्ति, विद्यार्थीका लागि सुनिश्चित रोजगारी र स्टार्टअप कार्यक्रममा आयात निर्भरता घटाउँदै, स्वदेशी नवप्रवर्तन र प्रविधि क्षमताको विकास गर्ने भएको छ । आवेदनका लागि, अप्रेन्टिससिप कार्यक्रममा सीप मूल्याङ्कन, शैक्षिकरसीप कागजात र संरचित अन्तर्वार्ता आवश्यक हुनेछन् भने, स्टार्टअप कार्यक्रममा कानुनी दर्ता प्रमाणपत्र, वित्तीय विवरण र नवप्रवर्तन दर्शाउने व्यवसाय योजना पेस गर्नुपर्नेछ ।
ललितपुर, पुल्चोकस्थित इम्बार्क कलेजले हाल बिएससी( बिजीनेस म्यानेजमेन्ट) एमबिए र एसीसीए कार्यक्रम सञ्चालन गर्दै आएको छ । कलेजले नेपालमा व्यवसायिक नेतृत्व उत्पादन गर्दै आर्थिक विकास र नवप्रवर्तनलाई अघि बढाउने लक्ष्य लिएको छ ।
-1755862759.jpeg)
