काठमाडौं- श्रम, रोजगार तथा सामाजिक सुरक्षामन्त्री शरतसिंह भण्डारीले कोरिया सरकारले नेपालमा रोजगार अनुमति प्रणाली (इपिएस) कार्यक्रम सञ्चालन गरी नेपाली युवाहरुलाई रोजगारीको अवसर प्रदान गरेकोमा धन्यवाद दिएका छन् ।
बुधबार मन्त्रालयमा कोरिया सरकारको श्रम तथा रोजगार मन्त्रालय र मानव संसाधन विभागको प्रतिनिधिमण्डलसँग भएको छलफलमा मन्त्री भण्डारीले इपिएस कार्यक्रममार्फत अवसर पाएका युवाहरुले कोरियाको विकासमासमेत योगदान पुर्याएको धारणा राखे । उनका अनुसार कोरिया नेपाली युवाहरुका लागि आकर्षक रोजगार गन्तव्यको रुपमा स्थापित भइसकेको छ । ‘पाँच हजारका लागि खुलाइएको कोटामा एक लाखभन्दा बढीले आवेदन दिनु कोरिया जान युवाहरु कति इच्छुक छन् भन्ने स्पष्ट प्रमाण हो,’ मन्त्री भण्डारीले भने । उनले नेपाली युवाहरुलाई केवल रोजगारीका लागिमात्र नभई कोरियामा काम गर्ने संस्कार, उच्च प्रविधिको ज्ञान र सीप हासिल गर्न पठाउनुपर्ने बताए । उनले विदेशमा काम गरेर केही पुँजीसहित फर्किएपछि मुलुकको विकासमा योगदान दिने विश्वास व्यक्त गरे । ‘सीपविनाको रोजगारी सम्भव हुँदैन,’ मन्त्री भण्डारीले भने, ‘त्यसैले कोरियाको प्रविधि नेपालमा हस्तान्तरण गर्दै दक्ष जनशक्ति उत्पादन गर्ने हाम्रो प्राथमिकता हो ।’ उनले विस्तारै निजी तालिम प्रदायक संस्थाहरुलाई मापदण्ड र गुणस्तर निर्धारण गरेर तालिम सञ्चालन गर्ने आधार तयार गर्ने पनि जानकारी दिए ।
कोरियाको हुण्डाई मोटर कम्पनीले नेपालमा अटोमोबाइल एसेम्बल गर्ने तयारी भइरहेकाले गुणस्तरीय तालिम र दक्ष जनशक्ति उत्पादन अनिवार्य रहेको उनले बताए । कोरियन सरकारले अहिले पनि विभिन्न माध्यमबाट नेपालमा दक्ष जनशक्ति निर्माणमा सहयोग गर्दै आएको छ । मन्त्री भण्डारीले कोरियाबाट आएको उच्च प्राविधिक टोलीले दुवै देशको हित हुनेगरी ठोस निष्कर्षसहित अघि बढ्ने विश्वास व्यक्त गरे ।
नेपाल सरकार र कोरिया सरकारबीच अटोमोबाइल, वेल्डिङ, प्लम्बर र इलेक्ट्रिोनिक्स गरी चार क्षेत्रमा उच्च गुणस्तरका तालिम सञ्चालन गर्ने सम्झौता भएको छ । यस कार्यक्रममार्फत दक्ष जनशक्ति उत्पादन गर्ने उद्देश्यले कोरियाले नेपाललाई सहयोग उपलब्ध गराएको मन्त्रालयले जानकारी दिएको छ ।
-1755862759.jpeg)
