काठमाडौं- संयुक्त अरब इमिरेट्स (युएई)स्थित नेपाल राजदूतावासले त्यहाँ कार्यरत नेपाली विज्ञहरुलाई समेटेर विभिन्न कार्यक्रम सञ्चालन गर्ने भएको छ । विदेशमा कार्यरत विद्वत् वर्गलाई मुलुकको विकास प्रक्रियामा परिचालन गर्ने उद्देश्यका साथ उक्त कार्यक्रम सञ्चालन गर्न लागिएको हो ।
यसका लागि दूतावासले युएईमा कार्यरत डाक्टर, इञ्जिनियर, आइटी इञ्जिनियर, पाइलट, चार्टर्ड एकाउण्टेण्ट, प्राध्यापक, अनुसन्धान तथा नवप्रवर्तन, प्रबन्धक, विज्ञान प्रविधिलगायत क्षेत्रका विज्ञ व्यक्तिहरुको विवरण संकलनको काम थालेको छ । दूतावासले सोमबार एक सूचनामार्फत उल्लिखित विषयका विज्ञ व्यक्तिहरुलाई आफ्नो विवरण उपलब्ध गराउन आह्वान गरेको छ । दूतावासले उपलब्ध गराएको क्विआरमार्फत आफ्नो विवरण पठाउन सकिने दूतावासले जानकारी दिएको छ ।
‘विदेशमा रहेका विद्वत् वर्गलाई मुलुकको विकास प्रक्रियामा परिचालन गर्ने एवं उहाँहरुले मुलुकलाई पुर्उयानुभएको योगदानको कदर गर्ने उद्देश्यले परराष्ट्र मन्त्रालयअन्तर्गत प्रतिभा प्राप्ति केन्द्र (ब्रेन गेन सेण्टर) सञ्चालनमा रहेको छ,’ दूतावासको सूचनामा भनिएको छ, ‘विज्ञहरुलाई लक्षित गरी आयोजना गरिने अन्तरक्रियात्मक कार्यक्रम तथा परराष्ट्र मन्त्रालयअन्तर्गत सञ्चालित प्रतिभा प्राप्ति केन्द्रद्वारा अन्तर्राष्ट्रिय तथा विविध समसामयिक विषयहरुमा दक्षता एवं विज्ञता हासिल गरेका व्यक्तित्वहरुसँग नियमित अन्तरक्रिया गर्न आवश्यक देखिएकोसमेत जानकारी गराइन्छ ।’ यसैगरी युएईमा अध्ययनरत विद्यार्थी एवं ट्राभल/टुरिज्म र अन्य व्यावसायिक क्षेत्रमा काम गर्नेहरुको तथ्यांक संकलनका लागि छुट्टै सूचना जारी गरिने दूतावासले जानकारी दिएको छ ।
पछिल्लो समय युएई नेपालीहरुको प्रमुख रोजगार गन्तव्य बन्दै गएको छ । वैदेशिक रोजगार विभागले सार्वजनिक गरेको गत साउन महिनाको तथ्यांकअनुसार वैदेशिक रोजगारीमा जान श्रम स्वीकृति लिनेमध्ये सबैभन्दा बढी युएईका लागि रहेका छन् । साउन महिनामा युएई जानका लागि २३ हजार ८३८ जनाले श्रम स्वीकृति लिएका हुन् । जसमा २० हजार ३५७ जना पुरुष र तीन हजार ४८१ जना महिला रहेका छन् । यो संख्या संस्थागत, व्यक्तिगत र पुनः श्रम स्वीकृति लिएर जानेहरुको हो ।
