काठमाडौं- चालु आर्थिक वर्ष २०८२/८३ को पहिलो महिना साउनमा नेपालीहरुको पहिलो रोजगार गन्तव्य संयुक्त अरब इमिरेट्स (युएई) बनेको छ । वैदेशिक रोजगार विभागले सार्वजनिक गरेको तथ्यांकअनुसार उक्त महिना युएईमा जानका लागि २३ हजार ८३८ जनाले श्रम स्वीकृति लिएका हुन् ।
युएईका लागि श्रम स्वीकृति लिनेमा २० हजार ३५७ जना पुरुष र तीन हजार ४८१ जना महिला रहेका छन् । यो संख्या संस्थागत, व्यक्तिगत र पुनः श्रम स्वीकृति लिएर जानेहरुको हो । युएईपछि सबैभन्दा बढी श्रमिक कतार गएका छन् । कतारमा १२ हजार ८४ जना श्रमिक गएका छन् । जसमा ११ हजार ५४ जना पुरुष र एक हजार ३० जना महिला छन् । तेस्रोमा साउदी अरेबिया परेको छ, जहाँ रोजगारीका लागि जान नौ हजार ८१० पुरुष र ७५ जना महिला गरी नौ हजार ८८५ जनाले साउनभित्र श्रम स्वीकृति लिएको विभागको तथ्यांकमा देखिन्छ । चौथो बनेको मलेसियामा पाँच हजार ६२३ जना गएका छन् । मलेसिया जानेमध्ये पाँच हजार ५४८ जना पुरुष र ७८ महिला छन् । त्यस्तै सबैभन्दा बढी श्रमिक गएको मुलुकको पाँचौंमा कुवेत रहेको छ । जहाँ दुई हजार ७९२ जना पुरुष र एक हजार २७८ जना महिला गरी कूल चार हजार ७० जना गएका छन् ।
साउन महिनामा व्यक्तिगत श्रम स्वीकृति लिएर सबैभन्दा बढी युएई नै गएका छन् । साउनमा एक हजार ६१६ जना पुरुष र ८३२ जना महिला गरी कूल दुई हजार ४४८ जना व्यक्तिगत श्रम स्वीकृति लिएर युएई गएका हुन् । युएईपछि जापानमा रोजगारीका लागि एक हजार ९२१ जना व्यक्तिगत श्रम स्वीकृति लिएर गएको तथ्यांकमा उल्लेख छ । जसमा एक हजार २८२ जना पुरुष र ६३९ जना महिला छन् । जापान पछिल्लो समय नेपालीहरुको आकर्षक रोजगार गन्तव्य बन्दै गएको छ । व्यक्तिगत श्रम स्वीकृति लिएर क्रोएसियामा एक हजार २८३ जना रोजगारीका लागि गएका छन् । जसमा ९९० जना पुरुष र २९३ जना महिला छन् । यसैगरी कतारमा ९९१ जना र रोमानियामा ८४६ जना व्यक्तिगत श्रम स्वीकृति लिएर गएका विभागले जानकारी दिएको छ ।
विभागको तथ्यांकअनुसार साउनमा जिटुजी प्रणालीमार्फत दक्षिण कोरियामा ७८९ गएका छन् । कोरिया जानेमा ६९४ जना पुरुष र ९५ जना महिला छन् । कोरियामा व्यक्तिगत श्रम स्वीकृति लिएर ७८ जना गएको तथ्यांक छ, जसमा चार जना महिला छन् । त्यसैगरी, जिटुजीमार्फत ३० जना पुरुष र पाँच जना महिला गरी जम्मा ७५ जना इजरायल गएका छन् । साउनमा व्यक्तिगत, संस्थागत र श्रम स्वीकृति नवीकरण गरेर जम्मा १०५ वटा मुलुकमा नेपालीहरु गएका छन् । म्यानपावर कम्पनीहरुले विभिन्न १२ वटा मुलुकमा श्रमिक पठाएका छन् । व्यक्तिगत श्रम स्वीकृति लिएर युवाहरु ८८ वटा मुलुकमा रोजगारीका लागि पुगेका छन् । व्यक्तिगत श्रम स्वीकृति लिएर ३८ वटा मुलुकमा १० जनाभन्दा कम श्रमिक गएका छन् भने १५ वटा मुलुकमा एक जनामात्र श्रमिक गएका छन् ।
जिल्लागत तथ्यांकअनुसार रोजगारीका लागि सबैभन्दा बढी धनुषाबाट तीन हजार ३४८, झापाबाट दुई हजार ९६१, सिरहाबाट दुई हजार ८५५, महोत्तरीबाट दुई हजार ७४३ र मोरङबाट दुई हजार ७०७ जना रोजगारीका लागि विदेसिएका छन् । उनीहरु व्यक्तिगत संस्थागत र श्रम स्वीकृति नवीकरण गरेर गएका हुन् । सबैभन्दा कम मुस्ताङबाट ३० जनामात्र गएको विभागको तथ्यांक छ । रोजगारीमा गएका महिलाहरुमध्ये सबैभन्दा बढी झापाबाट ७१० जना मोरङबाट ५१२, सिन्धुपाल्चोकबाट ४१५, मकवानपुरबाट ४१० र काभ्रेबाट ३३२ जना रहेका छन् ।
उक्त एक महिनामा १९ हजार २४६ जना अदक्ष श्रमिक रोजगारीमा जाँदा ९३ जना उच्च दक्ष श्रमिक गएका छन् । त्यसैगरी दक्ष श्रमिक ३७ हजार ७१३, अर्धदक्ष श्रमिक १० हजार ७१८ र व्यावसायिक दक्षता भएका श्रमिक ३४० जना रोजगारीमा गएको विभागले उल्लेख गरेको छ ।
