काठमाडौं- चालु आर्थिक वर्ष २०८२/८३ को पहिलो महिना साउनमा रोजगारीका लागि ६८ हजारभन्दा बढी नेपाली विदेसिएका छन् । वैदेशिक रोजगार विभागले सार्वजनिक गरेको विवरणअनुसार उक्त एक महिनामा ६८ हजार ११० जनाले विभिन्न मुलुकमा रोजगारीका लागि जान श्रम स्वीकृति लिएका हुन् । श्रम स्वीकृति लिनेमा ५८ हजार ९४८ जना पुरुष र नौ हजार १६२ जना महिला रहेका छन् ।
साउन महिनामा रोजगारीका लागि विदेसिनेको संख्या अघिल्लो आर्थिक वर्षको साउनको तुलनामा आठ हजार ५३५ जनाले बढी हो । अघिल्लो आव २०८१/८२ को साउनमा ५९ हजार ५७५ जना श्रम स्वीकृति लिएर रोजगारीका लागि विभिन्न मुलुकमा गएका थिए । विभागको विवरणअनुसार गत साउनमा ३१ हजार ८३० संस्थागत माध्यमबाट रोजगारीका लागि विदेश गएका छन् । जसमा २९ हजार १३० जना पुरुष र दुई हजार ७०० महिला रहेका छन् । उक्त महिनामा व्यक्तिगत श्रम स्वीकृति लिएर ११ हजार ७७२ जना विदेसिएका छन् । व्यक्तिगत श्रम स्वीकृति लिनेमा आठ हजार ५४७ जना पुरुष र तीन हजार २२५ जना महिला छन् । तथ्यांकअनुसार रोजगारीमा गएका महिलाहरु संस्थागतभन्दा व्यक्तिगत श्रम स्वीकृति लिएर बढी गएको पाइएको छ । साउनमा श्रम स्वीकृति नवीकरण गरेर २३ हजार ६४४ जना रोजगारीमा गएका छन् । जसमध्ये २० हजार ५४७ जना पुरुष र तीन हजार ९७ जना महिला छन् । त्यस्तै जिटुजी प्रणालीमार्फत ६६४ जना गएका छन् । जसमा ७२४ जना पुरुष र १४० जना महिला छन् । जिटुजीमार्फत दक्षिण कोरिया, इजरायल र बेलायतमा कामदार जाने गरेका छन् ।
पछिल्लो समय बढ्दै गएको व्यक्तिगत ठगीका घटना साउन महिनामा पनि उस्तै देखिएको छ । विभागका अनुसार साउनमा वैदेशिक रोजगारीको प्रलोभनमा भएका ठगीसम्बन्धी ५८० वटा उजुरी परेका छन् । जसमध्ये ५२३ वटा व्यक्तिगत ठगीका उजुरी रहेका विभागले जानकारी दिएको छ । प्राप्त उजुरीमध्ये ७४ वटा मिलापत्र भएको र २६ वटा अदालतमा मुद्दा दायर भएको विभागको भनाइ छ । विभागले उक्त अवधिमा तीन करोड ५३ लाख ८३ हजार रुपैयाँ क्षतिपूर्ति उपलब्ध गराएको तथ्यांक छ । साउनमा विभागले १४८ वटा म्यानपावरको आकस्मिक र नियमित अनुगमन गरेको, दुईवटा अभिमुखीकरण संस्थाको कारोबार बन्द गरेको जानकारी दिएको छ । साउनमा १० वटा नयाँ म्यानपावर दर्ता भएका विवरणसमेत विभागले सार्वजनिक गरेको छ । यसैगरी, २८३ वटा म्यानपावर कम्पनीले नवीकरण भएका छन् ।
