काठमाडौं- दक्षिण कोरियाली प्रहरीले आप्रवासी कामदारहरूमाथि हुने दुव्र्यवहारविरुद्ध १०० दिने विशेष कारबाही सुरु गर्ने भएको छ । त्यहाँको आन्तरिक तथा सुरक्षा मन्त्रालयअन्तर्गतको कोरियाली राष्ट्रिय प्रहरी एजेन्सीले सोमबारबाट उक्त अभियान सुरु गरेको जानकारी दिएको छ ।
देशका १८ क्षेत्रीय प्रहरी एजेन्सीहरूले नोभेम्बर २५ सम्म विदेशी कामदारहरूलाई लक्षित गरी दुव्र्यवहारको बारेमा अनुसन्धान गर्न एक विशेष एकाइ गठन गरेको जानकारी दिइएको छ । जसमा हिंसा, आक्रमण, थुनामा राख्ने, जबरजस्ती गर्ने, अपमान गर्ने, यौन दुव्र्यवहार गर्ने र श्रम शोषणका घटनाहरूको अनुसन्धान गरिने भनिएको छ । अनुसन्धान टोलीलाई प्रान्तीय कार्यालयको आपराधिक कार्यदलबाट एउटा टोली र प्रहरी चौकीबाट एउटा टोलीमा विभाजन गरिएको भनिएको छ । प्रान्तीय कार्यालयको आपराधिक कार्यदलले कार्यस्थलको माथिल्लो र तल्लो सम्बन्धमा भएका अपराधहरूको अनुसन्धान गर्ने छ । साथै, अग्रपंक्ति प्रहरी चौकीले कर्मचारीहरूबीचको आक्रमणको जिम्मेवारी लिने उल्लेख गरिएको छ ।
गत जुलाई २४ मा सियोलबाट लगभग २८० किलोमिटर दक्षिणमा रहेको नाजुमा रहेको इँटा कारखानामा श्रीलंकाली कामदारलाई फोर्कलिफ्टमा बाँधेर उठाइएको भिडियो सार्वजनिक भएको थियो । उक्त भिडियो गत फेब्रुअरी २६ तारिखको भनिएको छ । गत नोभेम्बरमा कोरिया पुगेका ती श्रमिकमाथि काममा गल्ती गरेपछि कोरियाकै ५० वर्षीय फोर्कलिफ्ट चालकले दुव्र्यवहार गरेको भिडियो मानवअधिकारकर्मीहरुले सार्वजनिक गरेका थिए । सो घटनापछि इपिएस प्रणालीमा सुधार आवश्यक रहेको भन्दै देशव्यापीरुपमा आक्रोश बढेको थियो । प्रहरी एकाइहरूले ११२ आपत्कालीन कलहरूको विश्लेषण गरेर र गैरसरकारी संस्थाहरू र बहुसांस्कृतिक संस्थाहरूद्वारा सञ्चालित विदेशी कामदार सहयोग केन्द्रहरूबाट जानकारी संकलन गरेर मुद्दाहरू पहिचान गर्ने छन् । घटनाको प्रकृति हेरेर आवश्यक परेमा अनुसन्धान सुरु गर्ने छन् ।
अधिकारीहरूले त्यहाँको रोजगार तथा श्रम मन्त्रालयसँग संयुक्त रूपमा स्थलगत निरीक्षण गर्न हटलाइन पनि स्थापना गर्ने छन् । मन्त्रालयलाई यसको क्षेत्राधिकारअन्तर्गत पर्ने मुद्दाहरू, जस्तैः भुक्तानी नगरिएको ज्यालाजस्ता विषयमा तुरुन्तै जानकारी गराउने योजना बनाइने छ । आइतबार दक्षिण कोरियाका लागि श्रीलंकाका राजदूत सावित्री पानाबोक्केले नाजुको भ्रमण गर्दै आप्रवासी कामदारहरूको अधिकारको बलियो संरक्षण गर्दै मानवअधिकार उल्लंघन रोक्न प्रभावकारी उपायहरू अपनाउन आह्वान गरेको जानकारी दिइएको छ । यस्ता घटना हुनु खेदजनक घटनाको विरुद्धमा कोरियाले देखाएको कडा समर्थन र चिन्ताले आफूलाई आशावादी बनाएको उनको भनाइ थियो ।
