काठमाडौं- दक्षिण कोरियामा रोजगारीमा जान इच्छुकका लागि सञ्चालन गरिने कोरियन भाषा परीक्षामा सहभागी हुन एक लाख दुई हजार ५८७ जनाको आवेदन परेको छ । रोजगार अनुमति प्रणाली (इपिएस)मार्फत सन् २०२५ को पहिलो चरणका लागि खुलेको आवेदनभन्दा १९ गुना बढी आवेदन परेको हो ।
कोरियाले यस वर्षको पहिलो चरणमा पाँच हजार ३०० जनाको कोटा खुलाएको छ । जसमध्ये तीन हजार ५०० लाई उत्पादनतर्फ र एक हजार ८०० जनालाई कृषि तथा पशुपालनमा लग्ने भनिएको छ । परीक्षाका लागि परेका आवेदनमा उत्पादनमूलक क्षेत्रका लागि ६७ हजार ३२१ र कृषि तथा पशुपालनमा ३५ हजार २६६ जना रहेका श्रम, रोजगार तथा सामाजिक सुरक्षा मन्त्रालयअन्तर्गतको इपिएस कोरिया शाखाले जानकारी दिएको छ । मुलुकमा व्याप्त बेरोजगारी समस्या र दिगो रोजगारीको अभावका कारण मागभन्दा कयौं गुणा बढीको आवेदन परेको हो ।
शाखाका अनुसार यसपटक डेढ लाखले भर्ने अपेक्षा गरेकोमा अपेक्षाभन्दा केही कमले आवेदन दिएका हुन् । ‘सन् २०२३ मा एक लाख ६३ हजार जनाले भरेकाले त्यसलाई आधार मान्दा कम्तीमा डेढ लाखले भर्ने सोचेका थियौं । तर यसपालि कोटा थोरै भएकाले पनि जसलेचाहिँ पूर्वतयारी गरेका थिएनन्, उनीहरुले नभरेको हुनसक्छ । यही थोरै मागका लागि यो संख्या पनि बढी नै हो,’ एक अधिकारीले बताए ।
शाखाले आवेदकहरुको फाराम भेरिफाइ गर्ने काम थालिसकेको जानकारी दिएको छ । भेरिफाइ गर्ने काम सिस्टमबाटै हुने शाखाको भनाइ छ । नाम, जन्ममिति, लिंग आदि राहदानी विभागको एप्लिकेसनको सहयोगमा हेरिने जनाइएको छ । ‘कोहीले फोटो, पासपोर्ट बांगो, उल्टो हालिदिन्छन् । त्यस्तो डेटाहरु यो हप्ताभित्र भेरिफाइ गर्छौं,’ ती अधिकारीले भने । इपिएस शाखाले एक पटकमा पाँच-पाँच सय जनाको भेरिफाइ गर्दै उक्त फाराम कोरियाको सिस्टममा अपलोड गर्नुपर्ने छ । यसर्थ, सबै आवेदकहरुको फाराम कोरिया पुग्न झण्डै एक महिना लाग्ने जनाइएको छ । उता पठाइसकेपछि कोरियाबाटै सिट प्लान गरिन्छ । त्यसपछि इपिएसले परीक्षाको मिति सार्वजनिक गरेपछि व्यक्ति स्वयं उपस्थित भएर ट्याबबाट परीक्षा दिन्छन् । यसपटकको परीक्षा तिहारपछि हुने अनुमान गरिएको छ । भाषा परीक्षा उत्तीर्ण भएकाहरुले दोस्रो चरणको सीप परीक्षणमासमेत सहभागी भइ उत्तीर्ण भएपछि रोजगार आवेदन फाराम भर्न सक्ने छन् । परीक्षा दिनका लागि २८ डलर लाग्ने बताइएको छ ।
कोरियाले नेपाल सरकार र त्यहाँको श्रम, रोजगार तथा सामाजिक मन्त्रालयबीच भएको समझदारीपत्र (एमओयू) अनुरुप आवेदन खुलाउने गरेको छ । नेपालसहित १७ मुलुकबाट इपिएस प्रणालीमार्फत अदक्ष श्रमिकहरु लग्दै आएको छ । नेपालबाट श्रमिक लग्न थालिएको सन् २००८ यता एक लाख १७ हजार ५०० नेपाली युवाहरु भाषा परीक्षा उत्तीर्ण गरेर कोरिया गइसकेका छन् । गत आर्थिक वर्ष २०८१/८२ मा इपिएसमार्फत ११ हजार ५०० जना गएको वैदेशिक रोजगार विभागको तथ्यांक छ । हाल २० हजार युवा रोस्टरमा पालो कुरेर बसेका छन् ।
नेपाल सरकार र कोरियाकोे श्रम, रोजगार तथा सामाजिक मन्त्रालयबीच भएको समझदारी (एमओयू) अनुरुप आवेदन खुलाउने गरेको छ । आकर्षक सेवा सुविधा र पारदर्शी छनोट प्रणालीका कारण बर्सेनि लाखौं युवाहरु कोरिया जान भाषा परीक्षामा सहभागी हुन्छन् । तर रोजगारदाताले परीक्षामा उत्तीर्ण भएकाहरुबाट पनि छनोट गरेर लग्दा हजारौं युवाहरुको कोरिया जाने सपना अधुरै रहने गरेको छ ।
