काठमाडौं- संयुक्त अरब इमिरेट्स (युएई)मा कार्यरत नेपाली श्रमिकको वैधानिकीकरण श्रम स्वीकृति सेवा यही अगस्ट १८ तारिखबाट नियमितरुपमा हुने भएको छ । हाल युएईको अबुधाबी इमिरेट्समा कार्यरत नेपालीहरुले मात्र यो सेवा पाउने युएईस्थित नेपाली राजदूतावासले जारी गरेको सूचनामा जनाइएको छ ।
श्रम, रोजगार तथा सामाजिक सुरक्षा मन्त्रालयले जारी गरेको निर्देशिका अनुसार सन् २०२४ को सेप्टेम्बर ३० सम्म रोजगारीका लागि भिसा प्राप्त भई युएईमा कार्यरत नेपाली श्रमिकलेमात्र वैधानिक हुन पाउने सूचनामा उल्लेख छ ।गैरकानुनीरुपमा रहेका श्रमिकको श्रम स्वीकृति र कानुनी मान्यता नहुँदा विभिन्न सेवा सुविधाबाट वञ्चित हुने गरेकाले जुनसुकै तवरबाट वैदेशिक रोजगारीमा गएका श्रमिकलाई सरकारले सहयोग गर्नुपर्ने नीतिअनुरुप यो प्रक्रिया थालिएको मन्त्रालयले बताउँदै आएको छ ।
मन्त्रालयले त्यहाँ अवैधानिकरुपमा कार्यरत श्रमिकको वैधानिकीकरणका लागि निर्देशन दिएसँगै दूतावासले गत साउन १ गतेबाट प्रत्येक महिनाको पहिलो र तेस्रो शनिबार सेवा दिइने जनाएको थियो । अब भने उक्त सेवा नियमित बनाइने भएको छ । सूचनाअनुसार श्रमिकहरुले उक्त सेवा सोमबारदेखि शुक्रबारसम्म अपराह्न २ देखि ३ बजेसम्म दिइने जनाइएको छ । अन्य इमिरेट्सको हकमा भने सूचना प्रकाशन भएपछि सेवा दिइने दूतावासको सूचनामा उल्लेख छ ।
