काठमाडौं- इजरायलले दीर्घकालीन स्याहार केन्द्रको सहायक कामदार (केयर गिभर) का रुपमा जानका लागि छनोट भएका दोस्रो लटका उम्मेदवारको स्वास्थ्य परीक्षण गराउन अनुरोध गरेको छ । त्यहाँको जनसंख्या, आप्रवासन तथा सीमा प्राधिकरण (पिवा)ले तोकिएका १४० जनाको स्वास्थ्य परीक्षण माग गरेको वैदेशिक रोजगार विभागले सूचनामार्फत जानकारी दिएको छ ।
स्वास्थ्य परीक्षण गराउनुपर्ने सूचीमा १०० जना महिला र ४० जना पुरुष रहेका छन् । पहिलो लटका उम्मेदवार लगिसक्न लागेकाले दोस्रो लटकाहरुलाई तयारी अवस्थामा राख्न स्वास्थ्य परीक्षण गर्न भनिएको विभागका जिटुजी शाखा हेर्ने निर्देशक गिरिराज ज्ञवालीले बताए । ‘उनीहरुको मेडिकल र पिडिओटी हुँदा नहुँदै पहिलो लटको सबैजना उडिसक्लान् । उताबाट भनेको बेला उपलब्ध गराइदिनुपर्छ हामीले,’ ज्ञवालीले भने ।
उम्मेदवारलाई पाँच समूहमा विभाजन गरी आफ्नो क्रम संख्याअनुसार तोकिएको संस्थामा स्वास्थ्य परीक्षण गराउन भनिएको छ । क्रम संख्या एक देखि २८ ले क्रिस्टल डाइग्नोस्टिक प्रालि, २९-५६ ले ह्याम्स अस्पताल, ५७-८४ ले स्टार अस्पताल, ८५-११२ ले मनमोहन मेडिकल कलेज तथा शिक्षण अस्पताल र ११३-१४० ले नेपाल मेडिसिटी अस्पतालमा परीक्षण गराउनुपर्ने सूचनामा उल्लेख छ । परीक्षण आज साउन २९ गते गराउनुपर्ने भनिएको छ । स्वास्थ्यपरीक्षणमा उत्तीर्ण भएपछि पूर्वप्रस्थान अभिमुखीकरण (पिडिओटी) तालिम दिइन्छ र इजरायलका रोजगारदाताबाट करार सम्झौता आउने क्रम सुरु हुन्छ । इजराजयमा श्रमिकको मागअनुसार नामावली आउने भएकाले बाँकी रहेकाहरुको नामावली प्रकाशन गर्दै जाने भनिएको छ ।
२०८१ असार ११ गतेको विज्ञापनमा चार हजार २४ जनाले अनलाइनमार्फत फाराम भरेका थिए । तीमध्ये तीन हजार ४६१ वटा आवेदन स्वीकृत भएको थियो । त्यसपछि चिट्ठा प्रणालीबाट दुई हजार ११२ जना छनोट भएका थिए । उनीहरुमध्ये पहिलो लटका एक हजार जनाको स्वास्थ्य परीक्षण गर्दा ९२३ जना सफल भएका थिए भने चार जना पिडिओटीमा अनुपस्थित भएका थिए । यसर्थ पहिलो चरणमा ९१९ जना छानिएका थिए । इजरायलले आवेदन आह्वान गरेको आठ महिनापछि विभिन्न प्रक्रिया पूरा गरेर गत फागुनबाट श्रमिक लग्न थालेको हो । जसमध्ये हालसम्म ७०० भन्दा बढीको भिसा प्राप्त भइसकेको निर्देशक ज्ञवालीले बताए । बाँकीको करार सम्झौता आउने क्रम जारी छ ।
हालसम्म जिटुजीमार्फत केयर गिभरका रुपमा कामदारहरु गइरहेका छन् । इजरायलले निर्माण र कृषि क्षेत्रमा पनि नेपाली कामदार लैजाने भनेको थियो । यस विषयमा अहिले श्रम, रोजगार तथा सामाजिक सुरक्षा मन्त्रालयका सम्बन्धित महाशाखाको संयोजकत्वमा निर्देशिकाहरु बन्ने क्रममा रहेको जनाइएको छ । गत आर्थिक वर्ष २०८१/८२मा जिटुजीमार्फत ६३९ जना इजरायल गएका थिए । त्यसैगरी, संस्थागत माध्यमबाट १४९ र पुनः श्रम स्वीकृति लिएर ५५४ जना गरी एक हजार ३४२ जना गएका थिए । जसमा ८१६ जना महिला र ५२६ जना पुरुष रहेका छन् ।
इजरायलले बच्चा, युवा तथा ६५ वर्ष ननाघेका गम्भीर अपांगता भएकाहरुको स्याहारका लागि नेपालबाट केयर गिभर लग्दै आएको छ । त्यहाँ जाने कामदारले प्रत्येक दिन सात घण्टाका दरले हप्ताको छ दिन काम गर्नुपर्छ । अतिरिक्त काम गरे त्यसबापतको छुट्टै पारिश्रमिक पाइन्छ । इजरायलमा प्रतिमहिना एक जना श्रमिकले पाँच हजार ८८० इजरायली सेकेल अर्थात् दुई लाख रुपैयाँभन्दा बढी तलब पाउँछन् ।
