काठमाडौं- श्रमसचिव डा. कृष्णहरि पुष्करले श्रम, रोजगार तथा सामाजिक सुरक्षा मन्त्रालय डिजिटल युगलाई आत्मसात् गर्दै डिजिटलक्रेसीको अवधारणाअनुरुप मन्त्रालयले नयाँ डिजिटल पद्दतिहरु थप्दै लगेकोे बताएका छन् । सोमबार श्रम, रोजगार तथा सामाजिक सुरक्षा मन्त्रालयमा आयोजित कार्यक्रमलाई सम्बोधन गर्दै उनले समग्र श्रम चक्रलाई डिजिटलाइजेसन गर्न ‘ब्लुप्रिन्ट’को प्रयोग गरी प्रणाली निर्माणको कार्यले थप गति लिने उल्लेख गरेका छन् ।
सचिव पुस्करले स्वीस कन्ट्याक्टबाट श्रमसंसार र रेमी परियोजनाबाट श्रमबजार सूचना प्रणालीको प्राविधिक दस्तावेजहरुको कार्यान्वयनबाट ब्युरोक्रेसी डिजिटलक्रेसीमा रुपान्तरण हुन लागेको जानकारी दिए । श्रमचक्रको समग्र प्रक्रियालाई डिजिटलाइजेसन ब्लुप्रिन्टले ध्यान दिएको उल्लेख गर्दै सचिव डा. पुष्करले यसलाई प्राथमिकताका साथ कार्यान्वयन गरिने प्रतिबद्धता जनाए ।
श्रममन्त्री शरतसिंह भण्डारीले नवौं पञ्चवर्षीय योजनादेखि सोचिएको डिजिटलाइजेसन र श्रमबजार सूचना प्रणालीले साकार रुप लिँदै गरेकोमा सन्तुष्टि व्यक्त गरे । यस कार्यमा विकास साझेदार एसडिसी, स्वीस कन्ट्याक्ट र रेमी परियोजनाको योगदानको प्रशंसा गर्दै नागरिकलाई सेवा प्रवाह गर्न ‘मान्छे दौडिने नभई प्रणाली दौडिनुपर्ने’ पद्दतिको विकास हुन लागेको बताए । सीमित स्रोत र साधन हुँदाहुँदै पनि श्रमसंसारको प्रयोगलाई व्यापकता दिइएको र अब उप्रान्त समग्र श्रम, रोजगार तथा सामाजिक सुरक्षा प्रणाली प्रविधिमा हुने जानकारी दिए ।
